Library

ЛагIвычв Джьамльадин КIатIу йпа асквш 1932 агIан Къвбина кыт дйытI. Йсабихъа баргвын. ДчкIвын айдзата йаба «зарарчыта» дырпхьадзан дыркIытI. Йаба ауи ахIа дыгьйымбахтI, ауаса уыжвгIандзара йыгьгвынгIвырам йамгIан зарару йхаз, дзачIву йыззихаз. Ауи арахьарат адгьылрхарджьыгIвчва драпшын, йымачвнадзара таразта йгьизацIамцIузтI. Ага ауаса йаъазтынгьи, млыквта йрымаз рыквырхын ргвашв ахъа йгылата йыртйыхтI. Йан агIыгIв сабичва лымата дгIанхатI. Джьамльадин дхвыгIвхун. Ауи йайцIбачваз гIвпхIвыспакIи чкIвынкIи амла йагатI. Арахьарат абгата йгIанхатI, йгIадзынгылтI.

Джьамльадин жвыгIвсквша дыртата анхара дацIагылтI, аколхоз апны уыста йыхъвда йгIахъарцIуз зымгIва йырхъйун: архъа нхараква рпынгьи, арахврхIара апынгьи. Хъвлапныла Джьгваты йтагылаз ахшзавод апны хшы йгалун.

Асквш1947 агIан, быжькласскI дангIарылга амщтахь, Джьамльадин Черкесск педучилища дыцIалтI. Айсра амщтахь асквшква рагIан чкIвынчва, хIвсыса щардагIв рыхъаз ари аучилища университет хIисапын. Араъа дапхьауата Джьамльадин алитература амгIва дыквылтI. Абаза газет апны зны уысакI йыла анаквшва йджьайщатI, хIыбызшвалагьи уыса гIвы шауаш йылайхIватI. Йаргьи дгвышхван уысакI йгIвытI, ауи агазет йгIаквшватI (асквш 1950 агIан). Йуыса гIазквчважвуз азаман йаквыргIапсдзан – Сталин йзынархан. ЦIабыргыта, ауи асхъан зыршIыйара джвыквызцIуз зымгIва абараса алитература мгIва йшыквылуаз хIхIварыквын хIгьгIващушым. Ауищтара агIвра гьашIайымрысуазтI, ага аучилища амщтахь хысквша руацIа йцри кыт апхьарта апны арыпхьагIвта дынхазтынгьи. Ауи амщтахь сквшыкI ауацIа аобласть литература адкIылара апны дынхатI, уадыргIвана абаза газет аредакция днарахвтI. Абараса айсра амщтахь абаза литература шIыц-шIыц йгIащаквзыргылхуаз агIвгIвчви ауысагIвчва рсатыр далалтI.

Асквш 1958 апартия аобком ащаквыргылрала, Джьамльадин КIатIу йпа журналистикала ЙхIаракIу апартапхьарта афакультет дапхьарныс Ленинград дырщтитI. Асквш 1968 агIан, уыса, гIахIвахра азкIкIрата пщба гIацIищтхьата, СССР агIвгIвчва р-АдкIылра днарахвтI, асквш 1971 йгIашIарышвта асквш 1973-дза Москва йтагылу, Горький йыхьыз зхъу Литинститут апны ЙхIаракIу алитература курсква рпны дапхьатI. Апхьара амщтахь агазет аредакция апны йынхара атаджвыквицIахтI, уадыргIвана аобласть (ареспублика) агIвгIвчва рыжвлара апны литература консультантта дынхатI. Ауи ауралагьи алитература хъвлапынква, анйараква, аюбилейква радгалра уысква дрылан, заджвгьи йыла йгIацIамшвуз, ауаса замангьи, къаругьи, згIвадарагьи уыквызхуа уыс щарда йырхъйун. ЙгIапсара гватрадъа йгьгIанымхатI. Ауи йаквшахIатхауата асквш 1988 агIан артшхъвара хьзы «РСФСР-ла гIатгара зму акультура анхагIвы», асквш 1995 агIан ачIахIныгIва хьзы «Къарча-Черкес Республикала ауагIа рыгIвгIвы» гIайквнадыргатI.

ЙыршIыйара сквшква руацIа Джьамльадин абаза бызшвала йгIвыта йа урышв бызшвала йатакIта уыса азкIкIрата 25, прозагIвырата 5 гIацIищттI.

ЛагIвычв Джьамльадин КIатIу йпа асквш 2011 сентябрь а 18 адуней йхIваджьтI, Къвбина кыт дыцIарцIатI.

ЧкIала ПIитIа,

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki