Library

Черкес Амаль асквш 1993 агIан Къарча-Черкес Республика Абаза район йаланакIуа Псыжв кыт апны дйытI. Дансабийыз йгIашIарышвта ахIбачва рбжьагажва даздзыргIвуан, хIуагIахъа цIасква гIальаматра ду рызйыман. Апхьарта даныцIаз бзита дапхьун, аспорт тшадикIылуан, хвитра абакIра тшазибжьун. Анкъвакъвраква дрылалпхьадза дбагъьахун, йхIаль-шан рсайуан, абакIра акъвлейраква дрызъазахун, йызнымкIва дапхъагылагIвхун. Арра абакIра данхънах асхъан йхъа дадынхалуа, ауи аспорт квпшырала анкъвакъвраква джьгарта тшырзирыхIазыруа далагатI, ахIбачва рбжьагажва йылайкIуан. Ауи амщтахь 18 сквша дыртамылскIва арра абакIрала ГIвадахь федерал округгьи Лагъь КIавкIаз федерал округгьи дырчемпионханыс йылшатI, Украина йтагылу Феодосия къала апны а-Дуней а-Кубок гIатигатI.

Ужвы Черкес Амаль Москва область йтагылу Балашиха къала йаргвану архъвкI апны къвырльыкъв йхитI, анкъвакъвраква рпны дахIврала дабакIитI. Ауат анкъвакъвраква Россия Федерация ахъыхчарала а-Министерства йгьи акъраль ауацIауысквала а-Министерства рыхьызла дрылалитI.
Асквш 2012 декабрь а 20 йгIашIарышвта а 21-дза МВД архъвква рквтала йакIвшуз анкъвакъвра апны зхIатлара килограмма 85 йнадзауа абакIыгIвчва рпны дапхъагылагIвхатI. АчкIвын йгIатгара шмайрамыз гьцIайкIуам. Афинал апны Европа йачемпионахаз, МВД архъвква рпны афицарта къвырльыкъв зхауа аспортсмен дипшIагылан, ауаса щтахьла дгьгIатымхъатI. Йылшаракви йъазари абгата йгIайырбан йапхъахауа агыларта гIатигатI.
Амаль йаба МухIамад йпа йхъа йыладухитI, дъанызлакIгьи уыста дыздгыллакIгьи йугIахъа дъарызцIабыргу, абаргвыраква дырчвымшвауата ащхъа цIасква йшатахъу апшта йъанайырдзауа акIвпI магIны ззибауа. Къвырльыкъвхара дызшIыртра апхъала Амаль КЧР а-МВД апны дбжьагIвын, йазалху агвып арра абакIра йазибжьун. Ауи акIвымкIвагьи экономикали хабзанкъвгарали Москва университет афилиал апны йпщбахауа акурс дапхьитI. ЗакIы-гIвба мзыла йкъвырльыкъвхара далгата йцриква дырзгIацапхуаштI, апхьара найырдзахуаштI, юрист диплом гIайыртта йъачIвагIала дынхауа далагуштI. Анкъвакъвраква рпны агIатгара шIыцква дырзабакIуаштI, ауатла дгIазлыцIыз йцри уагIахъа рыхьыз щтIихуаштI, йрыпшдзуштI. АчкIвын хъацIарата йынкъвигауа зквшахIату закIыпI: апхъахьылагьи адахIвракви агIатгара дукви шйылшуш кьангьашра гьалам.

Кълыч Руслан,
«Абазашта» газет акорреспондент.
«Абаза Къраль» сайт йазалхпI.

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki