Library

Ажва гьалам, атеатр дзачIвгIвычIвгIвысызлакIгьи азазаъащакI азйымапI: азаджв йгвы гIащтIнахитI, азаджв йлахIвараква арыпшдзитI йа йарынашхыйитI. Ауаса ауи заджвгьи гвалымста дшгIаннамыжьуа гвынгIвырапI. Къарча-Черкес Республика йтабзазауа абазаква атеатр азазаъащата йазрыму ауыс кIьыдапI.

Аурышв театр сквшышвбжакI ауацIа апшыгIвчва йырзынхахьата, акъарчакви ачеркескви ртеатр ршIыйара атшауацIнарыхра жвасквшапхьадзара руацIа йадынхалхьата абазаква ртеатр агIаныршара ргвалагIвацаркIван, ауи агвала знымзара-зны абзазара йалалуашта йгвыгъун. Ауи азаман ауацIа зъазара швабыж йхIагIаз хвыгIв актерчва абазата урышв театр апны йынхун, знымзара-зны асцена йгIахвынгылта апшыгIвчва рцри абаза бызшвала апшыгIвчва йгIарачважваныс ргвалата: Кълыч Къанокъва, КIьыщмахваргIа ХIамзати Тамари, Гваджьа Абрагь-Зауыр, Уаз Лильа.

Ргвала гIарыдахIвтI, асквш 2001 агIан ЙынджьыгьчкIвын кыт ауагIа ртеатр щъата йазалуата Абаза къральыгIва театр гIаншатI. Атеатр йаунашвачпагIвхаз КIьыщмахва Умар йакIвпI. Умар йдунейпшыща ауи аъара йгъагъапIта, йцIолапIта ухъа зладухуш уыжвгIанчIви абазаква дшрыуазаджву кьангьаш гьазгIаугуам.

Псыжв кыт апхьарта дыцIаркIвата, й-60-хауа асквшква рагIан, апхьара йацйырцауата авокал-ъамапсыма ансамбль «Абазинка» дрылатагьи уарад йхIвун, ауи акIвымкIвагьи агIахIвра дхънахуан, уыса дапхьун. Апхьарта амщтахь Черкесск йтагылу амузыка училища данапхьуз «Абазинка» апны йыршIыйара рыцIагьи йалахIатI – ашвахIвара йахъазымкIва ашва текстквагьи гIанйыршауа далагатI. ЧквтIу Владимири йари агIуарадкI ацаларцIатI, ауат ауагIа йыргвапхатI, уыжвгIандзарагьи Къарча-Черкес апынгьи Апсны апынгьи радиуала, телебарала йбыжьгитI. Москва йтагылу Луначарский А.В. йыхьыз зхъу театр ршIыйарала акъральыгIва институт дангIалга амщтахь йылшараква рыцIагьи тшауацIырхтI: Къарча-Черкес къральыгIва филармония апны редактор ахIбата дынхатI, ауи амщтахь – культурала Прикубанск район ахъвшара даунашвачпагIвта, Къарча-Черкес аобласть драмтеатр апны адиректор дицхърагIагIвта. Уыста дыздгылазлакIгьи йнардзата йырхъйауамцара Къарча-Черкес Республика ауагIахъаква ркультура атшауацIнарыхра йхатI ду алайцIатI.

ЙъанатIа шIыцгьи йгвы цхIауата дадгылтI. Ауи йгIайгвынгIвуан рыцIа йуыс хъаду профессионал гвып радкIылра шакIву. Умар ачкIвынчви ахIвсси апхьара Нальчик йщтийитI, ршIыйарала Лагъь КIавкIаз аинститут апны. Ауыгьи гьуыс майрамызтI: апхьара сквшы джвыквылхьан, апхьагIвыта йнарахвуашыз 50-гIвы нарахвхьан. Адекан Эфендиев Фуъад дгIайцхърагIан абаза чкIвынчвата, хIвсысата 15-гIв надирахвтI.

Асквш 2006 агIан 15-гIв йрыуата 6-гIвы атеатр йгIацапахтI, ауат ракIвпI атруппа йагвып хъадахаз. Ауи агIан Умар кIьанджь театргьи гIанйыршан апьесаква дрыдынхалуан. ГIамта айшысла пьеса 20 раъара дыргылтI. АпшыгIвчва рыцIа йыргвапхакваз йрыуапI апьеса «АмхIаджьырква рыщтала» (ауи ТхIайцIыхв Бемырза йроман «Нышв напIыкI» йгIахъыхпI). «Сара аурышв классикагьи гьсхъаштылуам, – йхIвитI Умар, – йшпакIву ухIварыквын ауи уыззнабжьауа щардапI».

Ансимшы КIьыщмахва Умар актерква рыршIыйара апшыгIвчва ргвы йшнадзуш дащтата дынхун. Ауаса асквш 2009 агIан ауи йъанатIа дахъырхтI, атеатр амлыкв зарар азихата ддыркъванчатI. Ауи анырхIвузгьи сквшыкI апны атеатр абюджет сом зыкь 22 акIвын йнадзуз. Йчва йтшаз гьмачIым, ахIаквымхара уысквагьи дгIаркIылстI, йкърар йазхъазцIуз йынбжьагIвчвагьи гIайыцIагылын асквш 2012 мартI мыз йъанатIа дазгIайхтI. Абари агIаншара рхъвыхра хьантата йара Умаргьи атеатргьи йырзалтI, йшпакIву ухIварыквын абаза театр гIаншагIвацан, ршIыйарала йапхъахауа ачIвырхъаква ачпагIвацун. Ауаса Умар йшипхьадзауала, ауи ашвхIауысагIвала агвып ргвы дымрыдзуата гIвыджь йырзычпуш заджвы йкъарула йырхъйумца йацахъра, апхъала йацчIвырхъара атахъыпI. Умар Йараджьыб йпа магIны зму ауыс йхъазы зынгьи йгьалйыргум. Ауи аргваныта драбадыруата агIвгIвчва, адраматургква, апрофессионал режиссерква дрыцынхитI, рылшараква атеатр анхара апны йшгIадырбуш дащтапI.

АгIвычIвгIвыс уанйабадыруа йдунейпшыщагьи тшахауыргIвазитI, йхIаль-шангьи алкIгIараква шгIаукIуаш уащтапI. Абари ашвапха бзи абанамдзауа: айсра алгищтара сквшы 60 шцIызгьи айсра йаладзыз йаба йаща йнышвынтара гIайаухтI, ауи ъащтIу ашIнаха даъан (Калуга область апны), йаквнагауа ахв аквицIауата квырмыш йчпан дгIацапахтI…

Абазакви апсуакви рпхыцIа аунашва ауатыкв йгIаталпхьадза Умар йгвыцхIара гIайырбитI. Ауи йбжьагажвала чкIвынчвата, хIвсысата йгьмачIгIвым акультура амгIва йыквлыз: артистта, музыкантта, гIахIвгIвыта, ашвахIвагIвта. Йуысаква йгIадырбауагьи ажваква йгIарныцIуагIваца йгьахъазым, йдунейпшыща акультурагьи гIарныпщитI. Кьангьаш азгIайымгуата йхъвыцща шаъу араса акIвпI: атеатр театрта йызчпауа актерква ракIвпI, ауат ръазара асцена апны йгIадырбауа афыр турасква йаладырхIитI, йырсайитI. Ауи акIвпI йаргьи Умар ансимшгьи актерква ртурасква зымгIвалагьи йнардзата йгIадырбаланыс дамайчуата дзазынхауа.

Ешерова Муъминат,
«Абаза Къраль» сайт йазалхпI.

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki