Library

Ари агIамта, АйгIайра Амш ангIаргванхауа, ауи ахъазла Абашта айсра Ду йпшцIата йайсыз абаза уагIахъа рпачва фырква йгIарыквчважвауа агIвыраква ргIаквцIара джвыквхIцIитI.


Псыжв кыт абзазагIв Маз Умар ГIайса йпа асквш 1921 май а 3 атшын дйытI. Черкесск йтагылаз арыпхьагIвчва рапхьарта апны йгIвбахауа акурс дапхьауата айсра дызшIырттI.
– Сара асквш 1941 октябрь мыз агIан айсра сызшIырттI, – йгIайгвалашвахитI Умар ГIайса йпа. – Йсыцта айсра йпшцIалтI Ерыжв Умаргьи, КIвыджргIа ШахIымгьаригьи МагIруфгьи. АпщыгIвгьи Сталинград йтагылу атанкнкъвцара апхьарта хIыцIалра атахъын, ауи ахъазла Сталинград хIцатI. ЙашвхIаусыгIву гьсыздырам, ауаса апхьара хIгьнармахвтI. Афронт гIаргванхауата апхьарта атрыпара йъаздрыхIазыруаз акIвханыс закIы гьазхIвам. Ауи амщтахь хIара Ростов область йаланакIуа Калитва ШкIвокIва къала апны хIырщтийын хIапхьауа хIалагатI. ЙгIахьтахандзыкIьа ачатырква хIрыцIата хIбзазун, агъны ангIатал Дубовка къала хIырщтитI.

Рапхьара-бзазара, рчара абжараква йгIарылцIла ачкIвын дчмазагIвхан адгьылрхарджьра, арахврхIара нхараква акIвзыршуз авзвод дрыларцIатI. ЙзгIва йашвхIаусыгIву анидыр Умар йымаз чгIвычаквакI йтйын йзгIвадара тIакIв йрыбагъьаныс дащтата хырчIвы йхвгIауа далагатI. Ауи йхъа дъадзайъазуз йыгIвзачва апхьара йалган айсра йпшцIалныс тшаздрыхIазыруан. Умар ауат ркомандир дгIайауын йаргьи агвып дрылайцIаныс дйыхIватI. Умар апхьара ъанаймырдзаз ахъазла акомандир йгьйымуазтI, ауаса йыгIвзачва дрыцджвыквылныс йтахъыта швабыж дахIватI. Акомандир архвитра швъа мачвы злацIайцIушыз къарандашкIгьи гьимауызтI йнапIы йкъьан дджвыквылхтI. Умаргьи ауи дйызпшуа дгIанхатI.

¬– Акомандир дгIацапахта сйырхвитныс сшайгвгъуз сгIанхатI, – йгIайгвалашвахитI Умар. – ЙащтагIайуаз ащымта сыгIвзачваква джвыквылтI. «Баскунчак» – хIва йызпхьауа ашIыпIа апны ар рыхъаз химзавод зыргылуаз срыларцIатI. УадыргIвана Астрахань сырщтитI, айсра йпшцIарыжьныс йдрыхIазыруаз ателеграф батальон срылашватI. БыжьмызкIы хIырбжьун, уадыргIвана афицаркI Москва дгIатыцIтI дгIайын йапхъахауата йадикIылыз агвып срыларцIатI. Асквш 1943 апрель ацIыхъва сара йсыцта афронт йпшцIалтI Савин йгьи Белоусов. Воронеж фронтла хIырщтиуата унашва ангIарг Астрахань хIтыцIын ауаъадза щапIыла хIцатI, асвязь йазалху й-130-хауа агвардия батальон хIрыларцIатI.

Маз Умар ГIайса йпа хвфронткI рпны дайсытI: Воронеж, Белоруссия, Украина, Прибалтика апны йапхъахауа йгьи йгIвбахауа рпны. ЙгIаликIгIауата дызлачважвауа Воронеж фронт акIвпI. Асквшква 1942, 1943 рагIан ауи унашва ахъицIун агенерал Ватутин Николай Федор йпа. Курск аргванква, Прохоровка кыт рпны айбащра дуква анакIвшуз Маз Умар дгIархвытI. Дандырбзиха амщтахь айсра датапшцIалхтI. Ауи арра къвырльыкъвхара асквш 1945 ноябрь агIан Клайпеда апны далгатI.

– Айсра шалгаз анызгIа ауи аъара сгвыргъьачван джькIахбаста зцагIвсшуз сыгIвзачва радресква гIарыквсхырныс схъаштылтI. Швабыж йстахъыпI срынйаныс йцбахауа агвардия архъв асвязь йазалху й-22-хауа, й-130-хауа абатальонква йрылата айсра йсыцпшцIаз сыгIвзачва.

Маз Умар айсра апны йгIайырбаз ахъацIара йаквшахIатпI арат артшхъвагаква: Абашта айсра аорден, амедальква «АхъацIара ахъазла» («За отвагу»), «Германия ррыхъвашара ахъазла», датшагьи.

«Алашара» аинформация йгьи аналитика къвырльыкъвхарта

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki