Library

ХIвран Алексей йкнига шIыц

ХIвран Алексей Адам йпа абаза угIахъа рпны пIатIу ду зкву, зажва хвду аму ауасаражвква дрыларпхьадзитI. Ауи йквнадыргатI арат ачIахIныгIва, артшхъвага хьызква: «Россия Федерацияла гIатгара зму айъазагIв», «Къарча-Черкес Республикала ауагIа райъазагIв», «СССР азгIвадарахчара апны йагъьу анхагIвы». ЙгIважвахауа асквшышв аъарагIвшара ауацIа Къарча-Черкес азгIвадарахчара дацIагылата дынхатI. Асквш 1951 Дагъстан амедицина институт дгIалган Хъвжвы район йаланакIуаз Эрсакон кыт ачымазагIвтара апны нхара дгIарщтитI. СквшыкIи бжакIи ахIа днымхаскIва ачымазагIвтара дайъазагIв хъадата ддыргылын хвысквши бжакIи ауи унашва ахъицIатI. Ауат асквшква руацIа чвакIгьи зхъамыз айъазарта зымгIвалагьи йшвапху район чымазагIвтарата йщаквйыргылтI. Ауи йаквшахIатхауата аобласть йгьи акрай йгIартыцIуанта араъа айъазагIвчва рыхъазла асеминарква акIвдыршалун.

Асквш 1957 мартI агIан ХIвран Алексей шIыц-шIыц йгIандыршахыз Къарча-Черкес автономия область азгIвадарахчара унашва ахъицIаныс йзхъарцIатI. Йара зынла йхъатайкIра атахъхатI рыцIа йбаргвыз, джьауапкIра ду зпщылаз ауыс: йтыргата йгIацапахуаз акъарча уагIахъа рзгIвадарахчара адгалра. Ауи йацта аобласть згIвадарахчара анхара щаквйыргылра атахъхун, апхъала йаъамыз акъвырльыкъвхартаква гIанйыршун. Арат ауысква рпынгьи аобласть згIвадарахчара аунашвахъцIагIв шIа йзахъвдаквыщтыз гьмачIым.
Асквш 1965 йгIашIарышвта сквшы 36 руацIа, йныбыжьла тшпсщара дчIвахындзыкIьа, ХIвран Алексей Черкесск акъала чымазагIвтара апны дынхатI. Арат асквшквагьи ауагIа рзгIвадара ахчара йазынарху нхара дула йырчвын.
Ауи акIвпIта, Алексей Адам йпа Къарча-Черкес азгIвадарахчара ащаквырглыри атшауацIнарыхри рпны турых магIны зму гIаншара щарда дрыквшахIатын, йхъаталагьи джьгарта дрылан. Ауи ауысла йгIагвалашвахраква щардапI.
Абарат агIагвалашвахраква ракIвпI йкнига йаншвалыз. Ауи анцIаралагьи ажвлара уысква дрылан, йхъвыцща багъьата дазгылан, ауи ахIатырла йыла йабаз агIаншараква, йакIвшаз ауысква азазаъащата йрызйыму, аунашвахъцIагIвчва рыуа дзачIвызлакIгьи йхатIта йрылу цIакIыра аламкIва йхIвитI. ХIвран Алексей йлихыз абари аджыпха абзирала акнига джьащахъвахатI, амедицина анхагIвчва йырхъазымкIва апхьагIвчва щардагIв йрымагIальаматызлуштI.

ЧкIала Георгий

«Абаза Къраль» сайт йазалхпI

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki