Library

АпхъанчIви бзазарта рымата Россия ауацIа зпхьадзара мачIу угIахъа 47 табзазитI. Йалата ругIапхьадзара зыкь 300-гIв раъара йнадзитI. УгIахъа 40 рчIвартаква апшымкIва Сбыр, Лагъь хъарашта, МарагIацIцIырта хъарашта рпны йбзазитI. УахьчIвала ауат рыуа азджьакI рпхьадзара ауи аъара ймачIдзапIта рыдзгIа йазынадзатI: угIа 2000-гIв раъарагьи йгьнадзахуам акетква, анганасанква, асаамква, аюкагирква; 1000-гIвы йгьнадзахуам рпхьадзара алеутква, анегидалецква, аорочаква, атофаларква, ачелканецква, ачулымецква; 500-гIвгьи йгьнадзахуам аижорецква, атазква, аультква, аэнецква. Акерекква йрыуата адуней йгIаквхаз пщгIвызаджвыкI ракIвпI.

Аительмен ансамбль «Эльвель» йрылу ахъацIа.Асурат: photosight.ru

Зпхьадзара мачIу аугIахъаква йрыланакIуа абазаква рщардагIв Къарча-Черкес йтабзазитI, рпхьадзарала зыкь 30-гIв мачIкIла йайхIата. Адуней аквтала йгIауахвырквын угIахъипхьадза анахьанат аугIахъаква йызларапшым дара ркультура рымапI, агIвычIвгIвара атурыхи акультури йрыланакIуата ауат рмагIны дупI. Ажва гьалам, зпхьадзара мачIу аугIахъаквагьи магIны змата рапхъанчIвиква йгIартынхаз ркультура абайара гIащаквыржьныс йащтапI: рцIасква, рхабзаква, рашваква, зымгIва йрапхъадзата – рыбызшва. Абарат акультура хцIараква ззыгIахчауа аугIахъа адуней апны йгIащаквхитI. .

Зпхьадзара мачIу аугIахъаква ртурых байапI, ауи адуней акъральква зымгIва рпынгьи йбергьыльхара ахъазла амальква нарахвитI. «ЙхIвапсагIву адунейква. Россия аугIахъаква» – хIва йызпхьауа «йайтыпауата йакIвшауа» афестиваль апш Россия апны йаъу закIзаджвыкI акIвпI. Ауи уыста йархъйауа Россия Федерация ауацIала Сбыр, Лагъь хъарашта, МарагIацIцIырта хъарашта рпны йбзазауа зпхьадзара мачIу аугIахъаква ркультура агIащаквыжьра акIвпI. Афестиваль гIаншищтара йцIуа абыжьсквша руацIа ауи адгалагIвчва 32 йнадзауа Россия аштаква рпны программа 120 райхIа гIадырбахьатI. Асквш 2011 агIан ари афестиваль «Сочи – 2014» а-Культура Олимпиада апрограмма йаларцIан ауи астатус амата сынчIва йхынхауата йакIвшитI. СынчIва ауи апрограмма амузыка йазынархапI. А-Олимпиада адгалагIвчва йгIаджвыквырцIаз ари апроект лкIгIарата йаму хIкъраль ауацIа йагъьдзу акультура гIаншараква ъагIанарыбергьыльуа акIвпI. Асквш 2014 агIан асасчва а-Олимпия хъвмарраква ргIарбараква йырхъазымкIва Сочи йгьи Красная Поляна рпны жвабапхьадзара йнадзауа асценаква йгIадырбуш Россия йтабзазауа аугIахъаква ркультурагьи тшахадыргIвазарныс рылшуштI. Ауи ауысла асквш 2010 йгIашIарышвта Олимпиада адгалагIв комитет шIасдъа йынхитI, Россия ауацIала рыцIа йагъьу акультура программаква йрылапшитI.
Араъа Россия абзазагIвчва зымгIвагьи йрылшуштI Олимпиада акультура программа йалалныс, хIкъраль акультура абайара абгата йгIадырбаныс, ауи агIащаквыжьри атшауацIнарыхри йырзынханыс.

Асквш 2012 Россия атурых йазынарху сквшыта йгIаталтI. Ауи ахIатырла й-VIII-хауа афестиваль «ЙхIвапсагIву адунейква. Россия аугIахъаква» апны зпхьаздзара мачIу аугIахъаква ртурыхква ауатыкв йгIатарцIатI. Ауи йаланакIуа ауысква асквш ауацIала йдырхъйитI, ажва ахъазла, «Ахъмаштылра АмгIва» – хIва йзхьзу афестиваль тур август а 20 Москва апны ахъа джвыквылтI.

Афестиваль йалапI зпхьадзара мачIу алагъь штаква йыртабзазауа 15 угIахъакI ргIащтийыгIвчва (аэвенква, аэвенкква, акорякква, аительменква, акамчадалква, аненецква, асаамква, ахантква, амансиква, аселькупква, ачукчаква, аэскимосква, акумандинцква, ауасамцара) . Йапхъахауата афестиваль йалалитI абазаква.

Абаза угIахъа рщтийыгIвчва Ламхъва Артури ХIачвыкъва Зураби дауыл йаситI, йсабийищтара ари аъамапсыма йхънахитI. Артур Къвбина кыт дауапI. Дхвыцищтара хIапхъанчIвиква рмакъымква йгIун, апхьарта даныцIаз агIахIвра ансамбль дрылата дгIахIвуан. УадыргIвана «Кубиночка» ансамбль апны дгIахIвуа далагатI. Ансамбль дрылата йапхъахауата йгIайахвтI щарда цIуата дхъызхуаз адауыл. Адауыл абжьы даназдзыргIвуаз йхъвыцраква хъарата йпшгIун, хIапхъанчIвиква ртурых даланахIвауата асквшышвква дрыланагун. «Ари аъамапсыма зны йгIаунапIыцIашвазтын йгьуызныжьхуашым, агIахIврагьи хъатакIла йгIанхуштI», – хIва гIайархIвлун ауи.

Ламхъва Артури Хачвыкъва Зураби. Асурат автор йхъылхтI.

Йхъатала данымйакIва Артур арат ажваква йгIарныцIуаз йгьазхъайымцIузтI. Апхьарта дангIалга ауи Дауыр Асльан йыхьыз зхъу акультури аршIыйари рколледж ахореография факультет дыцIалтI, «Эльбрус» къральыгIва ансамбль апынгьи дацынхун. ЙгIвбахауа акурс дапхьауата апрограмма дауыласра аналарцIа гвыргъьарата йтайцIуз цIыхъва гьамамызтI. ГIамта айшысла дауыласрала йхъаду адырраква йылайкIтI, йпщбахауа акурс дапхьауата «Меркурий» ансамбль дауыласыгIвта днарахвтI. УыжвгIандзарагьи араъа дынхитI. Артур адауыласра йаргьи йгвы йаланархIитI, аздзыргIвчвагьи йпшдзу абыжьквала ргвы пшыхь тайрыситI.

ХIачвыкъва Зураб Псыжв кыт дгIатадритI, араъа дбзазитI. Ауи аршIыйара тшъадикIылыз джьаущушта йгьаъам – йаба ХIачвыкъва Валера «КЧР-ла гIатгара зму артист» чахIныгIва хьзы нкъвигитI, йанизаманыз вокал ъамапсыма ансамбль «Абазинка» дрылата дгIахъвмаруан. Йаба йакIвпI Зураб ари аъачIвагIа даквзыргвышхваз: ачкIвын дшIаркIвата адауыл бжьы дхънахуата гвы анайт дгIайнапIыцIайкIын ауи асра амадзаква ййырбатI, дырзибжьатI. Зураб бзи йбауа ари аъамапсыма щардазджьара даслитI, ачаражвраква рпны акIвызтынгьи, ахъвмарраква рпны акIвызтынгьи. Гвыпта дызлаллакIгьи рыла йырпшитI. Артургьи Зурабгьи абари апш фестиваль абазаква рыхьызла йалалныс ъарызхъарцIаз рхъа аладупI. Ауат рхъвдаквцIара дахIврала йшдырхъйуш, лахIвара шIыц пшдза рщардата йшгIацапахуаш, ауат шхIыцагIвыршахуаш кьангьаш гьазгIагIгуам.

Афестиваль тур зфыррала йбергьльу акъалаква рпны йакIвшуштI: Москва, Санкт-Петербург, Мурманск. АмгIвала датшагьи пщызджьара йгIашIаста йгIахъвмаруаштI. ЗымгIва шалу 14 концерткI артуаштI, ауат йрылапхьадзапI асаби йыбаква ртыдзкви Россия архъвкви рпны йгIадырбуш апрограммаква.

ХIкъраль ду акультура атшауацIнарыхра апны зпхьадзара мачIу аугIахъаква ркультура магIны ду шаму, рыуа запшызлакIгьи дуней дукI йашIырпшы йшауаш гIадырбаныс акIвпI афестиваль тур «Ахъмаштылра амгIвала» адгалагIвчва хачIв хъадата йдырхъйаныс рпахь йдыргылыз.

Джьандар Залина, Черкесск

«Абаза Къраль» сайт йазалхпI.

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki