Library

Йуан ГIалиса Кьамальа йпа асквш 1943 октябрь а 19 атшын ТIапанта кыт апны дйытI. Йаба йара йтахъырала айсра дпшцIалын асквш 1944 агIан Польша апны дгIарщытI. «Забачва Абашта айсра Ду йаладзыз сынбжьагIвчва рапш саргьи ссабихъа хIатладзата сгIадзынгылтI», – йгIайгвалашвахитI ауысагIв.

16 сквша дырталындзыкIьа йанду длагIзатI. Ауи асхъан ТIапанта апны клубгьи, радиуагьи, электрокъаругьи гьаъамызтI. ГIвпещкI ахIа змамыз амшI тдзычкIвын быжькласскI йзыгIвнапхьуз апхьарта ахIа датша «культура квтакIгьи» гьаъамызтI. АпещкI апны йапхъахауа акласс йгIашIарышвта йпщбахауа аклассдза апхьарта йыцIакваз асабиква ацапхьун, арахьари апещ апны – йхвбахауа акласс йгIашIарышвта йбыжьбахауа аклассдза. Апхьарта дангIалга аколхоз апны дынхатI, уадыргIвана ауыхвагIвчва ъадрыхIазыруа апхьарта мшIычпагIвта дгIалгатI. ЙащтагIайуата анахьанат ауыхвара ъачIвагIаква ййырдырхтI: апрыслара, акырбыджьаквцIара, ащыхра-швра агьиква. Йбзазара баргвыта йакIвшун, ащарда абзазага гIалцIыртаква ракIвын йгвыргIваз, йдырраква йрылайырхIаныс дгьахамдзузтI. АуагIа рыхъазла тдзы йуыхвауата хIкъраль ауацIа шта щарда гIамидатI.

«СанчкIвыныз зымгIва рацкIыс бзи йызбуз атажв-лыгажвква турых ангIахIархIвуаз акIвын», – араса йгIвитI ГIалиса йынцIра-бзазара дгIаквчважвауата. АуагIа ршIалахIвара акIвпI йапхъахауата ауи аршIыйара хац гIайылазцIаз: «КьангьашракIгьи аламкIва ауат атурыхква, аласхIвараква, ажважвква, акытчасра ракIвпI сара абаза литераторта санщаквгылуаз йгIасцхърагIаз, – йхIвитI ауи. – СанрыздзыргIвуаз саргьи ауат сыршIпшуата закI аласцIарныс гIастахъхун». Йапхъахауа ауыса ауи 18 сквша дыртата йалайцIатI, тетрад кIьыдакI азалихын йгIвыраква зымгIва ауаъа йаницIун. ЗаманкI анцIы йтетрад ыдзын агIврагьи йнапIыцIшвтхтI, ауаса щарда йнамихуата агIвра швабыж йгIайхътасуа дцатI. Датша тетрадкI азалиххын дыгIвуа даталагахтI. Йуысаква рщарда йыгIвзачва, йдырква йырзынархан, мшыркъварата акIвын йшаъаз. Йара ауи асхъан гитара дасуа тшибжьан йуысаква макъым рзыгIанйыршунта ашвата йынбжьагIвчва йырзихIвалун. ЙаздзыргIвквузгьи ауат ргвапхун, ауаса йара йгIвыраква алитература закIылагьи йапщыламкIва йпхьадзун.

Зны ГIалиса йбергьльу абаза уысагIвчва Цекъва Пасарбии Джьгватан Къалии йыргIауата йгIвыраква дгIарыпхьатI. Ауат йуысаква агазет йгIаквицIарнысла йгIайайбжьатI. Йапхъахауата йуысаква асквш 1981 май а 5 атшын «Коммунизм алашара» газет анапа йгIаквшватI. Ауи асхъан ауысагIв сквшы 38 дырталхьан. ЙгIалагауа ауысагIв йыхъазла йныбыжь ага йнаскIьахьазтынгьи аршIыйара абгата днанауахвтI. Асквш 1975 агIан хъвлапныла йъадрыпхьауа МалабазинскI квтанай апхьарта дангIалга амщтахь Йуан ГIалиса датша зджьарагьи дгьампхьатI, ауаса йдырраква йрылайырхIара шатахъу тшазидыруан. Ауи ахIатырла ажварква, атурых, аэтнография, абызшва, ауысара атеория, апоэтика йгIарыквчважвауа акнигаква гIайауамцара йхъа дадынхалуа далагатI. Ауи амщтахь йкъальам йгIацIцIуаз агIвыраквагьи йгIарныпщуан йдырраква рыцIа йшцIолахаз. Абаза газет апны йуыса абаркIыраква гIаквшвауа йджвыквылтI. АпхьагIвчва ауат зларгвапхуз йрылу амшыркъвара, ауагIа йраргвану абызшва, гвыжвкIра злам алакъырдыра агьиква ракIвын. Асквш 1985 агIан Тльабыча Мира араса йылгIвытI: «УахьчIвала Йуан ГIалиса йщаквгылыз уысагIвта дпхьадза йауаштI. Ауи заджвгьи йгвы йзымгIвауата хIлитература апны ласдза дщаквгылтI, заджв йчIвы йапшым йыбызшвала, ймакъымла, ауысара анурква гIайхъыцIуа».

ЧквтIу Микаэль ауи йыхъазла швабыж магIны зму йгьи йцIабыргу хъвыцракI йхIватI: «Йуан ГIалиса йуысаква санрыпхьауа, санрызхъвыцуа сгвы араса йгIанагитI: абаза уысагIвкIгьи ГIалиса йапшта ауагIа дыгьраргваным йгьи йгьйылшушым драргванхарныс. Ауи йуысаква зларчву, йгIархъыцIуа абаза фгIвы апшта датша заджвгьи йуысара йгьалам». ГIалиса йуысара йгIахъыцIуа абаза фгIвы акIвпI йбергьльу ауысагIв хъадата йгIаликIгIауа. Йаргьи ауи йхIвауа уадымгылуашта йгьаъам. Ауи ахIатырла йджьаущушта йгьаъам ауысагIв йхъыцIыз асквш 60 андыртлапIуз ахъвлапын агIан Йуан ГIалиса Кьамальа йпа ачIахIныгIва хьзы «Къарча-Черкес республикала ауагIа руысагIв» шгIайквнадыргауала ареспублика а-Президент йщаквыргылра йъагIапхьаз.

ЧкIала ПIитIа

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki