Library

АуагIахъа гIащаквхара ахъазла йгIадзынгылуа абанпараква рапхъанчIвиква ртынха пшдзаква рхчара рборчпI. АгIвычIвгIвыс рыцIа дшIата йуагIахъа ртурых ййырдыруа далагарквын дгIазлыцIыз аугIахъа агIащаквыжьра ауысквагьи рыцIа паса йгIайгвынгIвуа далагитI. Ауи акIвпI йыззынарху чкIвынргIа рыжвлара «Шарпны» ргIаджвыквцIара бзиква. Хысквша цIитIта ауат апхьагIвчва рквта анкъвакъвра акIвдыршалитI. Анкъвакъвра атемаква йрыквыргIапста ачкIвынчви ахIвсси арефератква дрыхIазыритI. Атемаква хIугIахъа ртурыхи ркультури йрыквыргIапспI. Анкъвакъвра хъата арат ажваква ахъагылапI: «ЙыздырхитI, саладухитI, тшауацIнасрыхитI!» СынчIва анкъвакъвра хнархаракIла йакIвшатI: «Абаза уагIахъа рыгIвычIвгIвыс пшдзаква», «Сцри кыт атурых», «Абазаква рэтнокультура тынха».

Ареспублика аштаква йрыуата жвипщыгIв рынхараква анкъвакъвра йалан. АчкIвынчви ахIвсси рдырраква гIадырбара йахъазымкIва йдрыразра атахъын ажюри йалаквугьи: аэкономика наукаква ркандидат Гвана Муъминат, аистория наукаква ркандидат Джьмакъвыл Бэла, аистория наукаква ркандидат Дагвжвей Рустам. АдгалагIвчва анкъвакъвра ъагIвнакIвдыршуз аколледж «Полиглот» аунашвачпагIв Дагвжвей Рустам йшизыразу рхIватI. Анкъвакъвра магIныта йамула араъа йгIадгылыз апхьагIвчви арыпхьагIвчви рпахь дгIачважватI Гвана Муъминат.

– ЙалкIгIата хIара уахьчIва хIышвзыразпI хъатакIла йгIанымхауата, зуагIахъа турых здырныс зтахъыта араъа йгIадгылыз ачкIвынчви ахIвсси. Апхъахьыла зугIахъа рыхьыз пшдзата йзыргуш швышрыуахушла хIгвыгъитI. Абари ауыс шванадгылзара анахьанат швыквлагIвчвагьи швыргвышхва. Ауатгьи йгIаргвынгIвра атахъыпI запхъанчIви турых зымдыруата йгIадзынгылуа агIвычIвгIвыс йпахь йщтIу абзазарагьи йалыргата дшзадымгылуаш. ХIугIахъа ртурых ухъа алауырдухушта йаъапI. Ауи ахIатырла хIансимш бзазара апны хIтурых йалу агIаншара дуква зынгьи йхIхъмаштылуата ргIахчара хIпахь хачIв хъадата йгылапI, – йгIалылкIгIатI Муъминат.

ЗымгIва рапхъа Уатакъай Алина дгIачважватI. Ауи лгIачважвара лцри Псыжв кыт атурых йазынархан. АпхIвыспачкIвын акыт йауата зыхьызква бергьыльхаз агIвычIвгIвыс пшдзаква дгIарыквчважватI: йапхъахауата ахвгIахвтра йалагаз Джьандар МхIамат, РСФСР-ла гIатгара зму артист Ерыжв Зули, бразилия гIахIвраквала адунейла йчемпионхаз ЕмгIвыкъва Уали, Къарча-Черкесла йгьи Апсны республикала гIатгара зму артист ЧквтIу Владимир, датшагьи.

Ауи лымщтахь лынхара ауатыкв йгIаталцIатI Дармыва Айза. Ауи ХъвыжвчкIвын кыт шгIаншаз даквчважватI. Ауи акыт абзазагIвчва рыштажв ПсхIвы кыт акIвпI. Ауыла йауапI йгIайтыпахта ари акыт гIанзыршакваз. ПсхIвы атурых анапаквагьи аугIа арыла ргIатрыпара ашвхIаусыгIваквагьи гIалхIватI. Акыт йауата зыхьызква бергьльу абзазагIвчвагьи дрыквчважватI: ауысагIв Мыхц Кьарим, академик Егьдза Назир, ажвлара уыснкъвгагIв Этлыхв Олег, датшагьи. ЛгIачважвара лцри кыт йгIаквчважвауа Мыхц Кьарим йуысала далгатI.

Аэтнокультура йазынарху лгIачважвара апны Шнахва Али апхъа заман ачкIвынчIви ахIвсси шгIадзындыргылуаз, йшырбжьуз, абзазара йшаздрыхIазыруаз йауацIыхта дгIаквчважватI. АчкIвынчва датша тгIачва рпны йгIадзындыргылуата апхъала йынкъвыргуз ацIасгьи даквгIашIастI. АхIвссаква хвысквша-цысквша йанырталра аунагIва уысква йырзырбжьауа йалагун. Адзахра, аджвджвара, алыргара агьиква йырхъазымква ауат рхIаль-шанква шщаквдыргылуазгьи гIайхIватI. ЙалкIгIата ауат анцIралагьи ахIбачва хвы рзырбара шатахъу йазырбжьун.

Мамбет София абазаква апхъала йынкъвыргуз ацIаскви ахабзакви дгIарыквчважватI. Абазаква анмаджьусийыз, уадыргIвана ауат дин исльам йтагылындзыкIьара мгIвата йгIамырдаз лхIватI.
ЙгIачважвакваз зымгIвагьи рынхараква джьащахъван, ауи ахIатырла ажюри йалакваз ауырата йайкьангьаштI. УадыргIвана апхъагылагIвчва рыхьызква гIархIватI. «Сцри кыт атурых» номинация апны ТIыкIва Алибек йынхара зымгIва йрагъьта йырпхьадзатI. Ажьи Милана «Абаза уагIахъа рыгIвычIвгIвыс пшдзаква» номинация апны дапхъагылагIвхатI, «Абазаква рэтнокультура тынха» номинация апны – Джьмакъвыл ФатIима. Датшагьи рынхараква дыртшхъватI Шнахва Али, Ашба ГIайщат, Шогьан Исльам, Уырчыкъва Альбина, Чагва Дайана. АдгалагIвчва анкъвакъвра йалаз ачкIвынчви ахIвсси йгIарайхIвахIвтI, ХъвыжвчкIвын кытла йгIайыз агвып рунашвачпагIв Шнахва Зифа йшылзыразу рхIватI. АчкIвынчви ахIвсси «Шарпны» адкIылара рыхьызла асогIаква, акнигаква, адипломква рнапIыцIарцIатI.

Джьандар Залина,
«Абаза Къраль» сайт йазалхпI.

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki