Library

АуагIа «АпхIвыс лтара дтагылапI» анырхIвауа йгIаныцIуа ачIвыйа? ЗымгIва йрапхъата аунагIва уысква дшырзычпу, аунагIва пхари рахIмати гIвната йаъазланыс дшащту. Ауи дызхьыслакIгьи йпсыпынкъвгауа, пхара гIахъыцIуа йалагитI. Абари апш унагIва апны дгIадзынгылтI Огвыз Лолита. Абараъа ланду щарда зхъыцIуата йлымаз адзахыга машина «Зингер»-ла йылчпуз акъом джьауымщушта йгьаъамызтI: ахъыза пхаква, ахъч тIатIаква, акIас бабаква лнапI ъазаква йгIарыцIцIуан. Апсабара йгIаунатуа апкъыгIваква ракIвын ауат зымгIва гIазлылхуаз. АтгIачва аласа швабыж йазсакъуата йаъан. Йара уыжвгьи Лолита йшылхIвауала, лунагIва ласа гIвнамызтын дгьзагъуам.

Лсабихъа дантагылаз лгвы йгIатахаз акIвпI лылахьгьи злащаквгылуа. Лолита Россия а-ГIвадахь университет дгIалгатI, асхъа асащала, асахтан адынхалщала, асхъаква ргIацIщтра уысквала акъральыгIва стандартква тшрыхалыргIвазатI, аъазара щатата йазалуа адырраква лылалкIтI. УадыргIвана адзахыртаква, аласа пкъыгIваква ъадрыхIазыруа анхартаква рпны дынхатI. Араъа лъазара йалалырхIун, апхъала йлылалкIыз адырракви адырра шIыцкви ашIлырпшуан, абзира гIалылкIгIун. Хысквша рапхъала Лолита лхъатачIв нхарта гIанлыршарныс гвы лчпатI. ГIаджвыквцIагата апхъанчIви асхъачпагакIи, ласа злархыхауа машинакIи ракIвын лымаз, ауаса лгвышхвара адуней шабгу гIацIанакIуан. Апхъапхъа асуратква лчпун: апкъыгIва асурат, аквпшыра, ачва агьиква аквлыршвун. ГIвысквша анцIы лгIапсара шымдзуа нахвахатI, лщапIы дхвынгылтI, лъазари лдырри рыцIагьи йылрыцIоланыс тшахалырдзун, луыс йазалху адамыгъагьи гIанлыршаныс лылшатI. Асхъа зигIвата йгIалрысабапуагьи рчпащала йахъыхацIыхта йщардапI, рызна рахъви хьапщ рахъви злапсугьи рылапI.
Ужвы Огвыз Лолита лкIгIара зму анапIлачпара асхъаквала (кашмир, альпака агьиквала) пальто лдзахитI. Ауи апш чгIвыча анахъауцIара анахьанат йызларапшым зынла йуылаухIвитI: рпшдзара йахъазымкIва йгьи ласыпI, уыпкъ гьгIанарыгIапсум. Лолита апальтоква рдзахра апны ласата йгIалрысабапуагьи гьапшым: хIышта апны йырхыхауа аласа йахъазымкIва Скандинавия, Перу, Германия рыштаква рпны йдрыхIазыруа аласанадзара.

Апсабара пкъыгIваквала йдрыхIазыруа асхъаквала йдзаху ачгIвычаква, апкъыгIваква Къарча-Черкес абзазагIвчва рыцIа-рыцIа йрымагIальамтхитI. Ауат ргIацIщтра гIапсара ду шапщылу гIаргвынгIвитI – пальтозаджвыкI арыхIазырра пщымызкI анаквыдзуа гIаншалитI. Огвыз Лолита йылдзахуа апальтоква напIланкъвгара сумкIачкIвынкI йа йазалху хъылпа пшдзакI рыццIах йауитI. Ауи пхIвысыпхьадза лквпшыра шIырпшыра амамкIва йалаузаныргIалитI.
Лъазара гIалрысабапуата, лапхъала йщтIу лгвы азгIвауата Огвыз Лолита араса лхIвитI:
– Ужвы йщаквгылу азаман апны хъатачIв нхарта агIаныршара йаквыргIапспI, уунагIва ушчIвумцара уынхарныс уылшитI. Ауи ахъазла йхъаду ари акIвпI: Анчва адуней пхIвыста угIаквицIазтын ауи атара утымцIуата, ухъачIвы удыруата, пшдзата убзазарныс.

Ешерова Муъминат,
«Абаза Къраль» сайт йазалхпI

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki