Library

ЧквтIу Микаэль ХIаджьы йпа асквш 1938 май а 3 атшын МалабазинкIа кыт апны дйытI. Цысквша ахIа дыртамкIва йаба дпсытI. АтгIачва рпны пщгIвысабичва гIанхатI, йара зымгIва драхIбан.

Асквш 1944 агIан Микаэль МалабазинкIа кыт апхьарта йапхъахауа акласс дыцIалтI. Ауаъа гIвысквша данапхьа амщтахь, асквш 1946 агIан, ртгIачва АлбыргIан кыт йталхтI, асквш 1950 агIан – ЙынджьыгьчкIвын кыт. Араъа акIвпI ауи ауысара ахац ангIайныпщ. АгIапын гIаталгIвацун. МартI мыз щаквгылан. Йара йцбахауа акласс дапхьун. Йан БотахIва йызпхьуз ахIвыс дзыжвра йырцаныс дйыхIватI. Ауаса адзыгIв атшпы ацхIашвы хъыркIван, ахIвыс ащапIква гIвзуа йалагатI, апахь щапIквала йчIван апыкв адзы йтнащытI…

ТланыкъвакIла йгылаз ачкIвын йгIаншуз дапшуамцара аршIыйара йзыгIацIстI: адзыгIв гIапныпI, ацхIашвы шашыхв квпсапI, ахIвысгьи араса ахIвузшва ашашыхв ахъа гIанакIын йгIахъитI: «УгIашIыха, Йынджьыгь! АгIапын гIаталтI!»

АчкIвын дгIагвыргъьачIван дцIыруа рпныла дтрыстI: «Мма! Мма! Уыса аласцIатI!!!»

Йан щаквкIдза дгIайпшын, – «А-Бота абаъу?» – лхIватI.

Асквш 1952 агIан ртшхъвага швъа йымата Микаэль быжькласскI дгIарылган ХIабаз акомсомол арайком ашвъала Черкесск йтагылу аобласть апхьарта-интернат дыцIалтI. Ауи йжвабахауа акласс дапхьауата йуыса «ХIара хIпионерпI» асквш 1954 декабрь мыз агIан абаза газет анапа йгIаквшватI. Йаргьи уысагIвдзазшва йхъа йбауа аршIыйара заман щарда аквирыдзуа далагатI. Йылахь шцуш гвынгIвыран, ауаса апхьарта адрамкружок апны йхъвмарща швабыж йдыртшхъвауа йаниба йгвы гIвбахатI, апхьарта дангIалга Москва дцан йшвъаква ГИТИС йриттI. Йуысква гьаквымшватI, Ставрополь дгIайхын араъа йтагылу апединститут акомиссия йшвъаква риттI. Архъвыхраква дахIврала дгIаркIылсын истории литератури рфакультет дыцIалтI. Ауаъа йапхъахуз акурс дангIалга амщтахь йшвъаква Москва йтагылу Горький йыхьыз зхъу а-Литература институт йгатI, араъагьи архъвыхраква дахIврала дгIарыцIсын дстудентхатI. Асеминар йаунашвачпагIвыз йбергьльу ауысагIв Луговской Владимир йакIвын, уадыргIвана ауи йтара Захарченко В.Д. дгылтI. Москва дтата дъадзапхьуз ауысара апны йъазара йалахIара йахъазымкIва йдырраквагьи рыцIа йцIолахатI, йкультурагьи тшщтIнахтI.

Литинститут дангIалга амщтахь ЧквтIу Микаэль Къарча-Черкес пединститут апны йайрыпхьатI, асквш 1962 агIан СССР агIвгIвчва р-АдкIылра даннарахв амщтахь абаза газет аредакция апны дынхауа далагатI. Асквш 1964 йгIашIарышвта аобласть гIвырагIацIщтырта апны редакторта дынхатI, аобласть агIвгIвчва рыжвлара апредседатель дицхърагIагIвын, уадыргIвана литература ауысла дконсультантын, ауи амщтахь агIвырагIацIщтырта дгIацапахтI, йащтагIайуата анаука рхъвыхра институт апны дынхатI…

Ажва «йапхъахауа» ЧквтIу Микаэль йыхьыз щардала йапщылата уанйитI. Къарча-Черкес йауата Москва Литинститут йапхъахауата йапхьаз Микаэль йакIвпI, Черкесия агIвгIвчва рпны йапхъахауата асквш 1956 агIан «Литература газета» анапаква йуыса «Бзибара» гIарыквшватI, Къарча-Черкес агIвгIвчва рпны йапхъахауата йкнигаква урышв бызшвала йатакIта Москва агIвырагIацIщтыртаква рпны йгIацIцIтI: «Абазашта агвы» (1964), «ГIвхIаджьраткI» (1965), зымгIва рапхъа поэма турасы йтагылу абаза романква йгIвытI («ЙачIваджьыргIа рыцIахь», 1960; «Ащхъа чIыхвква», 1975), йкъальам йгIацIцIтI йапхъахауа абаза верлибрква ркнига («Абыгъьква ралалхIвачваргIа», 1986), йапхъахауа абаза сонетква ркнига («Агвы алашара», 1998), зымгIва рапхъа йгIвыраква разкIкIра хвтомкI йнадзауата адуней йгIаквылтII (2011).

ЧквтIу Микаэль зыршIыйара цIолу, йгвыбзыгъу, уасаражвра ду злу дуысагIвпI. СквшкъомкI руацIа ауи йуысара аквтанай апхьартаквагьи йхIаракIу апхьартаквагьи рпрограммаква «Абаза литература», «Къарча-Черкес ауагIахъаква рлитература», «Лагъь КIавкIаз ауагIахъаква рлитература» йрылата апхьагIвчва ахъыситI, ауи йыршIыйара ауагIахъа апхьартаква рыхъаз Санкт-Петербург йгIацIцIыз апхьага-хрестоматия (1995) апны йгIарбапI.

Микаэль ХIаджьы йпа абаза культурагьи апсуа культурагьи ртшауацIнарыхра апны йалацIара шдуу гIалыркIгIауата асквш 1992 агIан ачIахIныгIва хьзы «Апсны Республикала гIатгара зму акультура анхагIвы» гIайквнадыргатI, асквш 1998 агIан абаза бызшвали апсуа бызшвали йгIацIищтыз асонетква ркнига ахъазла Гулиа Д. йыхьыз зхъу алитература согIат далауреатхатI, йара ари асквш агIан ачIахIныгIва хьзы «Къарча-Черкес Республикала ауагIа руысагIв» гIайквнадыргатI.

ЧкIала ПIитIа,

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki