Library

Джьгватан Къали Сальымгьари йпа асквш 1927 июнь а 24 Къвбина кыт апны дйытI. Араъа йсабихъа тайгатI, дгIадзынгылтI. Асквш 1934 агIан йапхъахауа акласс дыцIалтI. Йара ауи асквш йаба дихъыцIтI. ЙащахIба апхьара нижьхын йан дылцхърагIаныс ахъазла дынхауа далагатI. Къали дхвыцищтара ажваквала дхъвмарныс бзи йбун, ауат аквшвауата йанацгIайуаз йгвапхун. АлокIква йдыруан, хъвлапныла ауат йхIваланыс йыгIвзачваква гIайыхIвалун.

Асквш 1941 агIан Къали быжькласскI дгIарылгатI, аколхоз апны учетчикта дынхатI, архъа нхараквагьи дрылан. Йбаргвыз йсабихъа йгIаквчважвауа агIахIвахраква рабаркIыра «Архъакви скытлагIвчви» – хIва йрыхьызта йгIвыхтI.

Асквш 1945 агIан йан адуней лхIваджьтI. ЙащахIба айсра дпшцIан, ауи алгазтIхIва арра къвырльыкъв йхаркIвун. Швабыж дгIапсун, ауаса асквш 1946 агIан Къали Черкесск йтагылу педучилища дыцIалтI, пщысквша дапхьатI, дангIалга йцри кыт апны дынхауа далагатI. Асквш 1953 йгIашIарышвта Джьгватан Къали абаза газет апны, уадыргIвана аобласт радиуа апны журналистта дынхатI. ЙащтагIайуаз асквшква руацIа Черкесск йтагылаз арыпхьагIвчва ринститут, Пятигорск йтагылаз педагогика институт йгьи Москва йтагылу Горький зхьзу Литинститут апны йхIаракIу алитература курсква дгIарылгатI.

Йстатья «УысакI алахь» апны ТхIайцIыхв Бемырза йгIайгвалашвахуан Джьгватан Къали йапхъахауата агазет аредакция апны йгIаныршаз ауысара абзибагIвчва райззара дгIайта йуыса збарла дшапхьаз. ЙыздзыргIвквуз рыхъаз агIвычIвгIвыс йара йуыса збарла дапхьауата апхъала йгьрымбасызтI. Йаргьи ауыса анадзара зымгIвагьи йджьарщатI. Ауи аъарала апхъала агазет йгIаквшвуз чкIвынргIа йгьрапшмызтIта зымгIвагьи йыргвапхауата йаздзыргIвуан. ХымшкI анцIы, асквш 1950 апрель а 22 атшын, Ленин йхъмаштылгата йгIвыз ауыса «Ахьыз дудздза» абаза газет йгIаквшватI, ауи амщтахь урышв бызшвала йатакIта «Правда» газетгьи йгIаквырцIан СССР ауагIахъаква рыбызшваквалагьи йатаркIхтI.

Къали йлитература мгIва уысагIвта дыквылтI. Асквш 1956 агIан йгIацIцIыз йкнига «Уара суызуыситI, с-Псадгьыл!» йапхъахауа абаза уыса азкIкIран: ауи апхъала йгIацIцIуаз азкIкIраква ауысагIвчва гвыпта йацгIацIырщтуан. ЙащтагIайуата йгIацIцIтI ауыса азкIкIраква «Щымта», «МгIвакIла», «Абзазара», ауаса дукI йнамихуата Джьгватан Къали апрозагIвра тшазинайырхатI: асквш 1964 агIан йгIахIвахраква разкIкIра «Гъын паса», уадыргIвана йхабаргIвыра «Муртат» (1968), йроман «Ламбагвыр» (1970) адуней йгIаквылтI, ауаса йыршIыйара апны зымгIва йрагъьта йырпхьадзауа хIугIа йагIвсыз ртурых йгIаквчважвауа ароманква «Хьапщ джьуар» (1981) йгьи «Лаба» (1983) ракIвпI. ЙцIыхъвахауа йкнига (1986) уыса азкIкIрапI, «Абзибара аныха» – хIва йахьызпI.
Джьгватан Къали ажвлара уысква рпны ауралагьи йажва багъьан, йкърар дууын, ацIабырг дазгылан, зынгьи йхъа гьнаймыркъвуазтI, алитература гIвыраквагьи гвыхътIыла дрылачважвун, ажва бахла заджвгьи зынгьи дгьимырджьузтI йгьи дгьимыртшхъвузтI.

ЧкIала ПIитIа,

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki