Library

Ауи дтурыхдырыгIвхушта йыквдырпшуан. ЙтгIачва Хъвыжвду йтыцIта йъацахыз апсуа кыт Дурипщ апхьарта апны ХIвран Алексей турыхдыррала чIыдата йакIвдыршуз апхьара сахIатква джьгарта дрылазлун. Йаргьи «Сара с-Хъвжвы» зхьзу Алексей йгIвыра уапшрыквын ауи йыквдырпшуаз аъачIвагIа гIалихыргьи йхъвы шгIатамхушыз йазхъауцIа йауаштI. Ауаса йара Алексей йгвалаз датшан – ауи дайъазагIвхара йтахъын. Ауи агвала дазынадзара ахъазла ачкIвын щарда дгIапсатI. Асквш 1944 агIан аинститут архъвыхраква дыркIылсызтIхIва, хвырта зквыта айсра йгIапшцIыцIхта йара ауи апхьарта йыцIалра зтахъхаз айсчва мгIва ритра атахъхатI. ЙащтагIайуаз асквш данатацIалхуаз ауи архъвыхраква йрыуата ахпа «5»-ла йкIытI, азакI – «4»-ла. Удырраквала арат рапш гIарбага уымата апхьарта ушнарахвуашла угвы бжамызла йауашын. Алексейгьи бзигвыгъа йымата аинститут йнарахвыз зну ашвъа дапшныс дцатI. Ауаса дзынйаз апхьарта Кишиневла йшатдрыпауа, йыцIалуашызгьи ршвъаква шнарахвхуаш зныз хабарргаган. Угвы гьагIвымкъьума!

Рпны дангIайх ХIвран Алексей дъадпалуаш йымдыруата дасын ВКП(б) а-Квта Комитетгьи йхIаракIу дыррала акъраль аминистргьи сальамшвъа рзыйыгIвтI, йуыс зквыз райхIвтI. Йаргьи – йджьауымщушта йаъума?! – агIвбагьи рджьауапква гIайадзахтI. АзакI ауи Лагъь КIавкIаз апны айъазагIвчва ъадрыпхьауа запшинститутызлакIгьи дца йшауаш анын, азакI Махачкъала дцарныс дархвитуан. Алексей йгIвбахуз рыцIа йгIалихтI.
Абарауаса ХIвран Алексей асквш 1945 ноябрь мыз агIан Дагъстан амедицина институт днарахвтI. ЦIабыргыта, зынла хачIвыта йпахь йгIадыргылтI: гIвымызкI цIуата йапхьуз агвып дызлагIархьшваз январь а 1-дза йахьирыдзахырныс. АчкIвын апхьара дажвлын йымшгьи йыцIхгьи ауи йайтуан. «Абар ужвы сынбжьагIвчва сырхьыдзитI» – шихIвуз хъыхь чвгьакI йылымцIхуата йг1айщахIалтI, йаргьи йапхьара сквшыкIла йатахъигахра атахъхатI. Асквш 1946 сентябрь йгIашIарышвта акIвпI Алексей йстудент бзазара анджвыквылх. Хвысквша ауран ауи. Асквш 1951 агIан ачкIвын йхIаракIу дырра зму дшайъазагIву йаквшахIатхауа ашвъа йымата нхара Черкесшта дгIарщтитI. АъачIвагIагIв шIа дгвыгъун хирургта аобласть чымазагIвтара дындырхушта. Ауаса нхарта ъайызгIарауыз Хъвжвы район йаквтаз Эрсакон апны акIвпI. Ауи акыт утыцIта йара дъагIатадрийыз Хъвыжвдудза йбжьу километрквакI ракIвызтIхIва Алексей йпсадгьыл дгIайхта гьйылайымхIвузтI. Йауа ухIварыквын дъагIадрийыз адгьыл гьйымдыруазтI.
Эрсакон арайон йаквтазтIхIва кыткI шаъаз йаъан: атыдзква рыцхIата, аурамква аква амщтахь узырбжьымсуа. Электрокъарунадзара гьрымамызтI акыт. АчымазагIвтарагьи ауи йгьагъьмызтI: йгьлабораториям, йгьрентгеным, ъачIвагIагIвгьи гьаъам. Ауи йайчваху, айъазагIв хъадагьи дакъвыцIхтI.
МызкIи бжакIи ачымазагIвтара унашвачпагIв дгьамамызтI. УацIыхъван ауи аъанатIа ХIвран Алексей ддыргылтI. СквшбжакI айхIа Эрсакон апны дынхарныс згвыгъамыз аъачIвагIагIв шIа ауи дадымгылызтIхIва закIгьи гьйылымшатI. «Йшцауала, араъа сгIанхадзушта гIацIцIуаштI», – йхIван Алексей йуыс шIыц джвыквицIатI. ЗымгIва йрапхъата гIвыджь алаборант уыс йазибжьатI. УацIыхъван рентген ъахъырхуаш пещ адигалтI. Арат агIвуыскI рбзирала айъазагIвчва ачымазагIвква йрыхьуа рыцIа тамамта йырзыщаквыргылуа йцатI, йаргьи чва зхъам ауысквала заджвгьи Черкесск дгьрымщтихуазтI.
Ауасамцара ауысква наскIьауа йалагатI. Щарда йнамихуата ачымазагIвтара машина азырхвгIан «цхърагIара ласы» гIандыршатI. Арайонква аларцIауа йаналага ХIвран Алексей дгIаласхан апартия арайком зыгIвназ атдзы ачымазагIвтара ахъазла йгIарыквихтI. Ауи амщтахь щарда цIуата дыззнацIуз хирургия хъвшара гIахъитIытI. АчымазагIвтара алшараква швабыжта йрылахIатI. Ауи анхаща гвы азтыз Черкесштагьи ауи зланакIуаз Ставропольштагьи рпны азгIвадарахчара йахъпшылуаз аунашвачпагIвчва араъа запыт йгIайуа, айъазагIвчва рыцгIардуамцара анхара швапха йахадыргIвазауа йалагатI.
Эрсакон апны дъадзанхаз ахвысквши бжакIи руацIа ХIвран Алексей ъачIвагIагIвтагьи унашвачпагIвтагьи дщаквгылтI. Ауи йыцынхуз агвып руыс йнардзата йдырхъйун, йызмайгвгъахуаз ачымазагIвква рщапIы йангIаквдыргылхуазгьи ншун.
– Зны, ацIагахра йатлаханта, млыкврхIартакI апны машинакI былчIвы штарчвузымца йгIагIвжватI, – йгIайгвалашвахитI Алексей Адам йпа. – АмашинанкъвцагIв йчгIвыча йаластI. Ауи хIпны дангIарг «дшабгу дблын» – йзухIвушта даъан.
Аобласть йгIатырдата йгIардыз айъазагIв Юра (ауи акIвын амашинанкъвцагIв йыхьыз) данипшы «ари закIылагьи угьызйыхъвахуашым» – гIанищтуата йхъа йрыкацатI. Ауаса ачымазагIвтара анхагIвчва зымгIва ргвы дымрыдзуата ачкIвын йбзазара йазабакIуан. Йаргьи дгIархчатI! Ужвы йъагIадзазгьи Юра йгIванхауата адуней дгIаквызжьыз аугIа дырзыразта дбзазитI.
…Асквш 1957 мартI мшыкI Эрсакон ачымазагIвтара апны «акыт шабгу араъа йгIайма?» – ухIвушта аугIа жвпIаран. Акытла хабар гатI «а-ХIвран дцахитI» – хIва. Йбзазара апны йыншаз ари апсахрагьи Алексей йтахъымкIва акIвапI йшцаз. Ауи аъара къару злайцIаз ачымазагIвтара ныйыжьхырныс, дызщцаз аугIа дрылцIхырныс йгвы адзакIьагьи йгьтамызтI. Ауаса йатаркIвах йара йгIайымцIгIауата нхарта «йзырхIвайтI»: «ЗгIвадарахчарала облисполком ахъвшара унашва ахъуцIарныс йуыквхIырпштI» – хIва гIайархIвтI. ЙгIауыквдырпшызгьи йгIауыхъвдаквырцIазгьи апшын ауи агIан. Йаргьи йащтагIайуаз атшын ХIвран Алексей Черкесшта шабгу азгIвадарахчара дахъпшылыгIвта ддыргылтI. Ауи ахабар згIаз акыт абзазагIвчва райъазагIв йшизыразу йархIвныс йгIайззатI.
– Съадзанхаз азаман ауацIа акыт апны закIыла сзымцхърагIаз тгIачвакIгьи гьаъахымзарызтI. ЙгIайззакваз санрылапш щардагIвы рыладзква хъагылата йызбатI. Ауи са сыхъаз зацкIыс тлапIа аъам хвыпI, – ужвы йъагIадзазгьи Алексей Адам йпа ауи амш ангIайгвалашвахуа йгвы гIалалитI.
«Сбзазара арыхъварта шIыц спахьла тшгIахъызтIуа сымгIва майрахушта сгьамыргвыгъузтI, ауаса гIапсари джьауапкIри шсыгымхуш йазхъаснарцIун», – араса акIвпI дшаквчважвауа ХIвран Алексей ауи агIамта «УайъазагIвзларныс гьмайрам» – хIва зхьицIаз йгIвыра апны. Къарча-Черкесшта ъадыркIылхыз йгIалцIла ауысква гIванла йрылахIун. Айсра агIан йтыргата ужвы йгIайхуаз акъарчаква рбзазартаква рпны рзгIвадара ахьпшра шIыц-шIыц йадгалхра атахъын. Йара медицина шабгугьи абзазага щата рыбагъьара, ъачIвагIагIвчва азрыхIазырра, йаъам акъвырльыкъвхартаква гIаныршара – зъаразйа хачIвыта йпахь йщтIаз сквш 28 рахIа йыртамыз аунашвачпагIв?! Ауаса ХIвран Алексей ари архъвыхрагьи хъацIара йылата дгIалстI.
Абзазара йгIанаргылуаз абаргвыраква йырхъазымкIва йапшым аунашвачпагIвчва йгIандыршуз апрагылаквагьи дырхъысра атахъхун ХIвран Алексей. Ауаса йанцарызгьи Алексей Адам йпа ауыс аугIа рыхъазла рыцIа йшагъьхуш дазгылуан, йаргьи йчIвы хъахьхандзкIьа дгьгIатымхъузтI. Йайрышра йгIалцIла йынхарта йыквырххызтынгьи, ауи ацIабырг амгIва дгьыквымцIтI.
УацIыхъван сквшы 36 руацIа ХIвран Алексей Черкесск аполиклиника апны айъазагIв хъадата дынхатI. Ауи азаман ауацIа ари айъазарта акъала абзазагIвчва рзгIвадара ахчара йащъата йалтI.
Асквш 2001 йгIашIарышвта Алексей Адам йпа тшпсщара дчIвахтI. Ауаса ужвы йъагIадзазгьи джьгарта ажвлара адкIылараквагьи, Къарча-Черкес апны йгIаныршу Россия акоммунист партия ахъвшарагьи рынхара далапI, йцIыхъвахауа азамандза ареспублика АугIа Райззарагьи Черкесск къала аунашвалыхыртагьи дырдепутатта далырхуан. Россияла гIатгара зму айъазагIв, КЧР аугIа райъазагIв, СССР азгIвадарахчара анхагIв бзидздза, Черкесск къала ЧIахIра зму абзазагIв ХIвран Алексей Адам йпа абазаква йырхъазымкIва Къарча-Черкес аугIахъаква зымгIва рквтагьи хвду ззырбауа ахIбачва дрыуапI.
Ауи йбзазара апны зны йгIалихыз зымгIва дрызцIабыргта дгIабзазатI: ъачIвагIазтI, тгIачвазтI, апартия акIвызтI. Ауи йынцIра йгIацIанакIуа мшипхьадза аугIа рыхъазла сабапра злаз уысла йырчвын. Йаргьи йницIыз асквшы 85 рахьыла дацапшхитIта:
– Са сбзазара сазыразпI. ЙгIалсхыз мгIвакIгьи сгьайгIваджьхуам, – йхIвитI.

ЧкIала Георгий
«Абаза Къраль» сайт йазалхпI

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki