Library

Амараташварташтаква рпны щарда цIуата йщаквгылтI арат ажваква: «self-made man». Араса йызпхьауа агIвычIвгIвыс йщала, йымлыквла абайачва дрыуамкIва абзазара апны згIапсарала, зкъарула, зпхдзыла, здырраквала зщапIы йхвынгылыз йакIвпI. Абараса йамайчуата йаъу агIвычIвгIвыс гвыбзыгъаква, чкIвынргIагьи гIацIанакIуата, ймачIгIвымкIва хIуагIахъагьи йъагIарылцIуа угвы йалахIитI. ГIапыргIа Азамати Татьяни аща-ахща црипI, Гвымлокт йгIатадритI, араъа йгIадзынгылтI, рдырраква акыт апхьарта йгIацIыргатI. Згвы хътIыз, зпхдзхIальальла йбазазуз ауат ран, раба, ранду, рабаду ркытлагIвчва ауралагьи пIатIу рыквырцIауата йгIамгIвайсуан. Акыт абзазагIвчва рщардагIв йрапшта ауат адгьыл дырхарджьуан, рахв дырхIун. Ауаса йгIадзынгылуа абанпара датша бзазара мгIвапI йгIалырхыз.

Татьяна лаща хысквшала дйахIбапI, асквш 1987 агIан дйытI. Асквш 2005 агIан дырра бзидздза лымата Гвымлокт аквтанай апхьарта дгIалган Россияла ауагIахъаква райгвара здамыгъу ауниверситет афилиал дыцIалтI. Афилиал Ставрополь шта йаланакIуа Ессентуки къала апны йаныргIалпI. АпхIвыспачкIвын дырра цIола лымата экономики информации руысла афакультет дгIалгатI, акомпьютер агIарысабапра дазъазата, адахIвраква лщардата бзазара мгIва дыквылтI. Татьяна йхIаракIу апхьарта дахIвра дула дангIалгуз гIвдипломкI гIалыртатI: азакIы Россия апны даланханыс хвитнагIа гIалнатуан, йгIвбахауа – агIвымакъральква рпны.
ЙзачIвбзазара уысызлакIгьи апны агIвычIвгIвыс дызрыпшдзауа йдырраква, йъазара, йхъашыгIвра ракIвпI. Ауи гIарпхьадзауата Татьяна Ессентуки йтагылу Арбитраж апелляция хIаквымхарта апны дынхарныс ддрайгватI. Асквш 2010 агIан ГIап Татьяна Ставрополь шта йаланакIуа йжвицхауа Арбитраж апелляция хIаквымхарта апны информацияли связли ахъвшара даъачIвагIагIвхатI. Араъа ауи атехникала, аинформацияла анхагIвчва дызларыхъвуш ауысква рырхъйара хъаталкIытI, адгалра техникагьи ауи зланхуш апрограммаквагьи щаквлыргылтI, анхарта пещква рпны ателефон связь щаквлыргылтI. Ауи луыс дазъазапI, бзигьи йылбитI. Анхарта апны гIвысквша руацIала лыхв хъалтI – ахъвшара даунашвахъцIагIвхатI.
ЛащайцIба Азамат асквш 1990 агIан дйытI, акыт апхьарта асквш 2008 дгIалгатI. АкытмлыкврхIара йаквыргIапсу ъачIвагIа гIалихын йара ауи асквш Ставрополь йтагылу акъральыгIва кытмлыкврхIара университет дыцIалтI. Азамат дъадзапхьузгьи агIамта йаквыргIапсу акыт нхараква дрылан, йъачIвагIа рыцIагьи дазъазаханыс ахъазла агIвымакъральква рпны нхара дцатI. Бавария къала йачвыхъарамкIва йаныргIалу Петерсдорф кыт апны пщымызкI руацIа араъа йауу афермерква дрыцынхатI, шIыцра щарда йдыртI, йылайкIтI. АкытмлыкврхIара университет апны йпщбахауа акурс йапхьаркIвуз ачкIвын рпхартала йхъгIву адгьыл амальквала йапшым агIайыраква ргIарйыща атехнология амадзаква цIолата йылайкIхьан.
Апхьара дгIалганыс сквшыкI атахъыркIвата, асквш 2012 апхын, аъачIвагIагIв шIа йъазари йдырракви йрылайырхIаныс ахъазла Ставрополь шта йтагылу Неженск рпхарта комбинат апны дынхауа далагатI. Араъа йылайкIыз аъазара акъральыгIва рхъвыхра агIацIсри йдиплом нхара ахчари тшырзирахIазырныс ахъазла швабыж йгIайыхъватI. СынчIва апхьара далган йдырра цIолква гIазырбауа ашвъа хъада – адиплом къапщы – гIайнапIыцIарцIатI. Уыжвласыла арра къвырльыкъв йхуштI. Къвырльыкъвхара даналгара Азамат йъачIвагIала дынхарныс йгвалапI.
Ажва гьалам, хIхаквлагIвчва рдахIвраква, ргIатгара дуква рунашва гIамта айшысла йшгIахIайдзуш. Ауат йрапшу агIвычIвгIвыс гвымчIваква уанрынйара швапха гIархъухныс, рамайчра уашIпшныс гIаутахъхитI.

Кълыч Руслан,
«Абаза Къраль» сайт йазалхпI

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki