Library

Къарча-Черкесла гIатгара зму артист, Къарча-Черкес республика акъральыгIва филармония ашвахIвагIв Чыкъ Сима лыхьыз амузыка культура апны йбергьльыпI. Ауи ашвахIварала лъазара хIагIапI, Къарча-Черкес аршIыйара турых апны шIырпшыра змамкIва йпшдзу лхъатачIв бгъьыц гIанлыршатI. Ауи лыршIыйара Лагъь КIавкIаз ауагIахъаква ркультура апны агыларта хIагIапI. Лпрограмма абаза ашваква йырхъазымкIва йбергьльу аурышв классикква: Варламов, Глинка, Чайковский, Рахманинов, Моцарт, Россини, Шуберт, Мендельсон – рыршIыйарагьи алапI.

Сима Псыжв кыт апны дйытI, ЧыкъргIа Анатолий ЧагIбан йпи Зоя Уасман йпхIи ртгIачва ду апны дгIадзынгылтI. Лаба пIатIу ду йыквырцIун, Социалист нхара а-Фыр чIахIныгIва хьзы нкъвигун. АтгIачва музыка бзи йырбун. Сима лаба пшдзата ашва йхIвун, уарад щарда йдыруан, йсабиквагьи бзи йдйырбун. АпхIвыспачкIвын пщысквша дыртата ашвахIвара дшазычпаз, амакъымква майрата йшгIалкIуа гвы арттI. Амш шабгу уарад гьылшIымшвтуазтI: унагIва уыс анылхузгьи тшанпсылщузгьи. Ауи майрата акъвабызасра тшазылбжьатI. Йылгвапхуз амакъымквагьи йгIатылщту ласдза тшалрыщцун. УадыргIвана къвабыз дасуамцара уарад лхIвауа далагатI.
Ашваква зныз апластинкаква щардала дрыздзыргIвныс бзи йшылбуз лгвы йгIатахатI. Акыт адзакIьа анахьанат йгIарылымхIвауата тдзыкI гылан. Сима ари атдзы адзхъа сахIатпхьадзара дгылныс дхIазырын, ауи атдзы ахъышвква тIыта арадиола йгIатырщтуаз ашваква рбжьы акIьадыгв йгIатыхIвачвгIун. АпхIвыспа алахIвара пшдзаква днарахвуанта датша закIгьи лыла йгIацIамылхуата ашваква дрыздзыргIвуан. Ауат адискква рбзирала аэстрада ашвахIвагIвчва рыршIыйара тшахалыргIвазун.
Апхьарта апынгьи аклуб апынгьи аршIыйагIвчва гвыпква дрылата дгIахъвмарун. Дантшытха лбыжьгьи щаквгылтI, лмакъымгьи бзихатI. Апхьарта дангIалга аобласт радиуа ахор дрылалтI. Ахор аунашвачпагIвчва ашвахIвагIв шIа лбжьы ргвапхатI, лылшара шдуу гвы арттI. Араъа Сима йлыдынхалквуз дукI йгьымгIапсузтI, йшпакIву ухIварыквын амузыка апхьарта дгIалган йазалху апычIв дырраква лыман. ДызшIпшуаш ашвапха бзиквагьи ансимшы лыла йыцIан: Луценко Лидия, ШвхIахважь ГIальым, Боташев Науар, Аджьбакь Владимир, Йуан Муса, Къвмыкъв Зоя, Мартаза Дмитрий. Ауат зымгIвагьи ареспублика амузыка ршIыйара атшауацIнарыхра апны ралацIара дупI. Рыуа дзачIвызлакIгьи Сима лыршIыйара ащаквгылра йацхърагIатI. АшвахIвагIв шIа музыкала лдырраква лрыцIоланыс лтахъыта асквш 1975 агIан Черкесск йтагылу амузыка училища дыцIалтI. ДакъикъакIгьи мцырата йагIвлымщтуата ашвахIвара дазъазаханыс ахъазла йлылшуз адырраква зымгIвагьи лылалкIуан.
Сима ауагIахъа макъымква щатата йыззалыз ашваква пшдзата йылхIвун, ауат ашваква аздзыргIвчва йыргвапхауата ргвы йгIатахун. Абараса лгыларта кIьыдата абаза эстрада ашвахIвагIвчва рсатыр далалтI.
Ауи «Абазинка» ансамбльгьи дрылата уарад лхIватI. Луарадква хIреспублика ауагIахъаква рыбызшваквала йылхIвитI, ауат абзибара, абзира, азцIабыргра агьиква йгIарыквчважвитI. Лашваква рпны агвыгъара, анасып, анашхыйара агьиква йырзынарху ауыжвгIанчIви пхIвыспа ллахIвараква гIалырбитI.
Хвысквша руацIа (асквшква 1992-1987 рагIан) агIахIвра-ашвахIвара ансамбль «Исламей» апны дынхатI. Ансамбль акъраль аштаква щардата йгIамырдун, «ауагIа рансамбль» чIахIныгIва хьзы гIарквнадыргатI. Асцена апны Сима лгIахъвмарра аконцертква рпрограммаква арыпшдзун. Ашваква лцри абаза бызшвала йылхIвун.
Асквш 1996 агIан Чыкъ Сима амузыка училища апны датша хъвшаракIгьи дгIалгатI – «уагIахъа къвабыз» классла. Асквш 2002 йгIашIарышвта ауи Къарча-Черкес республика акъральыгIва филармония апны ашвахIвагIвта дынхитI. Лрепертуар анадылгалуа ла йлыквыргIапсу ашваква гIалылхитI, дрыдынхалитI, йаргьи асцена апны адахIвраква рылагIатылгитI. Угви упси йырзынадзауата акIвпI Чыкъ Сима адуней классика (аопераква, аопереттаква) йгIалху ашваква, аромансква, арияква ангIалхIвауа.
Асаби локIква рфырква ртурасквала йгIаныршу ашваква анылхIвауа нахвата ауи аъаща дзытагылитI, ъазара ду лзыгIарбитI. АздзыргIвчва хвыцква рыцIа йыргвапхауа йрыуапI асаби музыка спектакльква йрылу афырква: абага Алиса, ауыжвгIанчIви Тажв-нажгIвыршIыдза, а-Фея, а-Цгвы ртурасква.
АшвахIвагIв ъаза Чыкь Сима лмакъым пшдзапI, акъару тапI, алшараква ауацIыхпI, алахIвара пшдзаква гIанаршIыхауата йаъапI, ауи абжьыла йапшым алахIвараква лзыгIарбитI – йкьахву алирика акIвызтынгьи йнашхыйу адраматизм акIвызтынгьи. Абарат алкIгIараква ракIвпI аздзыргIвчва ауи дзыргвапхауа: луыс дазызчпапI, лыршIыйара нардзапI, апсабара апшта йцкьу лгвы хътIыта асцена апны дгIахъвмаритI, ашвахIвара ршIыйара апны шIырпшыра змам лъазара ахIагIара гьлыргIващум, дазцIабыргпI.

ХвытI Залина,

«Абаза Къраль» сайт йазалхпI.

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki