Library

АхIбачва йшырхIвауала, адуней тшапсахтI: аугIа датшахатI, агIвычIвгIвысагIи аъадаб-намыси йрызрыму азазаъащагьи тшапсахтI, тшырпсахтI аугIа рхъвыцщагьи йыздгылуа ауысквагьи. Ауи цIабыргызапI: хIгьагьара апны мыгIвхъара щардахитI, зарар щарда злу аинформация чкIвынргIагьи йрызарархитI, ракъыльгьи ргвгьи ацанакIитI. Ауаса уыжв хIзаман йгIадзынгылуа абанпараква йырхъгвыргIвауа агIвычIвгIвысква ймачIгIвымкIва йъагIаншауа насып дупI. Ауат хIугIахъа йырпхыцIахушгьи йазхъвыцитI, ажвала йахъазымкIва руысквалагьи ауагIахъа культура абайара гIащаквдыргылхитI, чкIвынргIа рызгIвадаралагьи ракъыльлагьи йщаквгылата йшгIадзынгылуаш йащтапI.

Ауи йаквшахIатпI Абаза район ахъада йсогIат бжьагылата волейболла йакIвшаз ЙхътIу анкъвакъвра. Ауи чкIвынргIа йырзынархазтынгьи араъа ныбыжьла йалымхуа йызтахъу зымгIвагьи гIахъвмар йауан. АдгалагIвчва йшырхIвазла, абаза кытква зымгIвагьи алалныс йдрайгватI. Ауаса кытквакI ргвыпква гьызгIадымгылтI. Анкъвакъвра ъакIвшуз ЙынджьыгьчкIвын кыт апхьарта аспортзал аугIа гIвнамшвауата йщардагIвын. Аспортсменква йырхъазымкIва ауат рыхъазла згвы цхIуз рыгIвзачвагьи рыцгIайтI. Анкъвакъвра йгIадгылыз хIвахIвра ажвала тшырзынайырхатI чкIвынргIа руысквали аспорт ауысли Абаза район ахъвшара аунашвачпагIв КIвыждза Руслан:

– Ари анкъвакъвра гIвысквшахауата йакIвхIыршитI, йгIалалуа аспортсменквагьи рыцIа-рыцIа йрылахIитI. Ауи зквшахIату ари акIвпI: рызгIвадара багъьаханыс ахъазла ачкIвынчви ахIвсси спорт тшадызкIылуа йшрылахIуш хIащтапIта ауи ауысла хIгIапсара ахъазгIваца йшымдзуа. Арат анкъвакъвраква рбзирала акытква рбзазагIвчва абадыритI, йащтаныкъвауа йалагитI, тшадыркIылитI. Ауи хIара йхIмурад хъадапI. Аспорт агIвычIвгIвыс йзгIвадара шарыбагъьауа кьангьаш гьалам. Ауи тшадызкIылуа аугIа йрылахIапхьадза угIахъала рыцIагьи хIбагъьахуштI. Анкъвакъвра ахIбачвагьи гIалалитI, ауат йрыуата чкIвынргIа швапха гIазхъырхуаш щардагIвыпI.

КIвыждза Руслан аспортсменква адахIвраква рзитахъта драйхIвахIвын анкъвакъвра джвыквылтI. Абар акытква йгIадыргылыз агвыпква: ЙынджьыгьчкIвын – хпа (агIвба хIвсыса гвыпын, азакIы чкIвынчва гвыпын), Псыжв – гIвба (агвыпкI – хIвсысата, арахьари – чкIвынчвата), Къвбина – гIвба (агвыпкI – хIвсысата, арахьари – чкIвынчвата), ТIапIанта – гIвба (агвыпкI – хIвсысата, арахьари – чкIвынчвата), АлбыргIан – чкIвынчва гвыпкI.

Анкъвакъвра ЙынджьыгьчкIвыни Псыжви рыхIвсса гвыпква ранйарала йджвыквылтI. Анылагьи арылагьи ахIвссаква айрышта топ йасуан, айгIайра йазгIашыкъта тшгIадырбатI, ауаса йгIаздахIвыз айынджьыгьква ракIвпI. УадыргIвана Псыжви Къвбини рычкIвынчва гвыпква ауатыкв йгIаталтI. Акъвбинаква рыцIа йахIбазтынгьи арахьарат йызцасуаз атопасра йазъазата тшгIадырбун. УадыргIванагьи акъвбинаква рчIвы хъахьхатI.

ЙзачIв анйаразлакIгьи джьащахъван. Агвыпква йамайчуата апхъагылара йазабакIуан. АцIыхъва хчкIвынчва гвыпкI ргIарбараква апшхан чIвы тадрышвра атахъхатI. Абараса йщаквгылтI: йапхъахауа агыларта Грушка йауу агвып йырквнадыргатI, йгIвбахауа – акъвбинаква, йхпахауа – ЙынджьыгьчкIвын ргвып. АхIвссаква рквтала йапхъахауа агыларта Къвбина йыркIытI, йгIвбахауа – Грушка ргвып, йхпахауа – ЙынджьыгьчкIвын йауаз агIвгвыпкI йагIвыршатI. АпхъагылагIвчва артшхъвагаква, ахча согIатква, согIата аволейбол топква рнапIыцIарцIатI.

Абари йапшу анкъвакъвраква запытла йакIвшаланыс хIайгвгъитI. Ауат абзазагIвчва рсабап ду рылапI, йалкIгIата чкIвынргIа, – рызгIвадара ахъазлагьи, рбзазара чIвырхъаква багъьаханыс ахъазлагьи.

Джьандар Залина,
«Абаза Къраль» сайт йазалхпI.

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki