Library

05.08.2012
Адуней апны йбергьльыпI арат ймадзу апхъанчIви уыхвараква. Ажва «дамра» кельт бызшвала «хIахъв айшва» – хIва йгIаныцIитI. Йшщаквдыргылызла, ауат апхъанчIви гIамтапхьадзарала асквшква 2400-1400 рагIан йыруыхватI. Рархитектурала хвхIахъв къьакъьакI йнадзитI, бльын хIисапта апщхъатакIла йгылу ахIахъвква рхъахь йхвбахауа акв шаквырцIауа апшта йаквпI. Апахьла йдучвам кIынхIара гьажьы артуан, ауи шхънагIвуш апшта хIахъвыкI апырарцIун.

Адамраква нышвынтарата акIвын йшдыргылуаз. Рщарда Лагъь Африка, Европа амараташварташтаква, алагъьштаква, агIвадахьштаква рпны йаъапI. ЗымгIва рацкIыс адуней апны йбергьльу адамра гвып, «Стоунхедж» – хIва йызхьзу, Великобритания апны акIвпI йъагылу. Адамраква КIавкIаз амараташварташтаква рпны урынйитI, Апсны апынгьи йаъапI.

Апсны апны адамраква рпхьадзара швбжакI аъара йнадзитI. Ауат рщарда КIавкIаз ащхъа дуква рщапIква рпны абнаква йрылагылапI. Зны гвып дута, зны гвып хвыцта урынйитI, рпахьква амшын ахьыла йнархапI. Адамраква руацIа аджьаз йгIалху апхъыгIваква щардата йрыгIвнан, йрыхъву агврахIаква, агIва йгIалху акъама шIаква, йапшым арыпшдзага пкъыгIваква гIарауан.

ЗымгIва рацкIыс йпхатшу адамра Эшера кыт апны йгIараутI. Ужвы ауи Согъвым йтагылу ашта музей апны йаныргIалпI. АхIагIара гIвметркIи бжакIи (метр 2,5), аган хметркIи сантиметр гIважви жваби (метр 3,3), аура хметркIи сантиметр пщынгIважви хвби (метр 3,85) йнадзитI. Акв хIахъв ахIатлара тонн 12 гIаначакьитI.

Апсуа кыт Азанта апны КIавкIаз апны зымгIва рацкIыс йхIагIу адамра гылапI: ахIагIара хметркIи сантиметр гIвынгIважви (метр 3,4) йнадзитI. Ауи анышвынтара асквшышвква йгIарыцIсын бзита йгIащаквхатI.

КIавкIаз апны адамраква рунашва ангIаджвыквырцIа анаукаква рпаштыхIыгIва академия академик Паллас Петр Симон гвы анрит амщтахь акIвпI. Апсны апны апхьахьаква й-ХХ-хауа асквшышв агIан акIвпI адамраква андырхъвых. АпхъанчIви заман йпсуаз агIвычIвгIвыс йхъвади амшв ачва акIвдыршунта аныхахIварта апны йгIайуаз цIлакI акъвадама йкIнырхIун. СквшыкI анахъыцIра ауи йбыгIвшыгIвква ахIахъв нышвынтара йтарцIахуан. Йара ауаъа апсы ахрат апны йыхъвушта йырпхьадзуз апкъыгIваквагьи йыцхъарцIун. АпхъанчIви гIвыраква йшгIадырбауала, аныхахIвартаква рынкъвгагIвчва рпсыгIа гIадзазшва йанырбара дара-дара адамраква йырталхуан. Апсы ахратла йгIваннадасра ацIас апсуаква й-ХVII-хауа асквшышвдза йынкъвыргун.

Даташагьи йузыджьамщауата йаъу, арат ауыхвара дуква ъагылуи йызларчпуз ахIахъвква ъагIацIырхуази километр 25-30 рызбжьапI. ХIахъвипхьадза ахIатлара рахIа йанмачIу жватоннкI йнадзитI, рыцIа йхIатлакву тонн 50 йнаднацалуата йырчакьитI. РыцIа йпхатшу дамразаджвыкI ахIатлара гIаупхьадзарыквын тонн 110 йахънацитI. Архъвыхраква йшгIадырбауала, адамраква андыргылуаз азаман аугIа жвлара цIасла йацацхърагIауа йбзазун. Ауыхвара шIыц апны аугIа рацацхърагIара ацIас Апсны апны уыжвгIандзарагьи йынкъвыргаркIвитI.

Квициниа Асида
«Абаза Къраль» сайт йазалхпI

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki