Library

13 июля 2012
Ауи абзазарагьи гIашитI, агIвычIвгIвыс гвы зйымтуа алахъвгIахъасра джьащахъваквала йалапI. Уыла хъызхуа аугIахъа фашаквала йгIвычу атаца пшдзаква, йкъапщчIвгъьычIвгъьу акIарма, амара нурква йцрыцыруа йгIазткIкIгIауа асы, зылаква амара йгIанахвуазшва саби-саби йцIзыркIуа апхIвыспа чкIвын – ажвакIта йухIвушызтын, угвы гIащтIызхуа алахъвгIахъасра гIальаматква зымгIва урынйитI араъа. ЙгьмачIым абарат йрапшу суратта Швотыкъ Адальби йхъихыз. Ауи йынхараква нцIра абгакI йырпсапI – абаза угIахъа ркультури рансимш бзазари асуратква ракIвызтынгьи, атурых анапаква гIазырбауа асуратква ракIвызтынгьи.

АтгIачва рпны Адальби йащахIба МухIарби йакIвпI апхъапхъа асуратхъыхра хъатазкIыз. Адальби апхьарта дыцIаркIвата ауи ари ауыс гIайшIикIгIатI. Апхъапхъадза йхъихыз дзыгIвнагIадзынгылыз Дарыкъвакт йтагылу йаба йтдзы асурат акIвпI.

Араса далагатI Швотыкъ Адальби асуратхъыхра. УадыргIвана апхьара джвыквын, аррагьи къвырльыкъв йхатI. Ауи амщтахь йынцIра шабгу бзи йбауа ауыс йазынайырхатI. Апхъапхъа заводкI апны дынхун, уадыргIвана «Абазашта» газет аредакция далаган уахьчIва йъагIадзазгьи йгвы аквкIта дынхитI.

Щардала йгIайгвалашвахитI Адальби аредакция апны йапхъахауа ачIвырхъаква аничпуз агIамта – агвып рпны гIвычIвгIвысыгIарата, бзирата дзынйаз, бжьагажва гвыбзыгъа щарда шгIаршIикIгIаз. Йапхъахауата агазет анапа йгIаквшваз асуратгьи йдырхитI – йцри кыт йауу апхIвыс тракторист лсурат.

ЙцIайымкIуата йхIвитI асуратхъыхга агIвыга йгIатпшуа абзазара нцIра шIыцта йшйылайхIвауа, араъа йаразаджвыкI гвы зитуа алахъвгIахъасраква шгIанижьуа, атурых йшгIалайыжьуа, йгвгьи йпсгьи йшгIарылахауа. Ауи ахIатырла йхъихыз асуратква рыуа закIгьи гьйызгIалкIгIум, зымгIвагьи дасу ртурых рымапI, рыуа запшызлакIгьи гвыхътыла йгIанйыршаз нхарапI. ЦIабыргыта, кIьыдата дырзыъапI йан длыцхъагылата йхъыху асурати данхвыцыз йаба дйыцхъагылата йащахIба МухIарби йхъихыз асурати.

Абари апш ршIыйара уыс уаналу заманкI гIаншитI угвы йту аугIа йрыцагIвушаныс гIаутахъхауата. Асквш 2009 агIан йсуратква ргIарбарта йапхъахауата йакIвйыршатI, дахIвра дула. Ужвы йгIвбахауа агIарбарта адигалитI – рыцIа йнардзата, чIащыгIварагьи алата.

Йсуратква уанырпшуа датша дуней шIыцкI уыквшвауазшва йубитI: араъа ащхъа дзыгIвква аквтштшитI, ахIврапшдзаква гвлахIарата йкъагIитI, угвы гIащтIырхуа чкIвынргIа гIахIвитI, аугIа рансимшбзазара гIальаматра щарда алата датша хъатала уыла йгIацIалитI. Йджьауымщушта йгьаъам асуратхъыхга агIвыга йгIатпшуа ари абзазара лашара!

Адальби йчкIвынхъа гIайгвалашвахуата йгвтаракIгьи гIахъитIитI –уахьчIва дызланхауа ауыжвгIанчIви ъамапсымаква йрыхъарата пещ лащцаракI тшыгIвнайкIныс, апхъала апшта асуратчпара йазалху адзква алайцIата закI-гIвба сурат йара-йара ашвъабгъьы апны йгIатирышвтныс…

Адальби йуыс дазъазапI, абзазара архъвыхра щардагьи дгIарыцIстI. Мурад пшдза щарда йымапI. Анчва йгIайыдайрыхIвыргIатI ауат! Апхъахьылагьи аугIа щарда йыргвыргъьаргIатI йсуратхъыхга агIвыга йгIатпшуа абзазара алахъвгIахъасра джьащахъваквала!

Швотыкъ Адальби йсуратква ральбом

Ешерова Муъминат
«Абаза къраль» сайт йазалхпI

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki