Абаза алфавит ахIарыфква зъара йнадзауайа?

Асквш 2014 ацIыхъва арыпхьарали культурали Абаза район ахъвшара анхагIвчва аквтанай апхьартаква рапхьагIвчва рквтала анкъвакъвра джвыквырцIатI. Анкъвакъвра ззынархаз абаза уагIахъа турыхи ауагIахъа культури руысла здырраква рыцIа йагъьу чкIвынргIа ргIарыбергьыльра акIвын. Ауатыкв зунашва таз атемаква йрыуан абарыгьи: «Абаза гIвыра агIаныршара». Ауи атема йадынхалуаз чкIвынргIа азцIгIаракI аджьауап кьангьаш гIарыланацIатI. АзцIгIара аджьауапква гьаквымшвузтI: азджьара хIарыф 67 гIарбан, датша зджьара – 68, йхызджьартахуз апны – 69 йа 74 ауасамцара.


ЙгIахIхIыргвалашвахпI: асквш 1932 агIан абазаква рыхъазла латин хIарыф щата амата уагIахъа алфавит гIандыршатI. Цысквша рымщтахь, асквш 1938 агIан, ари алфавит урышв хIарыф щата арттI. Ауи алфавит акIвпI уахьчIва йъагIадзазгьи йгIахIрысабапуа.

Апрофессор ЧкIала ПI.К. йынхараква рпны щардала Россия йтабзазауа абазаква гIвыра ъарауыз амагIны йгватра азынайырхитI: «…Ауи абаза уагIахъа культура атшауыцIхра апны йхъаду гIаншарапI. Ари агIаншара йапщылапI уагIахъа журналистика зыргвышхвауа агазеткви ажурналкви ргIацIщтра, арадиуа йгьи ателебара рынхара. ГIвыра зму ауагIахъа агIахIвахраква, ахабаргIвыраква, ароманква гIандыршитI; адрама жанр ршIыйара уагIахъа театр агIаныршара йацхърагIитI, ауысара атшауацIыхра ауагIахъа эстрада ршIыйара йагIалцIырта бзипI. ГIвыра ангIаншара ауагIахъа йгIарылцIитI зцри бызшва ауысла наука-рхъвыхра акIвзыршауа абызшвадырыгIвчвагьи».

Латин графикала абаза алфавит йадынхалыз ауагIа рарыпхьагIв Тобыль Тольыстан йакIвпI. Абар абаза бызшвала асквш 1933 агIан йгIацIцIыз Тобыль Тольыстан йапхьага «Аграмматики агIвыща тамами» йану алфавит шаъу.

Араъа йубитI алфавит ахIарыфква рпхьадзара 52 йшнадзауа. Ауаса йащтагIайуаз асквшква руацIа ауи адынхалра мгIвайсуазарын, йшпакIву ухIварыквын алфавит кириллица щата анартуаз асквш 1938 агIан ахIарыфква рпхьадзара 69 йнадзатI. Алфавит урышв хIарыф щата атра йадынхалуаз апрофессор Сердюченко Г.П. йакIвын. Ауи йрыхIазырыз алфавит квпшыра «Черкес къапщ» газет анапа йгIаквшватI.

Урышв графикала йаныргIалу абаза алфавит ахIарыфква рпхьадзара 69 йахъысын 70 йнадзатI – ауи йалалтI алатин хIарыф ду «И» йашIырпшу азнак «I». Йшаъула, йащтагIайуаз асквшква руацIа абызшвадырыгIвчвагьи апхьагаква равторквагьи абаза алфавит ауыс йызнымкIва йаквгIацапахтI, йшпакIву ухIварыквын аквпшыра, ахIарыфква рпхьадзара тшырпсахуа йгIамгIвайстI: асквш 1967 агIан Москва йгIацIцIыз «Абаза-урышв ажвар» апны йану алфавит ахIарыфква 71 йнадзитI, асквш 1992 агIан Тобыль Нурйа йгIацIылщтыз «Абаза бызшва аорфография ажвар» анапаква йырну алфавит хIарыф 67 гIанарбитI, Джьандар АхIмад дыздынхалыз «Урышв-абаза айчважвага» (асквш 1991 йгIацIцIтI) апны алфавит хIарыф 68 йнадзитI.

ЙцIыхъвахауа асквшква руацIа ари ауыс ауатыкв йатагIаталхтI. ЙашвхIауысгIвугьи аквтанай апхьартаква рыхъазла апхьагаква ргIаршIыцхра, ргIацIщтхра акIвпI. Арыпхьарали наукали Къарча-Черкес республика йахъвшару арыпхьара-методика совет йалакву гвы шартызла, йапшым апхьагаква рпны абаза алфавит аъаща гьаквшвум, ахIарыфква рпхьадзара агIвыситI. Абызшва атеория нархарала абызшвадырыгIвчва ари ауыс ужвыгьи йалачважвуштI. Ауаса практика нархарала йгIауахвырквын абаза текстква рпны хIзынйауа ахIарыфква зымгIва – йзнак кIьыдазтынгьи, йцхърагIагазтынгьи – алфавит йалазара атахъыпI. Ауи апш хъвыцща йацикIитI ари агIвыра авторгьи. Араса йгIахIахвырквын абаза алфавит ахIарыфква рпхьадзара 72 йнадзитI, аквпшырагьи араса йцитI.

ХIасарокъва Бильаль,

«Абаза Къраль» сайт йазалхпI

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki