Абаза ажважвква

Абаза уагIа апхъанчIви заман йгIашIарышвта Ажва хвы аквырцIун, амагIны шдуу рылархIвун. АуагIа йрылархIвун Ажва анцIару, йанцIолу, йанхъагIу, йанамщу, йанбаху, йанкIынхIару… «Ажва ауатыкв йгIаталтI», – рхIвун абазаква ауи псы ахъарцIауата. «Ажва уырчIварыквын йчIвитI, йуыргылырквын йгылитI», – рхIвун ауагIа ауи йацарпа, йгIаурыхъва йшауа гIалыркIгIауата. «Ажва хъгIа ажв ахьитI», – рхIвун ажва анхъагIу алшара шдуу гIадырбауата, йарауи дрыбагъьун датша ажважвкI апынгьи: «Ажва хъгIа ащтанчIв агIвара йгIатнадитI». АуагIа ажва чвгьи ажва айши гвауарата йрылугьи гIаргвынгIвуан: «Ажва чвгьа ахы ацкIыс йсачIуачIитI».

Ажва псы ахъарцIауата ауагIа йрылархIвун ауи амагIны аныдзуагьи, йанкIынхIарахауагьи, йъатахъугьи йъатахъымгьи йангIадрысабапуа йшайшахауа. «Ажва щардала йукъакърыквын афгIвы хIитI», – рхIвун ауипхьадза. Абазаква йшырпхьадзузла, ажва зынгьи йгьпсуам, анцIралагьи йпсыпынкъвгауа йгIамгIвайситI. Ауи ахъвыцра йгIанарбитI абари ажважв: «Хъата псрыгьи ажва гьпсуам». Ари ажважв азахвара йаквшахIатугьи ари акIвпI: жвабапхьадзара, швкIпхьадзара, зкьпхьадзара йнадзауата ажважвква сквшышвпхьадзарала ауагIа ршIалахIвара йалата йгIамгIвайситI.

Ажважвква рпны йгIарбапI ауагIа йдырхъвыхуаз агIаншараква мшыркъвара, лакъырд турасы йтадыргылуа йшрылачважвуз. Абар швапхаквакI:

«АквтIу шырдза апхызпI»;
«Ала бгIвыла уасырквын йгьахьуам»;
«Аквыджьма зуаса зчвагуш йхъылпала дадыритI»;
«Ацгвы йабхIвуазшва атаца йлыргIа»;
«Уахъынла йугвапхаз апхIвыспа тшынлата зны уылпшых».

Ажважвква рбыжьгаща амакъымгьи амагIны гватрадъа йгIаныжь йгьауашым. Ажва ахъазла: «АхIвыча тлача рхчума?»  Абжьы «ч» акIвпI ажванахъа  макъым ацIазшва йаквзырпшуа. Ауысара апны ауи «аллитерация» – хIва йапхьитI. Абар ужвыгьи ауи йашIырпшу швапхакI: «Ачрын йчара йчгара гьарыдзуам». Абжьы «гв» йгIаннаршауа аллитерация швапхагьи аъапI: «Гвла гвымха айгвас дуымкIын».

Ужвы йгIахIырбауа ашвапхаква рпны абжьы аквшвара йахъазымкIва ажважв ауацIа рифмагьи гIаншитI:

«Йызмайдзауа лабайдза йыквшвитI»;
«Аба алаба дагIвызапI;
«Агвла агвы дагIвызапI».

ЙцIыхъвахауа агIвшвапхакI рмакъым ъаквшвауа йахъазымкIва ауагIа рхъвыцща цIола абайарагьи гIадырбитI. ЙащтагIайуа ашвапха йшабгу уыса аъаща йтагылапI – йащтацауа ахажвакIгьи рифма гIандыршитI: «АпхIвыси ауыси гьагIвысуам».

Абаза уагIа рхъвыцща апшдзара нахвата йгIарбапI абари ашвапха апны:

«Агвы кIахIарквын атшы гьыгIвхуам».

Ари ажважв йгIанарбауа ауагIа ргвыбзыгъара швабыж йцIолапI: агIвычIвгIвыс йгвы анкIахIара дызквчIву атшгьи ауи адыритIта агвхахIвара ыдзитI. Абар шIырпшыра злу датша швапхакIгьи: «АзальмагIа акIыкIах йчватI».

АгIвычIвгIвыс йакъыль анайшысу ауагIа араса йырхIвитI: «Йакъыль ашвхъымса йгьахъысуам». Зынла хIгватра азынахIырхапI ажваква рифма квпшыра йтагылата йшаквшвауагьи: ашвхъымса йгьахъысуам.

Абзазара апны ауагIа рырхъвыхраква ажважвта йшгIанхаз хIаквчважвахьатI. Абар ауи йаквшахIату уызгIвымсхыз ажважвква:

«Гвы зрымтыз тширамхIвитI»;
«АламаскIьа лацIарсыгьыгIвпI»;
«Акъварт ъацалакIгьи аквтIагъьква йрызгIайхитI»;
«Абжалага йыжвырквын длагадзахитI»;
«Ала йачвшвауа йылаквала дадыритI»;

«Аквыджьма йафуа ачвала йашвахитI».

Абаза ажважвква зымгIва рацкIыс хъгалра зларыму ауагIа руасаражвра акIвпI. Ныбыжьта уызтагылазлакIгьи йджьауымщушта йгьаъам ажважвква йгIадырбауа ауагIа ргвыбзыгъара, ракъыльпшгIара, рхъвыцща ацIолара:

«Агвыр згъычуа ачвгьи йгъычпI»;
«Ажв ащапIы ахIвыс гьащуам»;
«Ан лхIакъ гьузышвушым, аквтIагъь унапIсаргвыцIа йыквурыдзыргьи»;
«Апсра ацкIыс апхащара хъара уачвгыл»;
«АхъацIа йща ацкIыс йыладз рыцIа йтлапIапI»;
«Абзибара аджьаль йагIвызапI»;
«Аджьаль ъазагIва гьамам»;
«Алага ухъылпа йытта уйыгIвс»;
«Атшада чIвгIвапшгIара йджвыквлын алымхIаква пкъыта йгIайхтI»: йгIаныцIуа ари акIвпI – йуыму агъь уазыпшгIауа уджвыквлырквын закIгьи уымадзахымкIва угIанхарныс закIы гьазхIвам;

«Йъампсуа сцитI», – лхIван йшбзу йъацIарцIуз дцатI».

Абаратква зымгIва швабыж йджьащахъвапI! ЙшпаквуымцIуш абари йапшу ауагIа ршIалахIвара йаквнагауа апIатIу ду?!

ЧкIала ПIитIа,
«Абаза Къраль» сайт йазалхпI

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki