Абаза бызшва афразеология йапхъахауа архъвыхыгIв

Асквш шIыц агIаталымта щардагIвы йнардасыз асквш йазхъвыцхитI, ргвы рыцIа йгIатахаз, щта пшдза гIанызжьыз агIаншараква, анйараква гIаргвалашвахитI. Сара ауи апшта сгвы йгIатахаз агIаншараква йрыуапI ауагIа рарыпхьагIв Тобыль Тольыстан йхъыцIыз асквш 135 йадахIвуата йакIвшаз адуней наука-практика конференция. Абаза бызшви алитератури абгата йырзынархаз ари аконференция амагIны кIьыдата уаквчважвушта йаъапI. Ауаса датшагьи ауи амагIны рыцIа йщтIызхуа абаза уагIахъа ртурых апны анцIрала зыхьыз гIалазжьыз агIвычIвгIвыс ду йюбилей йъазынархаз акIвпI. Тольыстан Закьарыйа йпа дшапхьахьу гIазырбауа хцIаракIгьи йыхьыз йгьацхъагыламызтI, ауаса ауи йыщтала йынхауа йгIадзынгылта абаза уагIахъа йгIарылцIыз апхьахьа-бызшвадырыгIвчва гIальаматква щардагIвыпI. Ауат дрыуапI аконференция зрыхIазырыз, йакIвзыршаз адгалагIв комитет аунашвачпагIв, апрофессор ПIаз Сергей. ПIаз Сергей Умар йпа КIавкIаз бызшвадырра апны зыхьыз бергьльу дапхьахьапI, дбызшвадырыгIв-фразеологпI, абаза бызшва афразеология йапхъахауата дархъвыхыгIвпI, йхIаракIу апхьарта арыпхьара цхърагIагаква, бызшвадырра нархараквакIла апрограммаква дыравторпI, абаза бызшва арыпхьарала акъральыгIва стандарт дагIаныршагIвыпI.

Апрофессор ТIыгв Владимир агIвыра «ПIаз Сергей: апхьахьа йгIадзынгылра» апны йшихIвауала, ауи йнаука нхара асквш 1978 агIан йджвыквицIатI. Ауи агIан «ахIба пшдзата, арыпхьагIвта йыдзхъагылаз апрофессор Кълыч Рауф йбжьагажвала абаза бызшва анаука рхъвыхра уысква дрыдынхалырныс мурад йкIын Грузия ССР анаукаква р-Академия аспирантура дыцIалра ахъазла экзамен шикIуашла ахIвара швъа йгIвытI». Йдиссертация дапхьаркIвауата йнайырдзан нхара Къарча-Черкес къральыгIва педагогика институт апны дгIацапахтI. УахьчIва Сергей Умар йпа анаука, арыпхьара йгьи ажвлара уысква джьгарта дрылапI. Асквш 1992 агIан ауи Къарча-Черкес къральыгIва педагогика институт (ужвы – Алиев У.Д. йыхьыз зхъу Къарча-Черкес къральыгIва университет) апны наука-рхъвыхра нхарала апроректор йъанатIа гIайыхъвдаквырцIатI, уахьчIва йъагIадзазгьи араъа йакIвшауа анаука-рхъвыхра уысква ргIаджвыквцIара, радгалра, ракIвыршара йнардзата унашва рхъицIитI, ауниверситет апны йщаквгылыз ацIасква нкъвигитI, цIас шIыц щардагьи гIанйыршитI.

Ауи йырхъвыхра агIарбараква рбзирала йапхъахауата фразеология акурс абгата йхIаракIу апхьарта апрограмма йалалтI; ауат агIарбараква йрылшарата ужвы аквтанай апхьарта апынгьи апхьагIвчва абаза фразеология ахъвква тшрыхадыргIвазитI. Анхараква «Абаза бызшва афразеология» (асквш 1994) йгьи «Абаза бызшва афразеология ажвар» (асквш 1994) арыпхьарала Россия Федерация а-Министерства агриф рыквта йхIаракIу апхьартаква рстудентква йырзалху арыпхьара цхърагIагата йгIацIцIтI.

ПIаз Сергей апсуа-адыгьа бызшваква рфразеология йгьи рфразеография рщаквгылра, ртшауацIыхра йкъару ду алайцIатI, йырхъвыхраква рпны абаза фразеологизмква рылкIгIараква злаквшвауагьи йызлагIвысуагьи йзыгIарбатI, абаза, апсуа, адыгьа бызшваква рпны афразеология гIаншараква ашIйырпшытI.

Ауи наука нхарата, арыпхьара-методика нхарата 130 райхIа дыравторпI. Ауат анхараква йрылапхьадзапI амонографияква, апхьагаква, йхIаракIу йгьи аквтанай апхьартаква рыхъазла аметодика цхърагIагаква. ПIаз Сергей йредакция йгIацIста йгIацIцIыз амонографияква, ажварква, анаука конференциякви анаука нхаракви разкIкIраква рпхьадзара 40 йайхIапI. Ужвы азаман апхьахьа абаза бызшвадырра апны цIолата йырхъвыхчIву абаза бызшва асинтаксис ауысква дрыдынхалитI, йалачпу анаука программа «Цри бызшвали алитературали арыпхьагIвчва ррыхIазырра, арыпхьара-методика уысквала радгалра» унашва ахъицIитI. Ауи апрограмма Арыпхьарала Россия Академия а-ГIвадахь хъвшара ауыс хъадаква рплан йаланакIитI.

ПIаз Сергей Умар йпа – абаза алфавити аорфографии рагъьчIвра ауысла а-Комиссия, наукали арыпхьарали Къарча-Черкес республика а-Министерства апны йгIаныршу Арыпхьара-методика совет йгьи абаза бызшва ауысла апрограмма гвып друнашвачпагIвпI.

ХIасарокъва Бильаль

«Абаза Къраль» сайт йазалхпI

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki