Абаза литература амчбыжь

ЙшцIасхаз апшта, Байрамыкъва Халимат лыхьыз зхъу Къарча-Черкес къральыгIва библиотека анхагIвчва асквш шIыц ашта уагIахъа литератураква рымызла йгIахъыртIытI. Йара ауи ацIасла, ари амыз йапхъахауа амчбыжь абаза литератури акультури йырзынархапI. Арат амшква абиблиотека апны абаза авторква ркнигаква ргIарбарта акIвшитI. АгIарбарта апны урынйитI йагIвсыз асквшышв асквш 30-ква рагIан латин графикала апхъапхъадза йгIацIцIкваз акнигаквагьи йцIыхъвахауа асквшква ауат йызларылахIаз азкIкIраквагьи.

Январ а 20 атшын абиблиотека апны абаза литература ахъвлапын акIвшатI. Абари йапшу анйараква абиблиотека анхагIвчва нархара щардала йадыргалитI: абаза литература атурыхгьи йгIаквчважвитI, кIьыдата агIвгIвква рыршIыйарагьи гIалыркIгIитI. Ари ахъвлапын адызгалуаз Щбзыхва Заремагьи ацIас ацIыхъвадза йналырдзатI. Ахъвлапын йапхъахауа ахъвы ззынархаз ари акIвын: абаза гIвгIвчва рыршIыйара апны ауагIахъа цIасква рынкъвгара шгIадырбаз. Къарча-Черкес республика ауагIа уысагIв Щбзыхва Лариса агIвгIвчва ЧвзыкIьа ШахIамби, Джьгватан Къали, ТхIайцIыхв Бемырза, датшагьи ргIвыраква рпны ари анархара шгIадырбаз джьащахъвата даквчважватI,   чкIвынргIа рбжьара апны ауат рмагIны гIалылкIгIатI.

ГвасрапI, ауаса абаза литература аклассикква ргIвыра щарда къытхатI, апхьагIвчва майрата йгIарнапIыцIашварныс гьрылшахуам. Ауи ахIатырла абаза-апсуа этнос атшауацIыхра цхърагIара знархару а-Дуней адкIылара «Алашара» ужвы абаза литература апны рыцIа йагъьу агIвыраква шIыц-шIыц ргIацIщтхра йазалху апрограмма абзазара йаларжьитI. ЙагIвсыз асквш апны «Алашара» адкIылара рцхърагIарала Мыхц Кьарим йгIвыраква разкIкIра йхпахауа атом гIацIцIтI. Арат амшква руацIа абаза бызшвала йапхъахауата йгIаншаз Тобыль ИсмагIиль йроман «Азамат» йгьи Тобыль Тольыстани Шакърыл Константини йадыркIылыз абаза локIква разкIкIра гIацIцIуашта хIйгвыгъитI. АгIаджвыквцIараква руыс йауацIыхта дгIаквчважватI культура ауысла «Алашара» адкIылара аунашвачпагIв Мыква Мурат.

Ахъвлапын йгIвбахауа ахъвы Мыхц Кьарим йыршIыйара йазынархан. Афилология наукаква ркандидат Дзыба ГIайщат лгIачважвара апны ауи дыздынхалуаз атIакIра уыс йауацIыхта йгIалрахатI. Ашвапхакваламцара атакIра уыс апны Кьарим йынхаща алкIгIараква дгIарыквчважватI, агIвыма бызшва текстква абаза бызшвала ргIвыхра апны ъазара ду шйылаз гIалырбатI. Кьарим йара йуысаквагьи урышв бызшвала йатайкIуан. Ауи дахIвра дула йшизахъвдаквыцIуаз абард ХIасарокъва Бильаль йгIайхIваз ауарад аквшахIатхатI. Ауи Кьарим урышв бызшвала йатакIыз ауыса «СыйачIва сгьазынамдзатI…» йазыгIанйыршаз амакъым абаза бызшвала йуыса йшаъадзаз апшта псахракIгьи аламкIва йаквшватI. АтакIыгIв йынхара анадзара шхIагIу акIвпI ари ашвапха зквшахIату.

Мыхц Кьарим йбзазара йцIыхъвахауа асквшква рагIан абаза гIвгIвчва руысаква урышв бызшвала йатайкIуа далагатI. Ауи йбзирала абаза уысара урышв бызшвала апхьагIвчва швабыж йшырзаргванхушыз кьангьаш гьаламызтI. Ауаса ари агIаджвыквцIара абзазара йалайыжьра ахъазла йпхыцIа йгIайнатыз агIамта швабыж йайшысын.

Анйара апны Мыхц Кьарим дыздыруаз асасчвагьи ргIагвалашвахраква хIыцагIвыршатI. ЙгIачважваз йрыуапI «Абаза» жвлара аунашвачпагIв йтарагылагIв Чагва Щорс, акъарча гIвгIвы Салпагарова Кулина, «Абазгьква» журнал аредактор ПIаз Роза.

Арат асатырква равторгьи ажва гIасыртатI. Сара абаза газет аредакция апны пщысквша руацIа Кьарим сйыцынхатI, ателебара студия ахьыла нхара санайтыпах йадызгалуаз атраква йызнымкIва дырфырхатI. Агазет аредакция апны ауи йыршIыйара нхащала дшвапхан: бзагIвразтынгьи йа асурат йацIайыргылуа ажванахъакIызтынгьи ауат журналистика шедевр рквпшырахауата ажва пшдзакI йызгIауан. Йуысара йапшдзата йпублицистикагьи хIыбызшва абайари апшдзари йзыгIарбауата дадынхалуан. Дызлаз ателебара атраква апшыгIвчва йыргвапхауата зынла ргватра рзынадырхун. Абзазари аршIыйари йырзынархаз йхъвыцраква, гвыхътIыла йхъа дъагIаквчважвуз апшыгIвчва швабыж йрымаджьащахъван. Абаза уагIахъа рылахь ахъазла джьауапкIра ду йылайхIвауата дгIачважвун, йажва амагIны цIолан, йауацIыхын.

Айнара йалакваз – ауат рщардагIв апхьартаква йрапхьагIвчва ахIбан – йгватшныта агIачважвараква йрыздзыргIвуан. АгIачважвараква йрыуата ауат йрыларкIыз шмачIым ажва гьалам.

«Абазашта» газет аредактор хъада Къвыл Фардауыс, культура ауысла агазет ахъвшара аредактор Джьардис Асйат йгьи Мыхц Кьарим йпхIа Олеся гIачважвауата абари йапшу анйараква, ахъвлапынква магIныта йрыму гIадрахатI, ахъвлапын адгалагIвчва, Черкесск къала йагIбахауа йгьи йжвбахауа апхьартаква рарыпхьагIвчва КIыкI Фатйи Апса Лиди разыра ажвала тшырзынадырхатI.

ЧкIала Георгий,

«Абаза Къраль» сайт йазалхпI

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki