Абаза уагIахъа рпхыцIа апны исльам ащта

Рабадучва р-Псадгьыл йачвыхъарахатI

Атурых швъаква ршахIатра йшгIанарбауала, асквшква 1860-1861 рагIан «Оттоман Порта апны хъыхчара анырмау, йзайгвыгъуз ахъахIари абзири йанрайжьа амщтахь» амигрантква рцриштала йгIацапахныс рмурадхатI. Асквш 1861 ауацIа амшын атшпыламцара Азербайджан чIвыла атланыкъвала йгIацапахныс йгIаджвыквлыз амхIаджьырква рпхьадзара агIынзыкьыгIв-жванзыкьыгIв йнадзитI. Ауаса араъа ауат унагIвагьи, млыквгьи, адгьылгьи гьрымахмызтI, апхъала йрымаз йапшвымахаз датша уагIан. КIавкIаз комитет йшырпхьадзузла, «Трыквшта йгIатыцIхта ахчагьи млыквгьи змахымкIва йгIацапахуаз ащхъабзазагIвчва руысла хъыхчара чпара атахъын, ауат агвыквсракви ахIвынчIаракви джвыквырцIаныс закIы гьазхIвамызтI», ауи ахIатырла амшынла йгIахъысхуаз амигрантква КIавкIаз апортква йрыдымсылуата ауаъа рбзазартаханыс ахъазла Дон тланыкъвала йа рыцIагьи йхъару Россия паштахIыгIва аштаква рахьыла  йырщтиуан. Адзтшпыла йгIамгIвайсквуз Баку апны йгIашIакIыта амшынла Астрахань йырганыс унашва аъан (1).

Ауаса тшытракI анахъыцI КIакIаз йауата Трыквшта йакъральыгIвхаз йрыуата Россия йгIацапахныс, ауи йакъральыгIвханыс йахIваквуз рхIатыр рымбахуата, ршвъаква ацадырпахланыс щаквыргылра нарахвтI. Константинополь йтаз Россия апаштахI йхIвачIвыгIвчва ауи ащаквыргылра архъйара ауысла ашвъаква Осман паштахIыгIва акъральква йыртанхуз адипломатква, аконсулква зымгIвагьи йырзырщтитI. ХвитнагIа зрымтуаз йрыуан рпаспортква йырныз апIатла анагIвсра йгIазырзахвауа швъа змамыз ауагIагьи. Ауат рыуа аджвырагIв мадза-мадза йгIахъысхта Россия йангIайхра рцришта йачвыхъару аштаква рахьыла анцIрала йтырганыс унашва рчпун. Рпаспортквагьи тамамта Трыквшта йакъральгIвымкIва зхъа зырзахвата йгIацапахуазгьи КIавкIаз апны адгьыли млыкви рымуи йрымами ауысла джьауап ддыркIуан.

ХвитнагIа гIазыртуаз ауагIа Россия йангIайхра ражва рызмырцIабыргуазтын апхъа йырбзазартаз ашта апны йшгIатарымжьуаш рархIвуан. Араса йанцарыз ауат йырбзазартахуз Оренбург чIвыла акIвын. ГвыгIвбара ангIаншарыз КIавкIаз апны авласт нкъвгагIвчва рджьауап радзанадзыкIьара Трыквшта йтакваз рахIвара архъйара йазпшуан.

Арахьарыла ащхъа уагIахъаква йгIаншауа ракъыль азымцауазшва йаъан. Ажва ахъазла, Ставрополь чIвыла амарагIацIцIырта тланыкъвала, Кизляр йачвыхъарамкIва йайтыпауа йбзазуз акъаранагIвайква Трыквштала йцахырныс згIартахъхаз ахIвансхIвангIвацаква рыхъазла акIвын. Ахабар шныкъвузла, атрыкв паштахIи аурышв паштахIи рангIалрала, амсылманква зымгIва Россия йтыцIта Трыквшта йцахырныс хвитнагIа рыман, рыуа заджвы дгIанымхауата амсымлманква зымгIвагьи атрыкв паштахI йылпха рауныс йазыгвжважвара атахъын. АхIвансхIванква рыцIагьи йацIазырсыгьуаз адиннкъвгагIвчва гьщардагIвымызтI, ауаса ацIабырг зымдыруаз ауагIа ауат разгIашыкъра йапшIагылта закIы рхIваныс рхъа йгьырзаквымцIузтI.

Атрыкв швъаква йшгIархIвауала, асквш 1864 агIан абазаква рпроцент 75 Осман чIвыла ахьыла йайтыпара атахъхатI. Ауи амщтахь рцришта (уыжвгIанчIви Къарча-Черкес) апны абазата йгIатахаз жванзыкьыгIв йгьрайхIамызтI. ХIшхъвыцуала, арат апхьадзараква ацIабырг гьгIадырбум, йшпакIву ухIварыквын Россия паштахIыгIва апынгьи Осман паштахIыгIва апынгьи амхIаджьырква рпхьадзара заджвгьи йгьынкъвйымцузтI. РыцIа йбагъьу ажвала йхIзыхIвуштI Лагъь КIавкIаз апны абазата йгIатахаз зъарагIвы йнадзуз – йгIважвахауа асквшышв аурала Россия Федерация абзазагIвчва рпхьадзара ахъыргIвылгIауа йгIамгIвайстI. Асквш 2010 агIан йакIвшаз ауагIа рахъгIвылгIара йшгIанарбазла, Лагъь КIавкIаз апны абазата уагIа 36919-гIв бзазитI. АгIвымакъральква рквтала абазаква рыцIа йъащардагIву Трыквшта апны акIвпI.

ЙгIважвахауа асквшышв аурала Трыкв Республика апны зпхьадзара мачIу ауагIахъаква руагIахъара мчыла йдрыдзуан. Аправительства йхътIу политиката йазакIу трыкв уагIахъа агIаныршара йащтан. Асквш 1932 агIан абызшва ауысла йлырхыз а-Хабза йшгIанахIвузла, апхьартаква рпны асабиква трыкв бызшва акIвымкIва датша бызшвакIлагьи йчважваныс йгьахвитмызтI. Аткъвымхьызква руысла а-Хабза апкъ йтата КIавкIаз ауагIахъаква йгIарылцIыз зымгIвагьи рткъвымхьызква рпсахра атахъын, атрыкв уагIахъа «мсылман масхIабла йадкIылу» уагIахъата акIвын йшырпхьадзуз. Акытква рыхьызква рпсахуан, «ХIкъральыгIв, трыкв бызшвала учважва!» – хIва йауацIыху агIаджвыквцIараква акIвшун. КIавкIаз апны йынкъвыргауа ахьызква зсабиква йрыхьызцIаныс зтахъыз анчва, абачва рхIаквым рхунта мчыла йддырпсахуан (3). ЙгIвбахуз адуней айсра амщтахь Трыквшта аполитика апны партия щарда щаквгылын акъраль ауацIа ауагIахъа культура адкIылараква гIандыршауа йалагатI. Ауаса Трыквшта апны зыбызшваква апшым ауагIа рпхьадзара гьырзыщаквмыргылтI – зальмагIарата акъраль ауацIа йынкъвыргуз йгIалцIла ауагIа рцри бызшва ауысла джьауап тамам артныс гьыртахъымызтI.

АуагIа щардагIвыта акъалаква йырталхуа йалагатI, аргваныта йзабамбауа йамцIнагатI, й-1980-хауа асквшква рпны йгIашIарышвта арадиуа, ателебара атраква щардахатI, чкIвынргIа апхьара йджвыквылтI – абаратква зымгIва ршвхIаусыгIвала чкIвынргIа рцри бызшвагьи руагIахъа культурагьи рчвыдзуа йалагатI. Акытква рбзазагIвчва ракIвын зцри бызшвагьи зцIасквагьи гIазхчуз. Акъалаква рбзазагIвчва трыкв бызшви трыкв культури рыцIа йраргванхатI.

УахьчIвала Осман паштахIыгIва йаланакIуаз акъральква (Трыквшта, Сирия, Йорданшта, Египет, датшагьи) рпны абазаква ртынхаква щардагIвыта йбзазитI. Ашвъаква йшгIадырбауала, йара Трыквшта абазата, апсуата уагIа зыкь 300-500-гIв табзазитI. Ауаса, апхъала йшхIхIваз апшта, ари апхьадзарагьи тамамдзата йгьщаквгылам. АгIарып къральква (Осман паштахIыгIва йачIвылакваз) рпны йгIважвизакIхауа асквшышв агIаталымта абазаква, адгьаква, апсуаква зкультура азакIу уагIахъа гвыпкIта тшадыркIылтI. Араса йгIаншатI, ажва ахъазла, Йорданшта апны – ауаъа адгьа-апсуа уагIахъаква рапхъанчIви культура рчвымдзныс ахъазла тшадыркIылын йгIакIвзыршауа ауагIахъаква тшрылырхтI, черкес жвларата тшырпхьадзан къабард бызшвала йчважвауа йалагатI. Уыжв азаман йгIадзынгылуа чкIвынргIа къабард бызшвагьи рыцIа-рыцIа йачвыхъарахитI, рансимш бзазара апны ащарда гIарып бызшва гIадрысабапитI.

Абазаква (атрыквква ауаса йрыпхьитI абазаквагьи апсуаквагьи) рщардагIв Трыквшта йъагIатахаз ахъазла кыт-кыт йчIватI, абаза кыткви апсуа кыткви тшаларымпсауата йкIьыдахатI. Ауыс шыгIдыруала, абазакви апсуакви рыцIа йщардагIвыта арат атрыкв штаква рбзазартахатI: Сакарья, Дюзже, Эскишехир, Самсун, Йозгат, Чорум, Токат, Адана, Сивас и Зонгулдак.  РыцIа йауацIыхта абаза жвлара ъабзазауа Кайсери апны акIвпI. Йшырпхьадзауала, абаза-апсуа жвла зму абзазагIвчва араъа жванзыкьыгIв раъара йнадзитI. Апсуаква рыцIа жвпIата йъабзазауа Трыкв амараташварта штаква рпны акIвпI (Измит, Адапазары, Дюздже, Болу, Бурса-Инегёль, Кютахья, Биледжик, Эскишехир), абазаква амарагIацIцIырта штаква ртланыкъвала йбзазитI (Биледжик, Эскишехир, Самсун, Амасья, Токат, Йозгат, Сивас, Кайсери, Адана) (4).

Россия йтабзазауа абазаква амхIаджьырра ауыс йшазаъу гьапшым. Къарча-Черкес абаза кытква рпны ауи ауыс анхIырхъвыхуаз ауагIа йауацIыхта джьауап артуан, адин ашвхIаусыгIвала амхIаджьыррагьи йалачважвун. Ажва ахъазла, Апсуа кыт абзазагIвкI (дхъацIапI, асквш 1964 дйытI) араса йхIватI: «АгIвычIвгIвара турых аурала хIуагIахъа агIвымаква рзарар гIарыквшвауамцара йгIамгIвайстI. Атрыквква рыхъазла хIара швабыж хIщаквыстI. Ауат ракIвымзарквын абазаква Россия йырпшIагылата йгьамайсуашызтI, ауи аъара щардагIвы гьыммхIаджьырхушызтI. ХIара бзита йыгIдыритI асквш 1862 агIан хIкыт абзазагIвчва райхIарагIв шымхIаджьырхаз, Трыквштала йшахъысхыз». Ага ауаса йаъазтынгьи, йара ауи ахъацIа йгIаликIгIитI «Трыквшта йцахыз абазаква апхъанчIви цIасква рыцIа йшырзыгIахчаз» (5). ХIара хIзачважвакваз абзазагIвчва йшырхIвауала, амхIаджьырква ртшадкIылра, радгылра йацхърагIатI динисльам анкъвгара. Ауаса аглобализация ашвхIаусыгIвала апсахра нашхыйаква гIаншитI, йгIадзынгылуа абанпараква рапхъанчIви цIасквагьи рцри бызшвагьи рчвыдзуа йалагатI.

Абаза жвлара атшауацIыхра аъащата йызтагылу хIырхъвыхырквын апхъахьыла адин амагIны рыцIагьи йшдухуш уылаухIвитI. Трыквшта ауыжвгIанчIви политика шаъула, акъраль абзазара апны амсылман дин агыларта рыцIа-рыцIа йбагъьахитI. Ауи ахIатырла, Россия йтабзазауа абазакви Трыквшта йтабзазауа абазакви разазаъащаква аргванхауа, тшауацIырхуа йымгIвайсуаштI, Россия абазаква рбзазара апынгьи адин агыларта багъьахауамцара амагIны щтIыцIуаштI.

АццIахра:
1. Асквш 1861 агIапын йгIашIарышвта асквш 1862 агIапындза КIавкIаз апны архъвква руысква шакIвшуз гIазырбауа ашвъа // КIавкIаз Археография Комиссия (АКАК) йадыркIылыз ашвъаква. 12 атом, 685 ан.
2. Arife Kabil. İşte Türkiye’nin dil haritası. Zaman, 17 Kasım 2013.
3. Кущба Ерол. Трыквшта апны КIавкIаз адиаспора // «КIавкIаз тдзы», 30.11.2011. http://intercircass.org/?p=412
4. Ferzan Firuze Sarpkaya. Abazaca ilk sınıf acıldı // http://1mart2003.com/makale/ferzan-firuze-sarpkaya/abazaca/935.html
5. Къарча-Черкес акытква рпны асоциология рхъвыхраква ргIарбараква, асквшква 2011-202012. Автор лархив йгIалхпI.

ЙащтагIайуаштI

Емельянова Надежда,
«Абаза Къраль» сайт йазалхпI

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki