Абазаква ртурых ашIалахIвара йшгIанарбауа

Ленинград апны йаныргIалыз СССР а-Академия Наук йаланакIуаз Институт Востоковедения йынхуз апрофессор Анатолий Нестерович Генко бызшва щарда йдыруан йгьи дрыдынхалуан. Ауат йрыуан ачеченква, аингушква, апсуаква, абазаква рыбызшваквагьи. Ауи йакIвпI йапхъахауата абаза бызшва йазынарху амонография згIвыз. Ауи йкнига «Абаза бызшва. ТIапIанта чважваща аграмматика» асквш 1934 май амыз далгатI, ауаса сквш 21 ауацIа йгIацIымцIуа йщтIан, асквш 1955 асхъан акIвпI адуней анаба. Йара А.Н. Генко 1930-хауа асквшква рцIыхъва къванчагIакIгьи йыквымкIва дыркIын асквш 1942 атутанакътара дтапсгвыщатI. 1929 йгьи 1933-хауа асквшква Анатолий Нестерович абаза бызшва дадынхалырныс ахъаз гIван Черкесия дгIайтI. Ауи абаза кытква дгIархъыкIвшун, ауагIа дрынйун, драчважвун, ауат йырхIвуз йара йлихыз латин хIарыфла йаницIун, уацIыхъван йанйыргIалуан, даквчважвун, урышв бызшвала йатайкIуан. Ауат райхIара шIалахIваран: локI, турых, ажважв, лакъырд уыса; йрылашвун ауат абзазара гIаншараквагьи. А.Н. Генко дыркIыта ахIапса дантапсы амщтахь ауи йгIайтынхаз йнапIлагIвыраква Ленинград (ужвы – Санкт-Петербург) къральыгIва аархив йкIашватI. СквшквакI рапхъала ауат апсуа шIалахIвара йадынхалуа апхьахьа Джапуа Зураб Джотович (ужвы ауи Апсны Академия Наук дапрезидентпI) дырхъанагатI…

Генко йгIвыраква гIальаматра щарда рпщылапI, ауи ахIатырла ауат бзи-бзи йалыргата йгIацIщтра атахъыпI. Ауаса ауи апхъала латин хIарыфла йаныргIалу анапIлагIвыраква уыжвгIанчIви абаза хIарыфла йахъгIвылгIахра атахъыпI. Ауи ауыс сырхъйарныс ахъазла Зураб Джотович аурышв апхьахьа йгIвыраква рксерокопия гIаситатI. Ауат уанрыдынхалуа джьащахъва щарда гIаушIашвитI. УахьчIва асквш 1929 Генко йаницIаз абазаква Апсны йгIатыцIта Алагъь Кавказ йшгIахъысыз атурых асайт «Абаза къраль» апхьагIвчва ахасыргIвазара стахъхатI.

Генко атурых гIайазхIвызгьи, йзапш кыту йъайархIвызгьи ашвъабгъьы йгьанйымцIатI, ауаса ауи агIвыра амагIны закIытагьи йгьалнардзгIум.

ТIапIанта ртурых

ХIкыт алыгажвква дрыуата рыцIа йдыруащта йаъаз ЦекъварагIа Лакъвман ТIапIанта ртурых йшихIвауа араса акIвб. Абаза бызшва зхIвауащта йаъаз зымгIвадзугьи алых амамкIва йъагIатыцIыз Мсыр акIвб, йызлагIатыцIыз йынгьлыз йшварала акIвб. Мсыр йангIатыцI, Апсны йгIайын Маркъвыл апсыхIва йгIатачIвад, ртыдзквагьи унаба зырхIвауа апшта йырчпад. УадыргIвана тшчва хынгIважвищти жвыхвыгIв йалырхын йгIауырщтд бзазартащта йгIарыхъвуш йазыпшгIарныс.

Апхъапхъа ПсхIвы йгIаталын пщымшкI йтан. УацIыхъван ащхъа йгIахъыцIын Тибардхъа йгIаталд. Ауаса Йындыщ, ХIадащ, Ашвырква зырхIваквауа адгьылквагьи йырпшыд. УацIыхъван ауаъа йгIатыцIын архъа йангIаквыл ужвы ари хIара хIхаквква зымгIва анагIвай йчIващта йгIарынйад. ЙангIарынйа, анагIвай йрачважвад: «ХIнашвахвуазтын, багъьара хIыдшвчпалуазтын, хIшвыцбзазуштI», – рхIван. АнагIвайгьи йгIарахвд, ныхагьи рзабархIвад. УацIыхъван хвитнагIа гIарыртад Уарп йгIанаркIыщта Бахсан апныдза йъартахъу адгьыл бзазартащта йъарыхъвуш йгIалырхырныс.

Йджвыквлын, йцауамцара Бахсангьи йахъысын Архват, Ардон, Уырды, ауат ахпа йрылапшын, хъапхьа кIыртата йрыхъвушшва йырбан Уырды гIалырхын, йгIахъынхIвыхын, йгIауызщтыз руагIахъа рпны йцахт. Йъанайхыз, йрархIвд йырбаз, йырчпаз, адгьылта йгIалырхызгьи. УацIыхъван йгIайззан, йалакьангьашын, ауи адгьылта йгIалырхыз апны йгIайырныс тукьаль йыззычпуз йгIахъыцIд, тукьаль йыззымчпузгьи ауаъа йгIанхад. Ужвы апсыуаква зырхIвауа, ауаъа йгIахъыцIырныс рымуата йгIанхаз ракIвб. Арахь арыла йгIахъыцIкваз райша йцан Уырды йтачIвад. Ауаса радгьыл йшаъаз ауи акIвын: дарартан, амгIваква гвымхан, йырчпарныс датша уагIа йгIаталбхIва йшвунта амгIваква йгьрымчпузд. РымгIва шIнагIаран, руандырква агIвчархкI йаъаращта йгьамуазд, руандырква йшаъаз ауи акIвын: ачархкI дуун, азакIы чкIвынын. Данцуз агIан ачарх ду алагъьла йацIайыргылуанта, ачкIвын агIвадала йацIайыргылуанта дцун. Даннадзарыз, йуандыр йгIахъынйырхIвуанщта, ачархквагьи йпсахуанщта: ачарх ду алагъьла йацIайыргылуан, ачкIвынгьи агIвадала йгIацIайыргылуанщта, кIара гIаницIунщта дгIайхуан. Ауасамцара сквшы хышв ауаъа йбзазад. УацIыхъван мшкIы лыгажвкI йуандыр йацIайхIван, йшвокьгьи аницIан абна дцад. Дъанайыз йчархква йамипсахырныс йхъаштлын, йшаъаз йаницIад. ДгIаджвыквылхырныс даналага йдырхыздхIва, закIгьи гьизазымхахт. УадыргIвана дгвыжвкIын, йшичпазлакIгьи акыт зтачIваз ахIагIарадза нас йгIайдын «ХIахIай!» – йхIван дгIацIрыд йгьи дгIахысд. «ЙгIанша ачIвыйа?» – рхIван, акыт йгIаджвылбаган йанпшы, дгIацIрын, ауаса гIайхIвад: «Уырды Уырдчы, Ло йпа цутача», – йхIван йуандыргьи йгIахъышвтын акыт рпныдза йгIатаблыгьад.

УацIыхъван Ло йпа Муса ауи швхIакIващта йбан йкыт йгIазидан унашва рчпад, ауаъа ауи амакьана йгIатыцIхырныс. Йалаган ачвква кIвдыр рзырчпад, апхIвысква асабиквагьи ачвква йгIарыквдырчIван анагIвай ргвы йгIалалын, Ашвкваквын Гвым йъагIалачIвауа йазгIайд. Ло йпа Мусагьи амгIва йшгIайуаз дпсыд, ауи йтаралагьи йпа Саральып ахIыщта дрызгIанхад. Ауаъа пщысквша йанбзаза, къабардргIагьи гIаншад. КъабардргIа йгIарыдсылуа, йгIарзарархуа йаналага, йалаган къала гIарыкIвдыршад. Ауаъа къабардргIагьи Ло йпа Саральып йханыгIва рхIвауа бжьапанпарадза йтабзазад. УацIыхъван ахIыщтагьи Ло йпа Мырзабакь дрымащта сквшыкI йцан Дзальыкъва йчвагъван шырдза йаквырпсад. АпIаха йаннадза агIан, уагIа йалырхын мхыпшра йырщтид. Йъанайыз рымхы йгIамйыщта, рчвагъварта йшквайчIваз йгIанхащта йырбад, ргвы йачвымыгъхан, йгIахъынхIвын, йгIайхын акыт йрархIвд: «Швымхы йыгьгIамйыд.

УзачIвызлакIгьи ухъа шуырбзазара, йъауырбзазара уащтаныкъва», – рхIван. УацIыхъван Ло йпа Мырзабакь ауаса райхIвд: «ХвыгIв хъачва уагIа бзикващта йгIасышвт, къвырманкIгьи гIасышвт», – йхIван, акыт уагIа бзикващта хвыгIвгьи, къвырманкIгьи йыртын йцад.

Рымх апны йъанайыз йшырхIваз апшта йырбад. Мырзабакь йара дуалыйын, далаган акъвырмангьи дйырщыд, йыгIвзачваквагьи найахвын амхы хын дгIакIвшад, алахI дйыхIвауамцара, зкьыр йхIвауамцара. УацIыхъван амшгьи йгIачвщхан, аквагьи гIайуашта хIагIаракI апны йыгIвзачваква йырцан, йтшыжвищтын ауаса унашва рзичпад: «Швара швуапIаква йшвхъашвырпащта, ажвгIванд ддыб, ац кшаб, аква гIакваб, йгIаншалакIгьи заджвгьи ухъа йхътIыщта угIампшын», – йхIван. ЙщтIалын шагIанцIакI йшихIваз апшта, аква швабыжта йгIаквад. Ашарпны йаннадза, «Швгылх», – йхIван, йангIайыргылх агIан амхгьи гIайын йхъхIван, апша йынкъвнагауа йырбад. Йджьарщан, йгвыргъьан, йгIатшыжвлын йгIайхд. ЙъагIайхыз акыт ауаса рархIвд: «Швымхы йшырхIваз йгьаъахым. УагIа швщтита йшвырпшы», – йанырхIва, апхъала йцаз ауагIаква йаталырххын йырщтихт. Йъанайыз амхы йауын, йырхра атахъыщта йырбад. УацIыхъван ласыщта йгIахъынхIвыхын, йгIадзахын, «Швымхы йауыд, йагIвсид», – рхIван акыт йанрархIв, йгвыргъьан, йтибаган, йцан амхы йырхыд.

Ауаъа къабардрагIагьи Ло йпа уарад йзыруысад абари апшта: «Локъва Мырзабакьыр жакIьа нкъватквыр Дзальыкъва мащари къдахвыр». [Ло йпа Мырзабакь жакIьа гвымха Дзальыкъва дцан йгIайыдахIвтI]. Ауи Ло йпа йзырхIвуз ауи акIвын: «Ауи аъарала дуалыйын, адзы йцуз анамазлыкъ йыквирышвуанщта даквгылащта намаз йчпун».

УадыргIвана ауи рымхы йгIацIаргахын ауи агъны ауи рфан агIапын йзызнайыз даргьи ауаъа йгIатыпахын Гвымлокт ужвы йъачIву мачIкI йрылагъьщта йгIачIвалхд. Ауаъа йтабзазад йсквш зкьищти гIашви гIважвищти жвизхуз апныдза. УадыргIвана даргьи щардагIвчвахан, йтамшвахуа йаналага, анагIвайква рпны йахIвахын, хвитнагIа гIарыртад ауаъа йнанаркIыта Уарпдза ари ащхъа ащапIыла йъартахъу йчIварныс. УацIыхъван йызтахъызгьи ауаъа йгIатахад, азджьакIгьи ауаъа йгIатыцIын Учкъвыл йгIайд, азджьакIыркIвахгьи Гваначкъыр зырхIвауа йцан йтачIвад, датшагьи ауи апшта йъартахъхаз йчIваквад.

УацIыхъван аурышвква Джьгваты астаница Учкъвыл йгIадырчIвалырныс йаналага, хIа хIчIвква ауаъа йгIатырщтхын, «Къвбина арыла угIарыщта швчIва» – хIва йангIарархIв, йгIарын рыбжагIв ауаъа йчIвад. Ауат йчIваз ужвыгьи йчIваб, Къвбиналокт зырхIвауа ауат ракIвб. Ауаъа ЛоргIа дрыуащта заджвы: «Сара адзы армапхьа йгIатасчвауащта араъа сгьчIвам», – йхIван дгIахъыцIын Йынджьыгь ЧкIвын дгатшпынчIвалд, ужвыгьи ауаъа Йынджьыгьлокт йтачIваб. Ауи йанбакIвыз ухIварыквын, асквш зкьищти гIашви хынгIважви закIы йантагылаз акIвб.

Асайт «Абаза къраль» ахъазла
ЧкIала ПIитIа

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki