Адуней агIаныршара Амш

ЙшацIасу апшта, январ а 13 атыцIымти январ а 14 агIаталымти йгIарбжьашвауа ауахъ Апсны апны Адуней агIаныршара Амш дыртлапIитI. Йажвыз акалендар пхьадзарала йгIауахвырквын ауи Асквш шIыц йаквшвитI. Ари Амш Апсны йапшым аштаква рпны йшапхьауа гьаквшвум: АмарагIацIцIырта ахьыла «Ажьырныхуа», Амараташварта аштаква рпны «Хьачхуама» рхIвитI. Ауаса ацIас анкъвгаща, анадасща апшыпI. Адуней агIаныршара Амш артлапIара апхъанчIви диннкъвгара йгIахъшахъыцIта, абанпараква йгIархчауамцара уыжвгIандзара йгIащаквхата йырпхьадзитI. Ауи ажьира анчва Шашвы йыхьыз йапщылапI. АпхъанчIви заман йгIашIарышвта ажьира ныхIвартата йрымапI, араъа ныха рхIвитI, ажва дрыбагъьитI.

Абараса йыззсакъуа йгIащаквыржьыз Ажьырныхуа ацIас апсуаква ансисквша йдыртлапIитI. Ари атшын аткъвым зымгIва ахIба йунагIва апны йгIайззитI. АцIас анадасра йазалхта тгIачвипхьадза жьира рымапI. Ажьира апны, ацIас йшгIанахIвауа апшта, аджьчIвцIла кды гылазара атахъыпI, ауи ахъахь «хнапIыкI» – хIва йрыпхьауата хпкъыгIвакI ыквырцIитI: псыргла, къазкъыч, джьахIва. Ажьира ауацIагьи апахьгьи цкьата, йалыргата йынкъвыргитI.

Ари ацIас анкъвгара щардагIвы йдырхъвыхуан. Ауат йрыуазаджву Ардзынба В.Г. йшигIвызла, агвыргъьахъв андыртлапIауа ажьира апны йагIвсыз асквш атшыгIврала йдрыхIазырыз ачагIыр зту ацIыкв гIахъыртIитI. АцIыкв йту ачагIыр ари ацIас акIвымкIва датша швхIаусыгIвала йгIарысабап йгьауам.

АцIас йазынархата Амш агIаталымта апсуаква йшкIвокIвацкьу джьмакI йа чвчIвыскI къвырманта, атгIачвапхьадзара йаквшвауата аквтIу арыбаква рщитI. Агара йту асабинадзара даларцIитI атгIачвапхьадзара. Йанхъвлара ажьи ажьлыцIкви рмацIауитIта атгIачва ажьира апны йгIайззитI. АтгIачва рахIба йарма напIыла чашви абаца йхъду арахв гви ачIви, йагъьма напIыла ачагIыр шIа йыма Анчва тшизынайырхитIта дахIвитI йцриква, йъахIыльчва арыцхIагIа йачвхъихчаныс, адуней лашара апны амамырра щаквгылазланыс. Ауи асахIат ажьира апны йгIвназларныс йахвиту атгIачва рпны хъылпа нкъвызгауа ракIвпI. Ауат ачвамзаква адыркIитIта апсыргла гIакIвдыршитI, ачвамзаква ацIыхъвадза йблындзыкIьара йгылапI. Ажьира апны закIы-закI чагIыр шIа щтIырхитI, ажьи ачашви йрыцхIитIта йгIаталуа Асквш шIыц дыртлапIаныс ахъазла атдзы йнашылхитI.

Ащымта знапIы ласыта йырпхьадзауа атгIачва рыуа заджвы ацIлацIычв къвадами арасацIла къвадами гIайгитIта атдзы апахьла йкIнайхIитI. АуагIа йшырпхьадзауала, ауат йрыцта Асквш шIыц апны аунагIва рахIмат нашылитI. Агвлачви аъахIыльчви ащтаныкъвауа Асквш шIыцла йхIвахIвитI.

УахьчIвала абзазара псахра щарда гIалалызтынгьи апсуаква ари ацIас амагIны рзыгIащаквыжьтI. Ауи апсуаква ртурых асквшышвква цIолата йшрылалуа йаквшахIатпI.

Квициния Асида,

«Абаза Къраль» сайт йазалхпI

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki