АгIахIвра алахIвара пшдзаква

– Сара йапхъахауата срынйитI агIахIвра тшазызбжьаныс йазгIашыкъу араъарагIвы саби! – ХIачвыкъва МухIамад асабиква аршIыйара тшъадыркIылуагьи дайгвыргъьитI, ауыс арахьари ахъатагьи гвыргIва гIайыланацIитI: йызтахъу зымгIва дгьызрыдынхалуам, «момо» згIауа асабиква швабыж ргвы йаситI. – ЙчIвыуа йскъвыцIхитI, саргьи сгвы цIскIгIауа сгIанхитI, – йхIвитI абалетмейстер.

Январ а 12 йгIашIарышвта Гвым кыт апны хореография кружок нхауа йалагатI. Ауи аквтанай апхьарта аунашвачпагIвчва рбзирала, «Алашара» адкIылара рцхърагIарала йгIаншатI. ХIачвыкъва МухIамад Черкесск дтыцIуамцара акытдза дцалара шатахъхушгьи дампшуата асабиква ауагIахъа гIахIвраква йырзибжьаныс дадгылтI. Ахореограф йшигвыгъазла, жвыгIвыгIв-жвыгIвыгIв йа жвицыгIв-жвицыгIв йнадзауата ахIвсси ачкIвынчви адикIылта гIахIвра ансамбль йчпушын. Аквтанай апхьарта асабиква рыуа гIахIвра тшазызбжьаныс гIазтахъхаз агалагьи рыцIа йщардагIвхатI, ауи ахъахьгьи агвла апхьарта апхьагIвчва ахабар аныргIа йгIайын йахIвауа йалагатI. АбжьагIвы дрыхамдзушта йанырдыр ргвы йастI.

ЙагIвсыз асквшышв йпщынгIважвахауа асквшква рагIан зны Гвым кыт аклуб апны гIахIвра ансамбль аъан. Ансамбль щарда йгьнымхатI, йалаз апхьарта йгIалгахьакваз чкIвынргIа ракIвын. Ауи апхъалагьи ацIыхъвалагьи акыт апны асабиква гIахIвра заджвгьи йгьазийымбжьузтI. Ужвы йгIаншаз алшара щардагIвы йгIадрысабапырныс гIартахъхатI.

– ЗакI гIахъвыцра атахъыпI. Асабиква ргвы йаситI. ЙасрайгIваджьхырнысгьи гьстахъым. – ХIачвыкъва МухIамад дзынйаз ауыс аъаща дазхъвыцуазшва тшытракI ддзыргIвытI. УадыргIвана акружок йалашвакваз дрыдынхалуа далагатI.

Саби 40-гIв асцена апны хвсатыркI йнадзауата хвгIвы-хвыгIв йгIалагылын рбжьагIвы унашвата йчпуш йазпшитI. АбжьагIвы атшыбжьара сахIат джвыквицIитI. Ауи йшIпшуамцара ашIаква рыцIа ймайру ачIвырхъаква рчпитI, уадыргIвана рыцIа йхъадакву йрыдынхалуа йалагитI. Акружок анхара джвыквлищтара ари атшыбжьара сахIат хпахитI, ауаса абалетмейстер рчпащаква, рпIатIаущаква, рчIвырхъаква тамамта йшаквдыршвуш зынла йаквгIазшIититI, рыбгъаква рейшата йшыркIуаш дйырбитI. Амакъым аритм шрылархIвуш, асатыр рейшата йшыркIуаш гIаргвынйыргIвитI. АзджьакI майрата йрыларкIитI, азджьакI йырчвыбаргвыркIвапI.

– ЙауыпI, йащцахуаштI, – йхIвитI йхъагвы аквыта МухIамад Азамат йпа. ЛацIыхъвала азал апны йчIву хгIвы чкIвынчва дрызкIылпшитI. Ауат асцена йгIаквылныс зынасып йгIанакIыз йгьрыламшватI, ауаса ргвы гьдрыдзуам. Азал апны ахъаз йчIвамкIва агIахIвра амальква рыцырчпауамцара рхъа йадынхалитI. ЙадикIылыз агвып аджвырагIв рылцIхуазтын – йанакIвызлакIгьи йгIаншитI араса – абжьагIвы дгьамальынтшахушым.

Атшыбжьара сахIаткIи бжакIи ласдза йагIвстI. Апхъахьыла рыцIа ауырата йынхуштI. УахьчIвала апхьартагьи агIахIврагьи адызкIылуа асабиква шгIапсаз гвы айтуата йамцIыщтхитI. АгIахIвра йаланаршыз асабиква йабаркIы азал йджвылцIхтI.

ЙчпачIвыйа щта арахьарат агIахIвра тшазызбжьара зтахъыта йгIанхаз асабиква руысла? МухIамад Азамат йпа тIакIв даназхъвыц амщтахь йгIвбахауа агвып гIанырша йауашта йхIватI. Ауат асабиква йапхъахауа агвып данрыдынхалра амщтахь мчбжьыкI апны гIван тшрыхайырдзарныс дхIазырпI, асцена йгIаквымлыргьи агIахIвра йазычпазлуштI. РыцIа йгврыхвата аджвырагIв гIарылцIуазтын ауат ансамбль ахъазла дыздынхалуа йапхъахауа агвып рахьыла йатрыпах йауаштI. Асабиква ртахъырагьи йара йуыс зквугьи уырпшрыквын МухIамад йзахвара кьангьаш азгIаугуашта йгьаъам. Адгалра уысква аквшвузтын йара йылшауа закIгьи дгьайгьдзушым.

ЧкIала Георгий,
«Абаза Къраль» сайт йазалхпI

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki