Апсны а-КъральыгIва Урышв драма театр

Хвысквша руацIа йакIвшуз ареконструкция амщтахь Согъвым апны а-КъральыгIва Урышв драма театр гIахъыртIытI.

– ХIара насып дута йхIзалтI ари атеатр агIахътIра, швабыж щарда хIазпшытI уахьчIва хIызлапшуа агвыргъьахъв, – лхIватI атеатр аунашвачпагIв Балаева Н. аспектакль аламгаскIва апшыгIвчва тшырзыналырхауата. – Хвысквша анухIвара швабыж йщардапI аршIыйагIвчва гвып рыхъазла, ауаса агвып рхIаль-шанла багъьата тшгIадырбан йгIащаквхатI. ХIара хIзайгвыгъуз хIгьамайжьатI, атеатр атдзы зымгIвалагьи йнардзата йдырчIаджьтI.

Апсны а-КъральыгIва Урышв драма театр асквш 1981 агIан йгIахъыртIытI. Ауи асхъан ауи апшыгIвчва шIаква йыр-Театрта акIвын йшаъаз. Асквш 1990 агIан ауи драма театрта йырчпахтI. Апсны а-Урышв драма театр арепертуар йалапI аурышв йгьи агIвымакъраль классика. Зунашва хIхIвауа йрыланакIитI Уильям Шекспир, Анатоль Франс, Чехов Антон, Пушкин Александр, ауасамцара. Датшагьи араъа йдыргылитI уыжвгIанчIви Россия йгьи Апсны авторква ргIвыраква йгIархъыху аспектакльква.

Хвысквша йакIвшаз ареконструкция амщтахь а-КъральыгIва Урышв драма театр ашвква Мольер йпьесала йдыргылыз аспектакль «Тартюф» акIвпI йызлагIартIыз. Атеатр аунашвачпагIв Балаева Н. йшылхIвазла, атеатр агIахътIра агвып рынхаща, рыршIыйара пхыцIа джьауапкIра ду зпщылу шIыцра щарда шгIаланацIауа рылархIвауата йаъапI, йаргьи ауи акIвпI «Тартюф»-ла йызгIалагаз. ЙалкIгIата абари аспектакль айсра зчва йтшаз атеатр агIащаквыргылхра йаквыргIапста йырпхьадзатI артистква, йшпакIву ухIварыквын айсра агIан атеатр анхара ашIасдзан йыдзтI ухIва йауашта йаъан. «ЛдзгIарати баргвырати хIзынйаз зымгIва хIгIарыцIстI, атеатр анхара шIыц-шIыц йадыгIгалхын йапхъахауа хIспектакль «Тартюф» йыргылтI талант ду змаз актер, арежиссер Читанава Мераб, – лхIвитI Балаева Нина. – Атеатр анхара апны ауи йъазара хIызлайгвгъуз щардан, ауаса адуней йхIваджьра апхъала аспектакль адигалныс, атеатр актерква адиплом йазынадзандзыкIьара дрыдынхалныс акIвпI дызхадзаз».

«Апсны апны йырхъйара атахъу ахачIв баргвква ага йщардазтынгьи акультура анхартаква руысква апхъа йдыргылта йъадырхъйауа ахъазла» Балаева Нина ареспублика аунашвачпагIвчва квырмыш ду рзылчпатI. Ауи йылрыбагъьатI «акъральыгIва атланыкъвала йрызрыму агвыгъара бзиква кърар багъьала йгIадырцIабыргныс ахъазла атеатр атруппа йрылшауа закIгьи йшамайгьдзуш». АпшыгIвчва асцена йхвынгылаз актерква аурымщтхуата ауырата напIы йырзасуан.

А-Урышв драма театр агIахътIра йадахIвуата йдыргылыз аспектакль йапшытI апрезидент Хаджимба Рауль, апарламент аспикер Бганба Валерий, апремьер-министр Бутба Беслан, Апсны апны Россия Федерация агIащтийыгIв Григорьев Семен.

Аспектакль аналга амщтахь асцена дгIаквылтI культурала Апсны Республика аминистр Арсалия Эльвира. Ауи атеатр анхагIвчва гвып агвыргъьахъв ахьызла драйхIвахIвтI, гIамта айшысла а-Урышв театр ареспублика акультура бзазара йшаквта духуш кьанкьаш шазгIалымгуа лхIватI.

Ахба Диана,

«Абаза Къраль» сайт йазалхпI

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki