Апсны акультура дазынхитI

Кварчия Нури Еремей йпа йквнагауата дрыларпхьадзатI акнига «КIавкIаз агIвычIвгIвыс дуква» (Нальчик, асквш 2013) афырква. «Кварчия Нури йапшу агIвычIвгIвысква йрыладухара атахъыпI Апсны – ауи йуагIахъа культура апхыцIа ахъазла йгвы швабыж йцхIитI, сквшкъомкI рурала шIасгьи гIапсарагьи йымдыруата ауи атшауацIыхра дазынхитI», – араса йхIватI Нури йыхъазла а-Дуней арт комитет авице-президент Бетуганов Ауес.

Нури Еремей йпа йбзазара турых анапаква, нархара щардала йалу йынхара дахIвра дула йакIвйыршауата Ауес йзихIваз арат ажваква гIайырцIабыргитI. Асквш 1975 агIан йбзидздзу адырраква йымата Руставели Ш. йыхьыз нкъвызгауа Тбилиси къральыгIва университет дангIалга ауи Чанба С. йыхьыз зхъу Апсны къральыгIва драма театр апны актерта дынхауа далагатI, асцена апны угвы йгIатахауата турасы щарда гIанйыршатI. Актер нхара йацйырцауата Ткъварчал ауагIа театр апынгьи режиссерта дынхун. Асквш 1986 агIан Кварчия Нури культура ауысла Апсны АССР а-Министерства йаланакIуа уагIа ршIыйарала йгьи культура арыпхьарала а а-Наука-методика квта аунашвачпагIв йъанатIа йыхъвдаквырцIатI. Араъа анхара анджвыквицIа асхъан акIвпI йалкIгIата ауи адгалра уысква дшырзычпу, хъвдаквыщт ду шизыгIарбауа анбергьыльха: фольклор материал азкIкIрала уыс ду акIвйыршатI, апсуа уасаражвква рэтнография ансамбль «Нартаа» рыршIыйара гIайыршIыцхтI, аршIыйагIвчва (атгIачва ансамбльква, агIахIвчва, ауагIа театрква, анапI ъазаква, асуратгIвгIвчва агьиква) йырзынарху анкъвакъвраква, афестивальква, агIарбартаква къомкI йнадзауата радгалри ракIвыршари джвыквицIатI.

Асквш 1989 агIан Нури Еремей йпа Китай УагIа Республика дцан ацынхара ауысла агIаджвыквцIара ангIалраква мачвы рыцIайцIатI. Ауи амщтахь «Нартаа» ансамбль аконцертква США апны йакIвйыршара ймурадта айчважвараква джвыквицIатI… Ауаса асквш 1989 аполитика гIаншараква гIайпырасын йгIаджвыквцIара дуква щаквыстI.

Апсны апны айсра алгата амамырра анщаквгыл йхвыртаква мйыхскIва Кварчия Нури йынхарта гIащаквйыргылхуа далагатI, «Апсны ауагIа ршIыйара а-Республика квта» – хIва йахьицIатI. Баргвырата дзынйуз зымгIва дгIарыцIсуамцара йуыс рахIагьи дазгIашыкъта аквта анхара атаджвыквицIахтI: анкъвакъвраква, афестивальква, агIарбартаква…

Кварчия Н.Е. Лагъь КIавкIаз ареспубликаква, Россия аштаква рыршыйагIвчва дшрабадыруаш, дышрыцынхуш амальква дырзыпшгIитI, Апсны акультури азъазари ауахьауат аштакви акъралькви шрыхайыргIвазуш, ауагIахъаква ркультураква шаргваничIвуаш дащтапI. Ауи ауысла йшвапха бзипI Къарча-Черкес республика ауагIа ршIыйара квта дшрыцынхауа, араъа аршIыйагIвчва щардагIвыта дъарыщтаныкъвауа. Сара схъатала бзита йздырхитI асквш 2009 агIан йакIвшаз апсуа-абаза культура йгIвбахауа афестиваль амшква: йапхъахуз ахъвы июнь мыз агIан Къарча-Черкес апны йакIвшатI – Хъвыжвду кыт апни Черкесск апни, йгIвбахауа ахъвы – сентябр агIан Апсны апны (Гагра йгьи Согъвым къалаква гIацIанакIуата). Аконцертква йрылан «Абазгьква» гвып, «Апсны – 67» ансамбль, ашвахIвагIв, акомпозитор Зыхвба Зауыр, Абазашта йгьи Апсны рыршIыйагIвчва щардагIвыта.

Ауат афестиваль мшква рагIан сара Нури Еремей йапхъахауата сйабадыртI, йджьасщауата йзбатI йгвышхвари йыршIыйара гIаджвыквцIаракви гIвынагьи цIгIвагьи шрымам. Унашва зхъицIауа а-Квти Къарча-Черкес респубика ауагIа ршIыйара квти джьгарта йацынхитI. Культурала Къарча-Черкес республика а-Министерства йакIвдыршауа ауыс дуква ауралагьи йгIарылалитI Апсны аршIыйагIвчвагьи. Йари сари йызнымкIва хIанйалун Домбай апны йакIвшалауа «Ащхъа хъыквква» бард фестиваль апны. ЦIыпх май мыз Невинномысск апны йакIвшуз абард фестиваль салата зны стелефон гIахIвачватI. «Апсны апны йакIвшуш афестиваль «Ашва узысхIвитI, Апсынра!» уалалныс угIахIрайгвитI!» – тIакIвгьи съанквынхауата абараса багъьата йщаквгылу йбжьыла дгIачважватI Нури.

Асквш 2014 июнь мыз йакIвшаз ауи афестиваль анцIрала сгвы пхата, пшдзата йгIатахатI. ХIайчважвара айшысква рпны ауи ареспублика ауагIа ршIыйара квта нхарата йакIвнаршауа, араъа йщаквгылыз ацIас пшдзаква йауацIыхта срыхайыргIвазатI: эстрада ашвахIварала анкъвакъвра «ЧкIвынргIа рбыжьква», асабикви чкIвынргIи рквтала агIахIвра фестиваль «Адзыхь», ауагIа ъамапсымаква роркестрква рквтала афестиваль «Апхьарца», ауасамцара датшагьи щарда.

Артист шIаква йыцта Кварчия Нури анкъвакъврата, фестивальта дызлаллакIгьи адахIвраква, агIатгара дуква рымата рцришта йадгылхитI. УахьчIва йъагIадзаз Кварчия Нури йдыррагьи, йъазарагьи, йкъаругьи дырмайгьдзауата Апсны акультура атшауацIыхра джьгарта дазынхитI.

Асквшква 1992-1993 рагIан Апсны апны йакIвшаз Абашта айсра Нури Еремей йыпкъгьи йпсгьи хвырта цIола гIарыланажьтI. Айсра апны йгIайырбаз ахъацIари афырри йрыквшахIатта ауи Леон йорден йквнадыргатI. Амамырра бзазара апны йгIатгараква йыргIарбагапI абарат артшхъвагакви ачIахIра хьызкви: «Акультура арыцар» чIахIра хьзы апщылата а-Дуней Арт комитет йгьи ажвлара квырмышчпарала а-Дуней ассамблея йгIайквнадыргаз ахьапщ орден; «Россия ауагIахъаква р-Артиада алауреат» хьапщ медаль, асуратгIвгIвы Шемякин й-Фонд адиплом йапхъахауа ахIагIара амата (Санкт-Петербург), ажвлара организация «Адгьа Хаса» адиплом, Москва къала а-Правительства а-ЧIахIныгIва Ртшхъвага.

ХIасарокъва Бильаль,
«Абаза Къраль» сайт йазалхпI

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki