Апсны драма театр анхара атаджвыквылхтI

Декабр а 18 атшын арчIаджьра уысква йрылган Чанба С. йыхьыз нкъвызгауа Апсны драма театр анхара атаджвыквылхтI. «Атеатр агIахътIра» спектакль апны артистква апхъала йдыргылыз ажвспектаклькI рыцIа йбзийу ршIчIвраква гIарылырхуамцара апшыгIвчва йгIаддырбатI. Зквпшыра гIадыршIыцхыз асцена апны артистква Искандер Фазиль йгIвыра «Махаз», Бгажба Михаил йгIвыра «Гуарп гIвгIвы», Щынквба Баграт йроман «ЙахъыцIыз йгIартынхаз азаджвзаджвыкI», Островский Александр йпьеса «ЙгIапкIыз ахча», датшагьи йгIархъыхта йдыргылыз аспектакльква ршIчIвараква гIадырбауамцара йгIахъвмартI.

Атеатр арежиссер хъада, агвацчпа унашвачпагIв Кове Валерий йшихIвазла, атеатр зыгIвну атдзы ъадзадырчIаджьуаз артистква рынхара гьашIадымрыстI, афестивальква йрылалуан, аспектакльква гIадырбауа йгIамдун.

Апсны драма театр атдзы йара атурых гIальамат амапI. Асквш 1912 агIан адрама театр ъагылу апны Согъвым йтабзазуз, зымлыквла йапхъахауа агильдия йрыланакIуаз асатучпагIв Аллоизи Иоаким уагIа 30-гIв зыгIвнашвуз асасырта «Гранд-отель» йгьи уагIа 670-гIв зыгIвнашвуз атеатр «Аллоизи» йыргылтI. Асасырта йапщылата йаныргIалын «Олимпия» синематограф, ресторан, казино, тагIвзырта, гараж, парк. Ага йгвасразтынгьи, уахьчIвала ауат зымгIва йрыуата араъа йгIащаквхаз йдучвам апаркзаджвыкI акIвпI.

Аллоизи адуней анихIваджь амщтахь бзидздза цIхьата, асквш 1921 агIан, ауи йгIанйыршаз атеатр ахьыз рпсахтI – «Апсны драма театр» – хIва йапхьауа йалагатI. Асквш 1943 агIан Абашта айсра Ду акIвшауата анамыца авиация Согъвым йангIагвыквс атеатр атдзы топх азалын йшабгаз йблытI. Асквш 1952 агIан атеатр атдзы шIыц-шIыц йангIащаквдыргылх аквпшыра гвы аутуата тшапсахтI. Асквш 1967 агIан апсуа драматургия ащатащтIацIагIв, агIвгIвы бергьльы Чанба Самсон йыхьыз ахьырцIатI.

Апсны драма театр атдзы арчIаджьра нхараква рыхъазла асквш 2009 апхын йадыркIытI. Ареконструкция амщтахь атеатр йатаркIвах Согъвым адзтшпурам йарыпшдзагахатI. Ужвы атеатр атруппа рыршIыйара гвышхвара дула тшауацIнахуа йымгIвайсуаштI, апшыгIвчва гвыргъьахъв щардала ргвы йаладырхIаныс рылшуштI.

Квициния Асида,

«Абаза Къраль» сайт йазалхпI

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki