Апсуа музыкантква рдуэт Казань йаъан

Январ а 18 Казань йтагылу Сайдашев Салих йыхьыз зхъу Аконцерт зал ду апны апсуа дуэт Гаделия Лука йгьи Эшба Кристина рконцерт акIвшатI. Аконцерт «Россия – Апсны культура гIамта» проект йаланакIуата йадыргалтI.

Органист Гаделия Лука йгьи асопрано Эшба Кристина рконцертла апроект «Россия – Апсны культура гIамта» хъыргIвахтI. Аконцерт апрограмма Бах И.С., Гендель Г.Ф., Лист Ф., Видор Ш.М. йгьи Апсны акомпозиторква рыршIыйарала йалан. Аконцерт адгалра йацхърагIатI культурала Россия йгьи Апсны рминистерстваква.

Зъазара швабыж йхIагIу апсуа артистква Гаделия Лука йгьи Эшба Кристина рдуэт гIальамат ахабар Россияла йахъазымкIва агIвымакъральквалагьи йгахьатI. Ауат дахIврала йгIахъмархьатI Рим, Оксфорд, Кембридж, Пула, Кинтбери, Люксембург, Брюссель, Барселона рсоборква рпны. Адуэт рконцерт апрограмма йанакIвызлакIгьи йаларцIалитI апсуа уагIахъа ашвакви орган музыка амальквала йаныргIалу ауагIахъа ршIыйара темакви. КIьыда-кIьыда йгIауахвыргьи адуэт гIанзыршаз артистква рхъатачIв ршIыйара аъазара швабыж йхIагIапI.

Ахъвлапын далан йбергьльу апсуа пианист, апедагог Яврян Карлен, Россияла йбергьльу органист, Казань консерватория аректор Абдуллин Рубин. Апроект «Россия – Апсны культура гIамта» асквш 2010 агIан йагIаджвыквцIагIвхатI культурала Россия йгьи Апсны рминистерстваква. Абар ауи анархара хъадаква: Россия апны рыцIа йагъьу аршIыйагIвчва Апсны апны, Апсны йауата рыцIа йагъьу аршIыйагIвчва гвыпква Россия аштаква рпны йгIахъвмарра. Апроект нхауищтара йцIуа апщсквша руацIа ршIыйара нархара щарда змаз гIаджвыквцIара 80 райхIа абзазара йаларыжьтI: асимфония, аорган, ахор, ауыжвгIанчIви музыкала йадгалаз, агIахIвра, атеатр, амузыка гвыпква, авокалистква, амузыка ъамапсыма асыгIвчва рыршIыйара программаквала йалаз аконцертква.

Ахба Диана,

«Абаза Къраль» сайт йазалхпI

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki