Апсуаква рцIас кIьанджьква

АпхъанчIвидза заман йгIашIарышвта уагIахъа щарда рцIасква йырпщылу йа хъыхчарата йырзалуа акIьанджьква рымата йгIамгIвайсуан. Аква гIакварныс йахIвауата апсуаква «Дзиуара» (Дзиуара – нчва хьзыпI) анакIвдыршуз йырчпуз акIьанджь адзы анчва Дзиуара лгвчIагIв йахIвауа йщтIарцIуз пкъыгIван.

Ари ауагIахъа цIас щарда йаквчважвун апхьахьакви агIамдагIвчви. Джанашвили Н. йынхара «Апсны йгьи апсуаква» апны асквш 1894 агIан араса йгIвытI: «Апхын адгьыл агIвоу йанакIра акыт ахIвссаква чгIвыча пшдза рышвата адзыгIв адзхъа йайззитI. ХгвыпкIта тшагIвыршитIта ацIла къвадамаква къьакъьата йадырхIвалитI, шыхIв ыквырпситI, пхIвыс чгIвыча зшву акIьанджь рчпитI. Ауатква зымгIва анхIазырхара тшадакI гIардитI, асхъа шкIвокIва аквырпситI, акIьанджь аквдырчIвитIта къьакъьата йадхIвалу акъвадамаква ъану йаздырцитI. АмгIва агIвхъатакIла йгIамгIвайсуа ахIвсса йазалху ашва рхIвитI. АдзыгIв йангIадзхъагылра акIьанджь атшада йгIакIнырхитIта акъвадамаква йрыквырцIитI, ашыхIв йаларцIитIта адзы йхъыржьитI…»

Ауаса асквш 1907 агIан Апсны йсасуаз Миллер Всеволод ари ацIас анкъвгара псахрата йалалыз гIаликIгIатI. Ауи йшигIвызла, ужвы ари ацIас саби хъвмаррата йакIвшитI: асабиква, ащардагIв хIвсысата, пхIвыс квпшыра зму акIьанджь рчпитI, адзыгIв йазыргитIта йаладрышвитI.

Адгьыл нчва йгIалхъшахъыцIуата йырпхьадзуз азгIва гIаздысылуаз агIвычIвгIвыс йызлайайъазуз акIьанджьгьи рыман апсуаква. АзгIва агIвычIвгIвыс дарыкъарусызуан. АгIвычIвгIвыс йщапIква дийуазтын ауи адгьыл дакIытI рхIвунта йазалху айъазара джвыквырцIун. Асквш 2003 агIан Ачандара кыт апны ауи апш айъазара шакIвшауа схъатала йзгIвытI. АчымазагIв дбзихахырныс ахъазла ауагIагьи арахвгьи ъанамдзауа акIьадыгв агъыцIара апны «Адгьыл апаштахI-пхIвыс» йлыхIвауа тшылзынадырхитI. «Йцкьу» апхIвыс дгIадрайгвитIта ауи дылдрыхIвитI, ачымазагIв азгIва йхъылхныс, длырхвитхныс ахъазла апхIвыс нартыхв шылала ашвы зту льакъвым ду лрыдзитIта «Адгьыл апаштахI-пхIвыс» длыхIвитI. АцIас анакIвшауа агIан араса баца йгIалхта гIвычIвгIвыс хIагIара зму акIьанджь рчпитI, пшдзата йыргIвычитIта ачымазагIв йхъкъьачIвыла адгьыл йыцIаржитI. АкIьанджь ыцIарцIаныс йаныргауа асхъан апхIвыс апсы дшырчIвыуа апшта дашIыпхьадзауа далагитI, ацIас йалу аъахIыльчва ачымазагIв дгIацадмырпшуата ауагIа дрылырдахитI. АцIас анакIвшара амщтахь ачымазагIв азгIва даунащтхра атахъыта йырпхьадзитI.

Уыжв азаман апсуаква апхъала апшта аква агIаквара йызлахIвауа ацIас нкъвыргаркIвитI. Апхын мыш шуаракI атшын апхIвыскви асабикви гIайззитI, ачвыргъвы кIьанджьыта йырчпитI, пшдзата йыргIвычитI, адзыгIв йазыргитIта йартитI. Дзиуара абари йапшу ашвала тшылзынадырхитI: «Дзиуара, Дзиуара, ахI йпхIа дыдзышитI. Адзы ахъаз дбахIтитI. Ахвыц ахъаз дгьбыхIтуам. Адура ахъаз дбыхIтитI». Ари ашва анахьанат авариантквагьи урынйитI.

УыжвгIандзара Апсны акытква рпны щардазджьара Дзиуара рчпаркIвитI. Швапхата йгIахв йауаштI Ачандара кыт йауу ЦаргушргIа рткъвым. Ауат сквшигIадза апхIвысгIвацаква алата ари ацIас акIвдыршитI. Ауат «Дзиуара» рхIвумцара акIьанджь адзы йаладрышвитI. Ауи амщтахь хъвлапны амш тшапсахта ауагIагьи адгьылгьи ззпсуа аква анагIаджвыквылуа щардапI.

Ахба Диана,

«Абаза Къраль» сайт йазалхпI

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki