Артиада: КIавкIаз апхъанчIви цIас бзиква ргIащаквыргылхра

ЙтыцIхыз акультура Асквш Къарча-Черкес акультура бзазара апны шIырпшыра змам гIаншаракIла сгвы йгIатахатI – «Айгвара амарамыз» – хIва йзхьзыз а-Дуней фестиваль-анкъвакъвра йапхъахауата Черкесск апны асквш 2014 ноябр мыз агIан йакIвшатI. Анкъвакъвра адыргалтI КIавкIаз апны йгIаныршу а-Дуней Арт Комитет а-Хъвшара йгьи КIавкIаз а-Дуней ршIыйара Академия.

Кварчия Нури йгьи Бетуганов Ауес

Арат амшква рагIан Кварчия Нурии сари хIатанйахтI. ХIайчважвара гIаджвыквицIауата Нури Еремей йпа афестиваль ахъазла йгвгIанаграква хIыцагIвишатI:

– Афестиваль анкъвакъвраква хызджьарта йацакIвшатI. Абар ауат рноминацияква: ашвахIвара ршIыйара, хореография ршIыйара, ъамапсыма асра ршIыйара, декламация ршIыйара, атеория дырраква рхъвшара, амода театр. Сара хореография ршIыйарала ажюри срунашвачпагIвын. Швабыж йсымаджьащахъвата сазпшуан абаза гвыпкI ангIаквылуаш, рыршIыйара шаъазлуш. «КIвашара» ангIархIва ахьызла, амакъымла, агIахIвыщала (ауатква зымгIва гьхIцрийымма щта?) йгIасгвынгIвытI асаби гвып шабазаз. Ауат ргIахIвыща швабыж йгвлахIаран. ЙгIахIахвырквын, афестиваль магIны зму культура гIаншара дута йакIвшатI: асабикви чкIвынргIи апрофессионалква йрынйатI, амастер-классква рагIан дахIврата йа бжарата йрыму, апхъахьыла йыздынхалра атахъу, ръазара атшауацIыхра нархарата йамазлуш агьиквала йкьангьаштI. Сара Апсны Республика рыршIыйагIвчва гвып срунашвачпагIвпI, ауат афестиваль апны дахIврала йгIахъвмарта йспхьадзитI.

КIавкIаз апны йгIаныршу а-Дуней Арт Комитет а-Хъвшара йгьи КIавкIаз а-Дуней ршIыйара Академия рунашвачпагIв Бетуганов А.А. Апсны аршIыйагIвчва руысла Нури йхIваз йацикIуата йгIацицIахтI:

– РшIыйара хац зща йалу асабиква, чкIвынргIа ргIарыбергьыльра, рыргвышхвара акIвпI афестиваль-анкъвакъвра анадыгIгалуаз мурад хъадата хIпахь йхIыргылуаз. Датша нархарата араъа йхъйатI апрофессионалква, арыпхьагIвчва рабадырра, ръазара йалархIара хачIвквагьи. Афестиваль йалан уагIа 300-гIв райхIа, ауат 12 штакI йрыуан: Апсны, ГIвадахь Осетия, Украина (Донецк област), Къабард-Балкъар Республика, Чачан Республика, Йынгвыщшта, Лагъь Осетия-Алания, Адыгейшта, Къарча-Черкес Республика, Краснодар йгьи Ставрополь штаква. Апхъахьылагьи «Айгвара амарамыз» фестиваль ансисквша Къарча-Черкес апны йадыгIгалланыс хIгвыгъапI.

Ауес Абу йпи сари хIайчважвара апны акультура ауысла Апсны йгьи Лагъь КIавкIаз  рацынхара атурых сквшкъомкI шгIацIанакIуа гIасайхIвтI.

– Асквш 1986 агIан (ауи агIан щардагIвы йгьрымдыруазтI хIтурыхгьи, хIкультурагьи, хIуагIахъарагьи злапщылу шщарду), Къабард-Балкъар республика уагIа ршIыйарала анаука-методика квта саунашвачпагIвта санынхуз, апсуа артистква Нальчик йгIайланыс, анкъвакъвракви афестивалькви йрылалныс йгIасрайгвауа салагатI, – йхIвитI ауи. – ЙащтагIайыз асквшква руацIа ари ацIас ащата рыцIа-рыцIа йбагъьахауа йгIамгIвайстI: аршIыйара лабораторияква, асеминарква, апрактикумква, анаука-практика конференцияква ракIвыршара джвыквхIцIатI. Асквш 1991 агIан акультура бзазара апны магIны дудздза амата ауи атлахан Нальчик йапхъахауата йакIвшатI Апсуа-адыгьа культура а-Дуней фестиваль. Афестиваль йалан адуней акъральква йырту адиаспораква зымгIва ргIащтийыгIвчва.  Афестиваль жвамшкI руацIа «Спартак» стадион ауатыкв йтан. Аконцертква Къабард-Балкъар аштаква, акъалаква рпны йакIвшатI. Ауи сасыта йалан уагIа 500-гIв. Кварчия Нури Апсныла йгIатыцIыз асасчва дырхъадан, йгIвбахауа афестиваль ауи йадигалуашта хIангIалтI. ЙащтагIайуаз асквш 1992 агIан Согъвым апны НартргIа рэпос ауагIахъаква р-Дуней фестиваль акIвшатI. Ари афестивальгьи апсуа-адыгьа культура апны магIны ду зму гIаншарата йалтI. Афестиваль алгауата Адзтшпурам апны амхIаджьырква рхъмаштылра син ащапIхIахъв щтIарцIатI. Асквш 1992 агIан акыртква Апсны йангIагвыквсуашыз апхъабырг йаквшватI афестиваль акIвыршара. Нурии сари хIакIвпI апхъапхъадза КIавкIаз апны а-Дуней Арт Комитет агIаджвыквцIараква йрыцызкIыз.

Бетуганов Ауес Лагъь КIавкIаз апны а-Дуней Арт Комитет ангIанша асквш 1998 йгIашIарышвта ауи даунашвачпагIвпI.

А-Дуней Арт МгIвайсра Россия ауацIа апсахраква анджвыквыл, асквш 1991 агIан, Москва апны йгIаншатI. Ужвы ауи адуней акъральква йрыуата 36 раъара аднакIылитI. А-МгIвайсра акъарула Артиадаква акIвшитI. Йшбергьльу апшта, Россия й-IV-хауа Артиада анакIвшуз, асквш 1997 июнь а 28 йгIашIарышвта асквш 1998 ноябр а 28-дза, Къарча-Черкес ашва культура ралацIара ду, рыршIыйара ъазара ахIагIара пIатIу аквырцIауата «Абазинка» ансамбль а-Дуней Арт Комитет адиплом гIарквнадыргатI. Ауи амщтахь асквш 2009 агIан ЧквтIу Владимир амузыка согIат «Хьапщ микрофон» йквнадыргатI. ЙащтагIайуаз асквш 2010 агIан ЧквтIу Владимир йгIанйыршаз вокал-ъамапсыма гвып «Абазгьква» рсолист ЧквтIу Алина чкIвынргIа рквтала ашвахIварала йакIвшаз а-Дуней анкъвакъвра «БОНАМИ» апны Гран-При гIатылгатI. Ауи анкъвакъвра адызгалызгьи а-Дуней Арт Комитет ракIвпI.

Бетуганов Ауес Нури КIавкIаз апны йгIаныршу а-Дуней Арт комитет а-Хъвшара анхара джьгарта дшалу кIьыдата йгIаликIгIатI.

– Нури Еремей йпа Апсны апны а-Дуней Арт Комитет дыргIащтийыгIвпI, – йхIвитI ауи. – ХIара хIгIаджвыквцIара дуква зымгIвагьи джьгарта дрылапI. Ауат агIаджвыквцIараква йрыуапI «КIавкIаз апны йбергьльу агIвычIвгIвысква» – хIва йзхьзу акнигаква ргIацIщтрагьи. Акнига ахъазла Апсны апны Кварчия Нури материал щарда адигалтI. ХIара йацхIкIитI Нури ймурад – Апсны апны Арт Комитет кIьыда агIаныршара. Кьангьаш гьазгIагIгуам ауи а-Комитет а-Дуней Арт МгIвайсра ахвитнагIаква абгата йынкъвнагауа джьгарта йшзынхуш.

ХIасарокъва Бильаль,

«Абаза Къраль» сайт йазалхпI

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki