Астомбыль апны Апсны атурист гIарбарта акIвшатI

Асквш 2015 январ а 22 йгIашIарышвта январ а 25-дза Астомбыль апны культурали туризмли Трыкв Республика а-Министерства ацхърагIарала йжвежвхауа атурист гIарбарта «Emitt Istanbul» ахьызта йакIвшатI. АгIарбарта ансисквша йадыргалитI. Араъа рыцIа йбергьльу атурист операторква ргIаджвыквцIара хъадаква гIадырбитI. СынчIва агIаджвыквцIараква нархарата йрыман Средиземноморье, Европа, Азия йгьи Лагъь Африка ркъральква. Январ а 22 атшын Апсны ащтийыгIвчва гвып Астомбыль йнадзатI. Агвып йрылан а-ХвгIахвтра-рхарджьра палата анхагIвчва, ауат друнашвачпагIвын апалата апрезидент Гагулия Геннадий. Апсны ащтийыгIвчва рэкспозиция андыргIалтI: Апсны аларпшыртаква гIазырбуз абаннерква, ауат йгIарыквчважвауа астендква йгьи апхъанчIви суратква. Апсны агIарбарта апны уыла йгIацIашвун ачвахъабагаква, абуклетква, акнигаква, ауагIахъа фачIвкви ачагIыр пкъыгIвакви: ацха, аджьынджьах, хвырмаргIва, жьыргIва, ашвы, ацIлашвырква, ачагIырква, аконьякква. Апсны агIарбарта йгIадзхъагылуаз асасчва апсуа гIахIвраквала йырпылуан.

«Emitt Istanbul» гIарбарта апны аъачIвагIагIвчва рыцIа йхъаду атур квпшыраква гIадырбун: гIамдара, круиз нархара зму рпны йгIашIарышвта экстремал туризм нархара зму рпныдза. Гватра хъада рзынархан айъазара программакви тларыджа тагIвзра знархару ащхъа курорткви. АгIарбарта апрограмма йалан абарат аштаква йырзынархаз атурква: Абу-Даби, Аргентина, Азербайджан, Болгария, Чехия, Китай, Крым, Доминикан Республика, Дубай, Египет, Англия, Франция, Германия, Греция, Венгрия, Япония, Индия, Италия, Казахстан, Кения, Черногория, Марокко, Мальдива, Сейшель адзыгIвбжьаква, Паттайя-Таиланд, Перу, Россия, Узбекистан, Татарстан, Трыквшта, Сингапур, Словения, Тунис, ауасамцара.

Апсны Республика а-ХвгIахвтра-рхарджьра палата ари агIарбарта Трыквшта йауата йызцынхауа афирмаква йрыцалан. Ауат афирмаква йрыуапI Akmis компаниягьи. Трыквшта апны адуней гIарбарта «Emitt Istanbul» труизм нархара змата йакIвшалауа асквш рыцIа йпхатшу агIаншараква йрыларпхьадзитI. АгIарбарта йалан ъачIвагIагIвчва зыкь 60 раъарагIв. АгIарбарта йалапштI къраль 60 йрыуу уагIа зыкь 130-гIв райхIа.


Ахба Диана,
«Абаза Къраль» сайт йазалхпI

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki