ХъацIара

ЧIвачIва Эдуард Абашта ахчагIвы йшвапха ауралагьи йыла йыцIан – адуней дгIаквлищтара. Йаба Къвмаль ХIамид йпа Абашта айсра Ду далан, ауи а-ЧIахIра орден, а-Баракъ Къапщ орденква йгьи амедаль «АхъацIара ахъазла» дрынкъвгагIвыпI. Афронт апны йгIацIцIуаз газеткI апны йунашва араса йанын: «АбакIра апны заджвы йхъазызтынгьи дайсгIвыпI». Ауи ангIанша асквш 1945 агIан акIвпI – артиллерист ЧIвачIва Къвмаль атоп йхъазы дангIадзхъахагьи дгьгIатымхъатI, афашистква дырпшIагылата йыквичIвакьуан.

http://test.alashara.org/ru/wp-content/blogs.dir/4/files_mf/48.jpg

Ауаса Эдуард къвырльыкъвхара ъачIвагIа згIалихыз йашвхIаусыгIва хъаду йаба айсра дпшцIата дъайсыз гьакIвым. Йгвы йтамкIва шгIаншатI ари ауыс: йцбахауа акласс йгIашIарышвта Эдуард дъацIаз Эркен-ШахIар апхьарта апны арра комиссариат анхагIвы дгIайын апхьара йгIалгуз ачкIвынчва арра къвырльыкъвхара апхьартаква йрыцIалныс йаквгIазшIиттI. Ар къвырльыкъвхара ъачIвагIаква гIацIырганыс пщгIвы йырмурадхатI. Ауат дрылан ЧIвачIва Эдуардгьи. Амандат комиссия йгIалырхыз ауи йхъазын –  йкурсантханыс зтахъыз ачкIвынчва ршвъаква йанрылапшуаз акомиссия дара радгылща рымата йалыхуан.

УадыргIвана ауи Ставрополь йтагылу связла арра-къвырльыкъвхара йхIаракIу апхьарта апны архъвыхраква дахIврала дыркIылстI, хвысквша дапхьатI. Йапхъахуз асквши бжакIи Эдуард адырра бзидздзаква гIайырбун.

– АпхьагIвчва шабгугьи абазата йрылаз сара йсхъазын, – арса дрылачважвитI йхIаракIу апхьарта апны йдахIвраква ЧIвачIва Эдуард. – Ауи йгIалцIла лкIгIара змаз джьауапкIра ду сыласхIвун.

УадыргIвана архъвыхраква рагIан ауи арыпхьагIвкI закIыла йгвы гIайабгъан «хпа» йзйыргылтI. Апхьара апны йдахIвра «къапщква» ауыла йалгазтIхIва акурсант дамайчуа ар къвырльыкъвхагIв-связист ъачIвагIа гIацIигатI.

Афицар шIа къвырльыкъвхара Байконур дырщтитI. Акъраль абзазагIвчва ащардагIв рыхъазла араса йзпхьуз космодромын. Ауаса ауыс рыцIа цIолата йыздыруаз ауагIа рыхъазла ауи акъраль ауацIала йхъаду ядро абджьар  полигонын. Аконструкторква рыуа дзачIвызлакIгьи гвып кIьыда йымата араъа йшIыцдзу абджьар квпшыраква йрыдынхалуан. Связистта аполигон йгIарщтийыз ЧIвачIва Эдуард гIамта айшысла ракетчик ъачIвагIа тшахайыргIвазара атахъхатI – апхьара йырщтийыз датша заджвы йтара дтагылата къвырльыкъв йхауа далагатI.

«Дгенералханыс зтахъым асолдат дгьауам», – рхIвитI ауагIа. Эдуардгьи мурад щарда йгвалан. Зны ауи генерал хъылпакI йхъайцIан йшйынгIалуа йырхъвыхуа агIвыга дтапшытI. Афицар шIа гвы гьайымттI агенерал апшвыма йкабинет дгIаджвылцIхта дшгIайыдзхъагылыз. «Ужвыгьи ушIаркIвапI, лейтенант», – хIва длакъырдын агенерал йхъылпа найахвхтI.

ЧIвачIва Эдуард йылахь йгьанымызтI дгенералханыс. Йгьи дгьымкапитанхатI. Арра апны йкъвырльыкъвхара хысквша ракIвпI йагIамтахаз. УадыргIвана Эдуард Къвмаль йпа пхастата йпхьадзауа агIаншара данйатI. «Апхаста хIунагIва апны йгIаншата гьакIвым йшаъу», – лхIвитI Эдуард йхъапщыла Рима сара тшсмыргIващаныс ахъазла.

Йчвгьаз агIагIвжвара амщтахь аврачква Эдуард йъапкътлапкъква зымгIва гIазыркIкIыхта йадыркIылхума ухIвауата йыдгIапсалтI. Ауаса йзгIвадара абгата йгьырзгIащаквмыргылхтI. Афицар йнапIыкI шIамкIва, йылаква йрымбахуа, йлымхIаква йрымгIахуа дгIанхатI. ЗымгIва йрайчвахугьи закIгьи гьйымдырхуазтI. АзгIва дайгIайта ймагIну гIайгвалашвахра апхъала ауи мызпхьадзара дабакIытI. УадыргIвана йащтагIайыз асквшквагьи йзгIвадара агIащаквыргылхра ауысла йхьантан. Ага йуысква баргвыта йакIвшазтынгьи, Эдуард йбзазара шIыц-шIыц ахъа джвыквицIахтI. АзгIваква азджьакI шгIайанкъвакъвуазгьи дынхауа далагатI, унагIвара далалтI. ЗынзаманкI бзи йбуз агIврагьи гIащтIиххтI. Эдуард данчкIвын шIаз уыси гIахIвахри йгIвуан. Мадзара щарда зпщылаз йапхьари йкъвырльыкъвхари рагIан ауатква кIайрышвхтI. Ахвра хьанта амщтахь тшангIабитх Эдуард Брайль йазбука ййырдырын акнигаква щардата дрыпхьауа далагатI. Дызпхьуз акнигаква хъвыцра щарда йызгIадрыцIсуан. Азимов Айзек ашумерква дъагIарыквчважвауа акнига ангIайнапIыцIашва ари апхъанчIви уагIахъа абазаква закIыла йшырпщылу гвы айттI: ашумер хьызква йгIарныцIуа абазала йатакI йауан. Ашвуа гIвыра йырхъвыхуата ауи абаза-апсуа бызшва йшазцауа гIахъызтIыз академик Турчанинов Г.Ф йунашва здыруаз ЧIвачIва Эдуард йара йхъвыцраквагьи йгIвытI. Ауи йхъвыцраква агIвыра ду «Абаза уагIахъа ртурых айшыста» апны йгIайырбитI, «Абазаква» – хIва зхьу акнига гIацIищтитI. Акнига йалалтI абаза, урышв бызшваквала йгIвыта апхъала йымаз абзагIвраква, агIахIвахраква, ауысаква. (ЙыршIыйара апны йгIвыджьхауа авторта далитI йхъапщыла Римма, ауи ашвъабгъьы йанылцIахитI шIала йхIвауа атекстква.)

Йджьащахъву ари акIвпI: Эдуард йхвбахауа аклассдза абазаква дрылата АбазахIабльа дтабзазатI. УадыргIвана ртгIачва Эркен-ШахIар йталхын йынцIра шабгу аурышвква дрылабзазауа дгIамгIвайстI. УадыргIванагьи йцри бызшва гьихъмаштылтI, бзидздзата йдыритI.

– Апхьара санджвыквылгьи къвырльыкъвхара анджвыквсцIагьи схъазы сангIанхара щардала схъа абаза бызшвала сачважвахуан, – йхIвитI Эдуард.

АзгIва хьанта дапшIагылата данабакIуаз Эдуард швабыж йгIайыхъватI йцри уагIа йрызйыму абзибара, абзазара азгIашыкъра, йынкъвигауа ахъацIара ду. Ужвы ауи адуней ахъгIара абгата йылайхIвитI, йбзазара йцриква рбзибара дула йкIвыршапI йгьи йырчвыпI.

ЧкIала Георгий,

«Абаза Къраль» сайт йазалхпI

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki