СураткI атурых

Щарда мцIуата апхъанчIви суратквакI гIаснапIыцIашватI. Ауат Трыквштала йгIайтыпахта ужвы Апсны йтабзазауа арепатриант Куджба Окан йгIаситтI. Ауат рыуа азакIы сцри кыт Ачандара атурых йъапщылу йгIалцIла сгватра азынасырхатI. Асурат йагIвсыз асквшышв йгIважвахауа асквшква рагIан акыт аквта гваран апны йхъырхтI. Ари агваран зынзаманкI акыт йауаз ахI Ачба Бата йчIвын. Ауи асквш 1930-ква рагIан репрессия далашватI. Ауаса сквшышвкI рапхъала йапшдзата КIавкIаз ащхъаква рщапIы апны йщтIу ари ауатыкв пшдза аквта уахьчIва йъагIадзазгьи метр гIвынгIважва зхIагIару ацIла гыларкIвапI.

АцIла швабыж йажвыпI. Апхьахьаква йшырпхьадзауала, ауи сквшызкь райхIа ахъыцIитI. Ауасаражвква йшырхIвахуала, ауи агIамта ауацIа ацIла мцаблыра щарда ахъыстI. Ауи йгIалцIла ащапIы апны пщметркIи бжакIи йнадзауа акIынхIара ачпатI. АцIла ду уанапшуа ачвагIваца акIвымкIва датша закIгьи йамкIуазшва йубитI. АкIынхIара ауи аъара йдупIта атшы уаквчIвата йа амашина утачIвата хвитта уызталуаштI.

Асурат хIаквгIацапахитI. МачIкI йхъващхаз асурат швъабгъьы апны уагIахъа фашала йгIвычата хыгIв хъачва аныпI: азаджв ацIла акIынхIара йтагылу атшы даквчIвапI, агIвыджь щъагIвта ацIла апахь йгылапI. Ауат дзачIвкву гIассырдырра стахъыта акыт йгIатахаз ахIбачва йдсырбатI. Ауат рыуа азджьакI, зныбыжьла сквшы 85 йрайхIу, ркытлагIвчва гIардырхтI.

Алыгажвква йшырхIвахуала, арат ахъачваква анбжьагIвчва цIабыргын: Царгуш Тадар (агъьмала), Ахба Мстафа (атшы йаквчIву) йгьи сквшы 110 райхIа нызцIыз Инапха Хджадж (армала). ЩардагIвы Инапха Хджадж йгIахIвахра рдырхитI. Йжвежвхауа асквшышв ацIыхъва ауи йынбжьагIвчва-мхIаджьырквагьи йаргьи ацыта Трыквшта йтанагатI. МышквакI анцIы рпсадгьыл ахьыла йгIацапахырныс рмурадхатI. Ауи азаман акъральгIвынаква нахвата йгьщаквдмыргылсызтI. Ауи абзирала анбжьагIвчва щъагIвта амшын атшпыламцара Апсныдза йгIамгIвайстI.

Швабыж йджьащахъвапI йара асурат атурыхгьи. Куджба Окан асуратыжвква разкIкIра швабыж дазгIашыкъпI. Ауи здыруа зымгIвагьи сураткI гIарнапIыцIашварквын ахабар зынла йдырдыритI. Абари асурат Куджба Окан Голландияла йгIатыцIта акIвпI йшгIайнапIыцIашваз. Йшаъула, суратипхьадза йара атурых амапI, ауи ахIатырла йгIадзынгылуа абанпараква ауат атурыхква дхIырдырныс хачIв хъадата хIпахь йгылапI.

Ахба Диана,

«Абаза Къраль» сайт йазалхпI

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki