Трыквшта йбзазауа абазаква

КIавкIаз йтыцIта Трыквшта збзазартахаз абазаква сквшы 150 рурала рцIасква ргIахчари адырра шIыцква ргIапшцIгари гватра ду рызрымата йгIамгIвайситI. «Анадолу» хабарргага агентства уыжвгIанчIви абазаква йгIарыквчважвауа агIвыра гIаквырцIатI. Ауи абазаква рбзазаща, рунагIва адгалща, трыкв жвлара апны гылартата йрыму йырзынархапI.

«Анадолу» агентства ахабар шаргауала, Самсун агьагьара йаланакIуа Хавза абаза микрорайон Джевизлик апны унагIвипхьадза йрыуу дзаджвызтынгьи университет дырра гIайыквшватI. Джевизлик абзазагIвчва йгIарылцIтI йбергьльу абакIыгIв Исмаил Темиз, Трыквшта а-ХIауа рхъвква зны йрунашвачпагIвыз, ужвы акъвырльыкъвхара йгIалцIхыз агенерал Айдоан Бабаолу, асквш 1991 агIан чкIвынргIа рквтала йакIвшуз Европа ачемпионат апны айгIайра гIатызгаз (уахьчIвала Джевизлик микрорайон ажвлара унашвачпагIв) Осман Юнер.

Осман Юнер «Анадолу» агентства йшрайхIвызла, апхъала Джевезлик «Хурдаз» – хIва йапхьун. Ауи асхъан араъа унагIва 300 тан, ужвы 40 ракIвпI йгIанхаз, йтабзазауа йрыуатагьи рыцIа йчкIвыну йыквлагIвчва ракIвпI. ЙгIадзынгылуа ашIаква ауниверситетква рпны йапхьаныс Трыкв йапшым аштаква рахьыла йайтыпитI.

АкъральыгIва уыснкъвгагIвчва гIахIахвырквын, Юнер йшихIвауала, унагIвипхьадза заджвымзара-заджвы дгIарылцIитI. АрыпхьагIвчвагIваца 180-гIвы йнадзитI.

– Трыквшта а-ХIауа рхъвква зны йрунашвачпагIвыз, ужвы акъвырльыкъвхара йгIалцIхыз агенерал Айдоан Бабаолугьи араъа дауапI, – йгIацицIахитI Юнер. – ХIуагIахъа аспортсменквагьи гIарылцIтI. Сара хвитра абакIрала Европа сачемпионпI. АпшгIара-цхърагIара адкIылара «АКУТ» (Arama Kurtarma DerneğI) апрезидент Насух Махруки йшихIвауала, йабаду йнышвынтара араъа йаъапI. ХIара арыпхьарала къральыгIва унашвачпагIв дхIымапI, йхIымапI ауагIа депутатквагьи. Абари зымгIва зквшахIату закIыпI – хIкультура шхIагIу.

Юнер датшагьи йгIаликIгIаз ари акIвпI: ашIаква университет диплом рымамкIва унагIвакIгьи гьуауашым. КъральыгIва уыснкъвгагIвчва рыламкIва тгIачвакIгьи угьрынйушым. ЗымгIвагьи рбзазаща бзита, йыртахъу нахъауата йаъапI.

Юнер Джевизлик датшагьи йызлагIаликIгIауа «азхъацIарапI»: сквшкъомкI руацIа атыдзква рышвквагьи рхъышвквагьи гьадмыркIуазтI, зымгIвагьи кърар ду рызбжьата йгIамгIвайсуан, ацкьарагьи апхъа йдыргылуан, ужвыгьи ауи акIвпI йшаъу.

«Аквтанай апхьарта йгIалымгаз чкIвынкIгьи араъа дгьтам»

Сквшы 72 зныбыжьта Джевизлик йтабзазауа Эрдоган Юнергьи йгIаликIгIатI абзазагIвчва адырра магIын ду шазырбауа.

– ХIпны аквтанай апхьарта йгIалымгаз чкIвынкIгьи дгьуауашым, – йхIвитI Юнер. – ХIара арыпхьара магIын ду азыгIбитI. ЙалкIгIатав, сара швабыж йсгвапапI ахIвссаквагьи апхьара тшъадыркIылуа. Сара сгIариква, ауат ртынхаква зымгIвагьи дырра раутI.

Юнер йгIаликIгIатI апхъанчIви цIасква рыцIа-рыцIа йшыдзуа, йамуазтынгьи цри бызшвала йчважвитI уымхIвушызтын: «ХIуагIахъа культура хIчвыдзитI, адгьагIа хIчвыдзитI. Апхъала ууагIахъа дрыуамкIва таца дгIаг йгьамуазтI. Ужвы ауаса йгьаъахым. Йаргьи араъа хIара хIакIвымкIва датша ахIбачва гьаъахым», – йгIацицIахтI ауи.

Фармацевт ъачIвагIагIвта Трыкв шта щарда рпны йынхаз Дурмуш Бабаолу пенсия ныбыжь днадзата анхара аннийыжьх тшпщара Джевизлик щарда дгIайлитI. Асквш 1305 йгIашIарышвта араъа йгылу амаджьгыт аимам дчмазагIвхата дандыркъьа амщтахь Дурмуш Бабаолу ауи дахьпшуа далагатI. Абар ауи йхъатала йхIваз:

– Сара Астомбыль стабзазитI, ауаса атшпсщара мшква рагIан сцри кыт сгIайлитI. ТшпсщитI. ХIмаджьгыт имам дазалхпI, ауаса дъазгIвадам йгIалцIла йхъа дазсакъхара атахъыпI. Ауи йцынхъвы амаджьгыт са сахьпшлитI, аджьамгIат намаз дсрычпитI. ХIкыт апны аджьамгIат ацIагылата йацацхърагIитI. Ахвыцдза йпны угIалагата рыцIа йнаскIьахьу йпныдза хIапхъанчIвиква йгIартынхаз ацIасква пIатIу рыквхIцIитI. Азаджв азаджв зынгьи йгвы дгьасуам, кърар нкъвыгIгитI. Ауыла тшгьхIыргIващум.

Сквшы 41 рапхъала Джевизлик збзазартахаз Эмрие Атеш йшылхIвазла, дантаца чкIвыныз ауагIахъа цIасква рынкъвгара лчвыбаргвын.

– Апхъала ахъацIи апхIвыси айшвакI йацадзхъачIва йгьамуазтI. Ужвы ауаса йгьаъахым. Ужвы атацачкIвынква руыс рыцIа ймайрахатI. Ауаса апхъанчIви цIасквагьи уырджьушта йгьаъам. Ауат хвы ззубуш бзира щарда рылапI. ГвынгIвырапI араъа йшадыгьа кыту. Хвыцгьи дугьи ацIагылата зымгIвагьи джькIахбаста хIальальла асасчва гIадрайгвитI, – лхIвитI Эмрие Атеш.

«Анадолу» агентства йдыргаз ахабар зквшахIату ари акIвпI: аглобализация ашвхIаусыгIвала адуней апны йъабзазалакIгьи абазаква зымгIва руагIахъа культура мачI-мачIымцара йырчвыдзитI. Абаза уагIахъа рапхъанчIви культурагьи рыбызшвагьи гIахчахара ахъазла йазалху апрограммаква лыхра атахъыпI. Асквш 2014 агIан арыпхьарала Трыквшта аминистерства ареспублика йтабзазауата зпхьадзара мачIу ауагIахъаква рыбызшваква апхьартаква рпны йадрыпхьарныс йдырхвиттI. Абаза кытква рпны йапхъахауа апхьарасахIатква джвыквырцIатI. Ажва гьалам арат амаль шIыцква абазаква рапхъанчIви культурагьи рыбызшвагьи ргIахчара йшацхърагIуш.

«Анадолу» агентства (Anadolu AjansI)

агIвыраквала йадгалапI

Емельянова Надежда,

«Абаза Къраль» сайт йазалхпI

Асуратква «Анадолу» агентства йырчIвыпI

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki