Йнардзу ароман

Абаза-апсуа этнос ртшауацIыхра знархару а-Дуней адкIылара «Алашара» рцхърагIарала Черкесск йтагылу «Нартиздат» гIвырагIацIщтырта апны Тобыль ИсмагIиль йроман «Азамат» йгIванхауата йгIацIцIтI.

Тобыль ИсмагIиль Абубакьыр йпа (1918–1959) – абаза литература ангIаншуз атлахан йалалкваз дрыуапI. Черкесск педагогика училища дангIалга амщтахь йцри АлбыргIан кыт апхьарта апны арыпхьагIвта дынхун. Ауаъа драма кружок гIанйыршатI. Ауи йалакваз ачкIвынчви ахIвсси ркъарула мыгIвхъгара гIанзыршуз ацIасыжвква лакъырды йырчпун, ареволюция амщтахь йщаквгылыз абзазара ахъгалраква гIадырбун.
Ауат аргылчIвква сценарий рзызыгIвуаз йара Тобыль ИсмагIиль йакIвын. Йара ауи асхъан уыса йыгIвуа далагатI, ауат абаза газет анапаква йгIарыквшвун, апхьагаква йрыларцIун. МачI-мачIымцара ауи алитература ршIыйара дхънахын асквш 1917 агIан йакIвшаз ареволюция апхъали ауи амщтахьи абазаква рбзазара шаъаз йгIаквчважвауа трилогия йгIвырныс ймурадхатI. Ауаса ХIабаз район акоммунист партия комитет ахъвшара дъаунашвачпагIвыз ашвхIаусыгIвала уыс йщардан, ауат дгIархъшвалта бзи йбауа ауыс анизыхъатакIуаз мачIдзан. ЙпхыцIа йанылыз апхаста амщтахь дызлагаз агIвыра йапхъахауа ахъвгьи йзынамырдзауата адуней йхIваджьтI. Ароман йнардзамкIва йгIанхатI.

Ауаса ИсмагIиль Абубакьыр айщчвата йзалыз агIвгIвчва – ХIачвыкъва ЗамахIщари, Цекъва Пасарби, ТхIайцIыхв Бемырза, ЧквтIу Микаэль, Брат Квчыкв – ркъару адыркIылын ароман «Азамат» агIацIщтра йацхърагIатI: анапIлагIвыра азыркIкIытI, бжачпата йалаз йадынхалхтI, агIацIщтра йаздрыхIазыртI. Асквш 1963 ароман гIацIцIтI, ари ажанрла абаза литература апхъапхъадза йалалыз гIвырахатI. Ауаса ауи йгьахъазым ароман амагIны щтIызхуа. Ауаъа йгIарбапI ареволюция апхъала абаза кыт абзазара шаъаз, ауи шпсыпынкъвгуз, цIаста йщаквгылаз, ауат ауагIа йшынкъвыргуз. Ароман абызшва швабыж йджьащахъвапI, ужвы ауагIа рчважвара йалахым ажва, ажвацгIай, ажважв щарда алапI. Акнига апхъапхъадза йгIацIцIищтра йцIыз асквш швбжа руацIа ауи къытхатI, агIаура баргвхатI.
Абари аъаща гIарпхьадзауата «Алашара» адкIылара аэксперт гвып акнига йгIванхауата агIацIщтра йацыркIтI. АгIацIщтра шIыц йанадынхалуаз абаза бызшва ауыжвгIанчIви гIвыща тамам ацIасква гIадрысабаптI.

ЧкIала Георгий,
«Абаза Къраль» сайт йазалхпI

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki